O Concello de Verín solicita o cambio de domicilio por traslado de instalacións da rúa José Mª Pereda Álvarez, nº 3, á rúa Irmáns Sulleiro, s/n, e a autorización para impartir as ensinanzas profesionais de música no Conservatorio de Verín.
Conforme o Decreto 46/1991, do 7 de febreiro, créase o conservatorio de grao elemental dependente do Concello de Verín, cuxa posta en funcionamento se autorizou pola Orde do 28 de febreiro de 1991 (DOG do 5 de abril), con sede na rúa José María Pereda Álvarez, nº 3, de Verín (Ourense).
O Real decreto 303/2010, do 15 de marzo, establece os requisitos mínimos dos centros que imparten ensinanzas artísticas. O Decreto 253/1995, do 29 de setembro, e a Orde do 5 de decembro de 1995, regulan o procedemento para a autorización de centros docentes privados para impartir ensinanzas artísticas; trámites preceptivos iniciados na Xefatura Territorial de Ourense que achega o expediente cos correspondentes informes para a autorización das devanditas modificacións.
Por canto antecede, por proposta da Dirección Xeral de Centros e Recursos Humanos,
DISPOÑO:
Artigo 1. Modificación da autorización
Autorizar o cambio de domicilio por traslado de instalacións e as ensinanzas profesionais de música, no centro docente cuxos datos se sinalan a seguir:
Denominación: CEMU Profesional de Verín.
Código do centro: 32016558.
Enderezo: rúa Irmáns Sulleiro, s/n.
Localidade: Verín.
Concello: Verín.
Provincia: Ourense.
Titular: Concello de Verín.
Composición resultante:
Ensinanzas elementais de música para 80 postos escolares.
Ensinanzas profesionais de música para 80 postos escolares.
Artigo 2. Inicio da actividade
Para a posta en funcionamento das ensinanzas que se autorizan, a Xefatura Territorial da Consellería de Cultura, Educación e Universidade de Ourense, logo do informe do Servizo Territorial de Inspección Educativa, aprobará expresamente a relación de persoal que impartirá docencia.
Artigo 3. Inscrición no Rexistro de Centros
Esta orde dará lugar á correspondente inscrición no Rexistro de Centros da Comunidade Autónoma de Galicia.
Artigo 4. Modificación da autorización
O centro queda obrigado ao cumprimento da normativa vixente e a solicitar a oportuna revisión cando se teña que modificar calquera dos datos que se sinalan nesta orde.
Disposición derradeira primeira. Recursos
Contra esta orde, que esgota a vía administrativa, as persoas interesadas poderán formular recurso potestativo de reposición ante esta consellería, no prazo dun (1) mes, contado a partir do día seguinte ao da súa publicación no Diario Oficial de Galicia, segundo o disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, ou ben, directamente, o recurso contencioso-administrativo no prazo de dous (2) meses desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade co artigo 46 da Lei 29/1998, do 13 de xullo, reguladora da xurisdición contencioso-administrativa.
Disposición derradeira segunda. Entrada en vigor
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 17 de setembro de 2020
Román Rodríguez González
Conselleiro de Cultura, Educación e Universidade