De conformidade co previsto no artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, e no artigo 8 da Lei 19/2013, do 9 de decembro, de transparencia, acceso á información pública e bo goberno, dáse publicidade á Resolución do 10 de agosto de 2021, da Consellería de Sanidade, pola que se encomenda á Axencia Galega para a Xestión do Coñecemento en Saúde a xestión do III congreso internacional sobre prevención, tratamento e control do consumo de cannabis e os seus derivados.
– Actividade: en virtude da presente encomenda, a axencia asumirá:
a) A xestión das inscricións e acceso das persoas inscritas aos contidos do congreso.
b) A programación, planificación e xestión das actividades formativas do congreso propostas pola Consellería de Sanidade, dentro dos límites orzamentarios establecidos.
c) Facilitar o acceso vía streaming (on line) ás persoas inscritas nas mesas de debate que se levarán a cabo os días do congreso, así como a resolución das incidencias que poidan xurdir nos accesos á plataforma de contidos e recursos técnicos.
A xestión das actividades formativas por parte da ACIS incluirá a xestión das inscricións dos destinatarios, a planificación, programación, disposición e/ou contratación dos recursos formativos, humanos e materiais para a realización das actividades, a supervisión da execución das mesas de debate, a avaliación da satisfacción dos asistentes e da calidade da formación, a xestión económica das actividades formativas e a información sobre as actividades encomendadas para o seu control e verificación.
A ACIS, no desenvolvemento da actividade encomendada, seguirá as directrices e instrucións da Consellería de Sanidade, a que lle corresponden os poderes de verificación e control da encomenda.
A Subdirección Xeral de Programas de Fomento de Estilos de Vida Saudables da Conselleria de Sanidade, como promotora e responsable da iniciativa, verificará e controlará esta encomenda.
– Natureza e alcance da xestión encomendada: o encargo ten natureza de encarga a medio propio, de acordo co disposto nos artigos 47 e seguintes da Lei 16/2010, do 17 de decembro, e no artigo 13 da Lei 14/2013, do 26 de decembro, de racionalización do sector público autonómico. Tal condición de medio propio vén prevista no artigo 5 do Decreto 112/2015, do 31 de xullo, polo que se crea a Axencia Galega para a Xestión do Coñecemento en Saúde e se aproban os seus estatutos.
– Prazo de vixencia: esta encomenda producirá efectos a partir da súa publicación no Diario Oficial de Galicia, e manterase ata o 31 de decembro de 2021.
Santiago de Compostela, 10 de agosto de 2021
Julio García Comesaña
Conselleiro de Sanidade