Antecedentes:
A escola de navegación de lecer Distridial, S.L. está actualmente inscrita como escola de navegación de lecer (Enal básica), e solicita a modificación da súa categoría no Rexistro de Escolas de Navegación de Lecer, para recoñecerse como escola de navegación de lecer (Enal).
Consideracións legais e técnicas:
• Decreto 39/2018, do 5 de abril, polo que se modifica o Decreto 168/2015, do 13 de novembro, polo que se aproba a estrutura orgánica da Consellería do Mar (DOG núm. 78, do 23 de abril de 2018).
• Real decreto 875/2014, do 10 de outubro, polo que se regulan as titulacións náuticas para o goberno das embarcacións de lecer (BOE núm. 247, do 11 de outubro).
• Orde do 31 de xullo de 1998, pola que se regulamenta a normativa para o recoñecemento das escolas de navegación de lecer na Comunidade Autónoma de Galicia (DOG núm. 164, do 25 de agosto).
• O Servizo de Ensino e Titulacións Náutico-Pesqueiras analizou a documentación e realizou as correspondentes inspeccións.
A Dirección Xeral de Desenvolvemento Pesqueiro é a competente para resolver o expediente.
De acordo con todo o indicado,
RESOLVE:
Autorizar o cambio de categoría da escola Distridial, S.L. (Enal básica) e inscribila como escola de navegación de lecer (Enal). A citada escola segue mantendo o mesmo número de rexistro XGEN055, co cal foi recoñecida. As instalacións están situadas no lugar de Larache, núm. 43, Sta. Cristina de Cobres, Vilaboa 36141, Pontevedra.
Segundo o artigo 7 da Orde do 31 de xullo de 1998, pola que se regulamenta a normativa para o recoñecemento das escolas de navegación de lecer na Comunidade Autónoma de Galicia, terá a consideración de centro colaborador da Administración nos temas que lle son propios.
A inscrición no Rexistro de Escolas de Navegación de Lecer ten como finalidade a anotación, seguimento, control e inspección da escola recoñecida. Terá unha vixencia de cinco (5) anos, que se contarán a partir do día seguinte á publicación no Diario Oficial de Galicia desta resolución e deberá solicitar a súa renovación transcorrido ese prazo.
A escola está obrigada a comunicar ao rexistro calquera cambio que modifique as condicións en que foi recoñecida, como pode ser o cambio do/da instrutor/a ou da embarcación de prácticas.
Así mesmo, a escola poderá perder o seu recoñecemento e darse de baixa no rexistro por non renovar o recoñecemento, por incumprimento das súas obrigas ou por cesamento da actividade por máis de tres anos. A resolución publicarase no Diario Oficial de Galicia.
Contra esta resolución, que non pon fin á vía administrativa, poderá interpoñer recurso de alzada ante a conselleira do Mar no prazo dun mes, desde a notificación da presente resolución, segundo se dispón nos artigos 121 e 122 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 22 de febreiro de 2021
Susana Rodríguez Carballo
Directora xeral de Desenvolvemento Pesqueiro