Ás 11.00 horas do día 28 de xullo de 2021 terá lugar no salón de actos do Edificio Administrativo de Vigo, situado na rúa Concepción Arenal, nº 8, Vigo, ante a mesa presidida polo secretario xeral técnico e do Patrimonio, coa asistencia dun letrado da Asesoría Xurídica, dun representante da Intervención Xeral e dun funcionario da Secretaría Xeral técnica e do Patrimonio, que actuará como secretario, poxa pública do seguinte ben inmoble da Comunidade Autónoma de Galicia, cuxo alleamento foi acordado pola Orde do 25 de marzo de 2021:
Predio urbano. Casa de planta baixa distribuída para unha vivenda en cociña, comedor, baño, 3 dormitorios, vestíbulo e soportal, cos seus servizos complementarios, que ocupa unha superficie de 104,78 m² do terreo con piñeiral denominado Foz, fronte á estrada da Ramallosa á praia América, sito na parroquia da Ramallosa, concello de Nigrán, co fondo, que é de 25 metros, á estrada da Ramallosa, da cabida de 1.250 m²; as liñas laterais son paralelas con 25 metros de largo, e os seus lindeiros son os seguintes: norte, máis de Jesús Quintero e terreo de Ramona Diéguez Cervela; sur, máis terreo de Ramona Diéguez Cervela; leste, camiño veciñal; e oeste, estrada da Ramallosa á praia América. Sen cargas. Inscrita no Rexistro da Propiedade número 6 de Vigo como predio 6042, no folio 218, tomo 2.826 do libro 468. Referencia catastral 5432009NG1653S0001MY.
Tipo de licitación, primeira poxa: 284.585,24 €.
Tipo de licitación, segunda poxa: 241.897,45 €.
Tipo de licitación, terceira poxa: 199.209,67 €.
Para tomar parte na poxa é requisito indispensable consignar o 20 % da cantidade sinalada como tipo de licitación do ben perante a mesa, ou acreditar que se depositou tal cantidade na Tesouraría Xeral da Xunta de Galicia á disposición da Secretaría Xeral Técnica e do Patrimonio.
Serán por conta dos adxudicatarios os custos dos anuncios, así como os orixinados pola adxudicación e formalización da escritura pública venda; os demais gastos e impostos derivados da transmisión serán de aplicación conforme o disposto na lei.
O prego de condicións que rexe o presente alleamento está á disposición dos interesados na Subdirección Xeral do Patrimonio, rúa da Pastoriza, nº 8, 2º andar (Santiago de Compostela), así como na páxina web da Consellería de Facenda:
http://www.conselleriadefacenda.es/a-conselleria/transparencia/contratacion-patrimonial/procedementos-de-licitacion
Para asistir a poxa, por motivos relacionados coa COVID-19, recoméndase pedir cita previa.
Teléfonos: 981 54 41 51/981 95 78 11/981 54 44 27.
Santiago de Compostela, 14 de xuño de 2021
Jorge Atán Castro
Secretario xeral técnico e do Patrimonio