As Normas técnicas de planeamento urbanístico de Galicia, aprobadas por Orde do 10 de outubro de 2019 da conselleira de Medio Ambiente, Territorio e Vivenda, teñen por obxecto unificar os criterios técnicos para a elaboración dos documentos de planeamento urbanístico, a terminoloxía e os conceptos urbanísticos xerais, así como calquera outra cuestión que precise aclaración ou orientación técnica en materia de planeamento urbanístico.
Mediante a Resolución do 6 de maio de 2021, da Dirección xeral de Ordenación do Territorio e Urbanismo, acordouse o inicio da tramitación da modificación das Normas técnicas de planeamento urbanístico de Galicia, ao abeiro do disposto no artigo 48 da Lei 2/2016, do 10 de febreiro, do solo de Galicia, e 89 do Decreto 143/2016, do 22 de setembro, polo que se aproba o Regulamento que a desenvolve e, de conformidade co artigo 13 do Decreto 42/2019, do 28 de marzo, polo que se establece a estrutura orgánica da Consellería de Medio Ambiente, Territorio e Vivenda.
En cumprimento do disposto nos artigos sinalados, sométense a información pública a modificación das Normas técnicas de planeamento urbanístico de Galicia, durante o prazo dun mes, contado a partir da publicación deste anuncio no Diario Oficial de Galicia.
Durante o referido prazo, calquera persoa poderá examinar o documento, en horario de oficina, nas dependencias da Dirección Xeral de Ordenación do Territorio e Urbanismo, sitas no Edificio Administrativo San Caetano s/n, en Santiago de Compostela, e presentar ante a Consellería de Medio Ambiente, Territorio e Vivenda ou a través do correo electrónico sxurb@xunta.gal, as alegacións, observacións e xustificacións que se consideren pertinentes.
Asemade, poden consultarse as Normas técnicas de planeamento urbanístico de Galicia a través da seguinte ligazón:
https://cmatv.xunta.gal/seccion-tema/c/CMAOT_Territorio_e_urbanismo_Planeamento_urbanistico?content=SX_Ordenacion_Territorio_Urbanismo/Participacion_publica/seccion.html&std=Participacion_publica.html.
Santiago de Compostela, 6 de maio de 2021
María Encarnación Rivas Díaz
Directora xeral de Ordenación do Territorio e Urbanismo