O 29 de decembro de 2017 publicouse no Diario Oficial de Galicia núm. 242 a Resolución do 14 de decembro de 2017 pola que se aproban as bases para a concesión de subvencións a producións e coproducións audiovisuais de contido cultural galego e se convocan para o ano 2018 (código de procedemento CT207A).
O día 14 de marzo, en virtude do Real decreto 463/2020, do 14 de marzo, declárase o estado de alarma para a xestión da situación de crise sanitaria ocasionada pola COVID-19, crise que se fixo extensible a todos os sectores económicos e sociais.
A Axencia das Industrias Culturais, sendo sensible ao impacto producido pola pandemia nas empresas audiovisuais, a través da Consellería de Cultura e Turismo (hoxe Consellería de Cultura, Educación e Universidade), elevou ao Consello da Xunta de Galicia para a súa valoración as propostas relativas a aqueles expedientes de subvencións para os cales se propoñía a súa continuidade, así como de modificacións dos que estaban en execución por estaren vinculados con carácter maioritario ao funcionamento de servizos públicos esenciais e á protección do interese xeral. Este, mediante o Acordo do 24 de abril de 2020, determinou a continuación da tramitación de determinados expedientes e procedementos en materia de subvencións, no eido da Administración xeral e das entidades instrumentais do sector público autonómico.
O día 30 de abril de 2020, por Acordo do Consello da Xunta de Galicia, apróbase o Plan de reactivación dos sectores cultural e turístico fronte aos efectos derivados da COVID-19 e adóptase un paquete de medidas dirixidas ao sector cultural co obxectivo de paliar esta crise e reactivar o sector cultural e turístico, este fíxose público o día 5 de maio de 2020.
Entre as medidas que recolle o plan atópanse as medidas de apoio ao sector audiovisual, o que supón unha inxección de liquidez ás empresas a través da modificación extraordinaria das convocatorias de axudas ao audiovisual para a consecución dos anticipos.
Así mesmo, no ámbito estatal, aprobáronse medidas de apoio ao sector cultural e de carácter tributario para facer fronte ao impacto económico e social da COVID-19 e adaptáronse ás xa existentes, para a protección tanto de traballadores como das empresas, especialmente autónomos e pemes do sector cultural e, dentro deste, do audiovisual.
O día 8 de setembro de 2020 publícase no Diario Oficial de Galicia núm. 6 a Resolución do 31 de agosto de 2020 pola que se amplía o prazo de xustificación das subvencións concedidas ao abeiro da Resolución do 14 de decembro de 2017 pola que se aproban as bases para a concesión de subvencións a producións e coproducións audiovisuais de contido cultural galego e se convocan para o ano 2018, e establécese como data límite de xustificación da subvención o 15 de novembro de 2020.
Malia o anterior, sendo isto insuficiente, a Axencia Galega das Industrias Culturais considera necesaria a modificación da convocatoria do ano 2018 das subvencións a producións e coproducións audiovisuais de contido cultural galego.
Na súa virtude, e de conformidade coas facultades que teño conferidas,
RESOLVO:
Modificar a Resolución do 14 de decembro de 2017 pola que se aproban as bases para a concesión de subvencións a producións e coproducións audiovisuais de contido cultural galego e se convocan para o ano 2018, no sentido seguinte:
Primeiro. Na base décimo sexta, punto 3, os últimos parágrafos resultan redactados como seguen:
«3. No resto dos proxectos subvencionados, o réxime de pagamentos anticipados será o seguinte:...
– Nos supostos en que se teña presentado a documentación exixida para o pagamento da anualidade 2019, poderá pagarse o 80 % da totalidade da anualidade 2020, como anticipada sen xustificación, de conformidade co artigo 63.3 do Decreto 11/2009 polo que se aproba o Regulamento da Lei 9/2007, do 13 de xuño, de subvencións de Galicia, tras a autorización do Consello da Xunta de Galicia para facer fronte á situación de crise provocada pola COVID-19, e presentarase a documentación xustificativa que acredite as dificultades empresariais ou a falta de liquidez. O importe do anticipo deberase xustificar mediante gastos realizados e pagados dentro da anualidade 2020.
Disposición adicional única. Redistribución de créditos
Coa finalidade de facilitar a realización dos proxectos á distribución anual de gasto, poderase solicitar unha redistribución do importe da anualidade 2020, cun límite máximo do 20 % do custo concedido para esta anualidade, e aumentarase no mesmo importe a anualidade 2021. Esta redistribución deberá ser solicitada antes do 15 de novembro de 2020 e previamente á súa aprobación deberá tramitarse o correspondente expediente económico.
A autorización desta redistribución implica que para o ano 2021 o período de realización de gastos (emisión de facturas) e a realización de pagamento dos gastos executados será do 16 de novembro de 2020 ata o prazo de presentación da documentación xustificativa, que será ata o 30 de abril de 2021.
Santiago de Compostela, 15 de outubro de 2020
Román Rodríguez González
Presidente do Consello Reitor da Axencia
Galega das Industrias Culturais
