O artigo 28 do vixente Estatuto de autonomía de Galicia establece no seu número 2 a competencia da Comunidade Autónoma galega no desenvolvemento lexislativo e a execución da lexislación do Estado en materia de expropiación forzosa.
Con data do 20 de decembro de 2018 a Xunta de Galicia procedeu á declaración de utilidade pública e urxente ocupación dos bens e dereitos afectados polo proxecto de construcción da Vía Ártabra, treito N-VI-AP-9, de clave AC/04/156.01.4.1, nos concellos de Cambre, Oleiros e Sada, polo Decreto 175/2018 publicado no Diario Oficial de Galicia do 21 de xaneiro de 2019.
Con data do 30 de decembro de 2020 publicouse no Diario Oficial de Galicia, núm. 261, o Anuncio do 21 de decembro de 2020 polo que se somete ao trámite de información pública a separata para información pública do proxecto de modificación número 1: vía Ártabra, treito N-VI-AP-9, fase I, enlace N-VI-estrada AC-221 (ampliado coa fase II, estrada AC-221-autoestrada AP-9), de clave AC/04/156.01.4.1.2.M1, así como a relación individual de bens, dereitos e propietarios afectados polo proxecto.
Durante o período de exposición pública recibíronse diferentes alegacións, ningunha delas relativa ás parcelas que se afectan neste proxecto, segundo o previsto no artigo 56.1 do Decreto do 26 de abril de 1957, polo que se aproba o Regulamento de expropiación forzosa.
Con data do 10 de maio de 2021 o director da Axencia Galega de Infraestruturas aprobou o documento que define e xustifica a expropiación do «Desprazamento de rede de gas por obras do proxecto Vía Ártabra-Treito N-VI-AP-9», de clave AC/04/156.01.1.1.2.M1, para a reposición da rede de gas natural na contorna das obras de execución. Na relación de bens, dereitos e titulares afectados inclúese a imposición das servidumes e limitacións que se derivan da normativa sectorial en materia de hidrocarburos.
A tramitación do expediente expropiatorio debe axustarse ao disposto nos artigos 52 da vixente Lei de expropiación forzosa do 16 de decembro de 1954 e 56 e seguintes do seu Regulamento do 26 de abril de 1957.
En consecuencia, este servizo, en virtude da competencia delegada mediante Orde do 7 de setembro de 2017 sobre delegación de competencias no secretario xeral técnico e noutros órganos e entidades públicas adscritos a esta consellería, publicada no DOG núm. 179, do 20 de setembro de 2017, resolveu convocar aos titulares de bens e dereitos afectados que figuran na relación exposta no taboleiro de anuncios dos concellos de Cambre e Oleiros para que comparezan no lugar, na data e nas horas que se detallan a seguir, co fin de proceder ao levantamento das actas previas á ocupación en que se recollerán os datos necesarios para determinar os dereitos afectados, o valor destes e os prexuízos determinantes da rápida ocupación, sen prexuízo de se trasladaren ao lugar dos predios se o consideran necesario.
Termo municipal de Cambre.
Lugar: Casa Consistorial do Concello de Cambre.
Data: 14 de xullo de 2021, das 9.30 ás 11.30 horas.
Termo municipal de Oleiros.
Lugar: Casa Charry.
Data: 14 de xullo de 2021, ás 12.45 horas.
A relación de titulares cos bens e dereitos afectados, así como o plano parcelario correspondente estarán expostos nos concellos de Cambre e Oleiros e no Servizo Provincial da Axencia Galega de Infraestruturas da Coruña (r/ Vicente Ferrer nº 2, 8º andar, 15.071 A Coruña) e publicarase na seguinte ligazón da páxina web da consellería:
https://infraestruturasemobilidade.xunta.gal/avisos?content=/Portal-Web/Contidos/Aviso/aviso_0268.html
Así mesmo, realizarase a convocatoria aos interesados ao levantamento das actas previas mediante notificación individual.
