En cumprimento do establecido no artigo 67 do Decreto 206/2005, do 22 de xullo (DOG nº 145, do 29 de xullo), de provisión de prazas de persoal estatutario do Servizo Galego de Saúde, e na Resolución do 11 de decembro de 2018 (DOG nº 240, do 18 de decembro), da Dirección Xeral de Recursos Humanos, pola que se publica o pacto subscrito pola Administración sanitaria coas organizacións sindicais CIG, CESM-O`MEGA, CC.OO., UGT e CSIF sobre a selección de persoal estatutario temporal licenciado sanitario de atención hospitalaria, e en virtude das competencias atribuídas polo Decreto 137/2019, do 10 de outubro (DOG nº 208, do 31 de outubro), polo que se establece a estrutura orgánica do Servizo Galego de Saúde, e polo Decreto 134/2019, do 10 de outubro (DOG nº 204, do 25 de outubro), polo que se regulan as áreas sanitarias e os distritos sanitarios do Sistema público de saúde de Galicia, e na Orde do 22 de abril de 2020 (DOG nº 82, do 29 de abril) sobre delegación de competencias en órganos centrais e periféricos da Consellería de Sanidade e do Servizo Galego de Saúde e na Axencia Galega para a Xestión do Coñecemento en Saúde, a Xerencia da Área Sanitaria da Coruña e Cee
RESOLVE:
Primeiro. Anunciar a convocatoria para a cobertura, mediante vinculación temporal, de diversas prazas con características específicas de facultativo especialista de área para os servizos sanitarios de atención hospitalaria da dita área sanitaria.
Segundo. As solicitudes, que se deberán dirixir á Área Sanitaria da Coruña e Cee, poderanse presentar no Rexistro Xeral da dita área sanitaria (Hospital Universitario A Coruña, As Xubias de Arriba, 84, 15006 A Coruña), así como a través de calquera dos procedementos do artigo 16.4 da Lei 39/2015, do 1 de outubro, do procedemento administrativo común das administracións públicas. O prazo de presentación de solicitudes será de quince días naturais, contados desde o día seguinte ao da publicación do anuncio desta convocatoria no Diario Oficial de Galicia.
Terceiro. As bases íntegras da convocatoria estarán expostas na páxina web do Espazo do Profesional da Área Sanitaria da Coruña e Cee e na páxina web do Servizo Galego de Saúde (www.sergas.es).
A Coruña, 27 de abril de 2021
Luis Verde Remeseiro
Xerente da Área Sanitaria da Coruña e Cee