O artigo 14 do Decreto 14/2017, do 26 de xaneiro, polo que se aproba o Regulamento de ordenación da información xeográfica e da actividade cartográfica de Galicia, regula o procedemento de elaboración e aprobación do Plan galego de cartografía e información xeográfica.
Tras o acordo do Consello da Xunta de Galicia de autorizar o inicio da súa tramitación na reunión do 20 de abril de 2017, a Comisión de Coordinación de Sistemas de Información Xeográfica e Cartografía aprobou, o 18 de novembro de 2019, a redacción da proposta inicial do Plan galego de cartografía e información xeográfica, que xa foi sometida á fase de consulta.
Continuando coa súa tramitación, de conformidade co disposto no Regulamento de ordenación da información xeográfica e da actividade cartográfica de Galicia, a Lei 4/2006, do 30 de xuño, de transparencia e boas prácticas na Administración pública galega e a Lei 27/2006, do 18 de xullo, pola que se regulan os dereitos de acceso á información, de participación pública e de acceso á xustiza en materia de ambiente, co fin de garantir unha maior participación da cidadanía neste trámite administrativo,
ACORDO:
Primeiro. Someter a información pública, durante un prazo de dous meses contados desde o día seguinte ao da publicación deste anuncio no Diario Oficial de Galicia o proxecto do Plan galego de cartografía e información xeográfica.
Segundo. O texto do proxecto poderá consultarse no portal de transparencia da Xunta de Galicia https://transparencia.xunta.gal/tema/informacion-de-relevancia-xuridica/procedementos-de-informacion-publica.
Terceiro. As persoas físicas e xurídicas interesadas e a cidadanía en xeral poderán presentar as alegacións que consideren oportunas a este proxecto:
• Preferentemente, mediante correo electrónico ao seguinte enderezo:
departamento.xuridico.iet@xunta.gal.
• Alternativamente, mediante a presentación dun escrito dirixido ao Instituto de Estudos do Territorio, San Lázaro, s/n, 15781 Santiago de Compostela, en calquera dos lugares previstos no artigo 16.4 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 28 de decembro de 2020.
Francisco Barea Paz
Director do Instituto de Estudos do Territorio