Ao dito acto deberán acudir os titulares afectados persoalmente ou ben representados pola persoa debidamente autorizada para actuar no seu nome, xuntando os documentos acreditativos da súa titularidade, documento nacional de identidade (e, se for o caso, outra documentación que se requira, xustificante do pagamento do IBI...), así como certificado de conta con códigos IBAN e BIC, co fin de proceder aos sucesivos pagamentos que sexan procedentes mediante transferencia bancaria, podendo facerse acompañar á súa custa, se o coidan oportuno, dos seus peritos e notarios.
Así mesmo, en cumprimento do disposto no artigo 49 do Regulamento de expropiación forzosa do 26 de abril de 1957, este servizo, unha vez levantadas as actas previas á ocupación e habilitado o crédito oportuno, procederá ao pagamento, mediante transferencia bancaria, do importe dos depósitos previos e indemnizacións por rápida ocupación. No suposto de non ter presentado o certificado de titularidade da conta bancaria, con códigos IBAN e BIC, e a copia do DNI, consignarase o importe na caixa xeral de depósitos conforme o disposto no artigo 51 do Regulamento de expropiación forzosa do 26 de abril de 1957.
En cumprimento do artigo 55 do Regulamento de expropiación forzosa do 26 de abril de 1957, neste mesmo acto convócase ao acto de formalización das actas de ocupación, o cal terá lugar, logo de producirse o aboamento dos depósitos previos e indemnizacións por rápida ocupación, no lugar e na data que se indican:
Termo municipal de Cambre.
Lugar: Casa Consistorial do Concello de Cambre.
Data: 31 de agosto de 2021, das 9.30 ás 11.30 horas.
Termo municipal de Oleiros.
Lugar: Casa do Concello de Oleiros (sala de xuntas, 1º andar).
Data: 31 de agosto de 2021, ás 12.45 horas.
No mesmo acto ofertaranse aos propietarios as valoracións establecidas pola Administración para cada unha das leiras en concepto de mutuo acordo.
O presente acordo faise público, para xeral coñecemento, advertindo os titulares de que na acta figurarán os donos da cousa ou titulares do dereito expropiado, sen admitirse representación senón por medio de poder debidamente autorizado (notarial, xudicial ou do consulado), xa sexa xeral ou particular para este caso, achegando a documentación necesaria para acreditar a sucesión en caso de figurar o terreo a nome de herdeiros, e identificándose co documento nacional de identidade.
A fin de que os actos derivados dos procedementos expropiatorios se realicen de acordo coas medidas preventivas do risco de contaxio ante a situación provocada polo coronavirus COVID-19, serán aplicables as medidas de prevención recollidas no anexo da Resolución do 12 de xuño de 2020 e posteriores modificacións, da Secretaría Xeral Técnica da Consellería de Sanidade, pola que se dá publicidade ao Acordo do Consello da Xunta do 12 de xuño de 2020, sobre medidas de prevención necesarias para facer fronte á crise sanitaria ocasionada pola COVID- 19, unha vez superada a fase III do Plan para a transición a unha nova normalidade.
En todo caso, cómpre póren coñecemento dos interesados as seguintes indicacións:
– Os interesados poderán confirmar a data e a hora fixada para a realización do acto ou, no caso de concorreren motivos de inconveniencia por razóns de saúde e/ou de adopción de medidas que afecten favorablemente a prevención de contaxios, poderán propoñer outro horario diferente, logo de cita confirmada polo persoal de contacto.
– No momento da atención, tanto o persoal da Administración e da asistencia técnica como o expropiado usarán máscara de protección, respectando en todo momento a distancia de seguridade fixada. Para tales efectos, establécese a obriga de asistir ao acto provisto de máscara de hixiene adecuada e cumprir a etiqueta respiratoria. Porén, disporase de máscara por parte da administración no caso de que os expropiados non dispoñan dela.
– En caso de detectarse posibles síntomas compatibles coa COVID-19 nalgunha persoa presente, seguiranse obrigatoriamente as indicacións realizadas polas autoridades sanitarias para o efecto.
– Deberán asistir unicamente as persoas estritamente necesarias para a realización do trámite.
– Establécese a obriga de permanecer no local de reunión o tempo estritamente necesario.
– Non se poderá acudir no caso de presentar febre (>37º) ou síntomas de problemas respiratorios.
A Coruña, 14 de xuño de 2021
Felipe de la Vega Gándaras
Xefe do Servizo Provincial da Coruña
