Feitos:

Primeiro. O 3 de maio de 2019, a empresa UFD Distribución Electricidad, S.A. solicitou a autorización administrativa previa e a autorización administrativa de construción da instalación eléctrica denominada LMTS e CT Caticovas. Examinado o proxecto de execución, a instalación localizada no concello da Estrada consiste na instalación de liñas eléctrica de media tensión a 20 kV e un centro de transformación de 160 kVA.

Segundo. O 31 de maio de 2019, esta xefatura territorial solicitou o preceptivo informe ás distintas administracións, organismos ou, de ser o caso, empresas de servizos de interese xeral afectadas. A empresa promotora manifestou a súa conformidade cos condicionados establecidos.

Terceiro. O 28 de outubro de 2019, esta xefatura territorial ditou unha resolución de autorización administrativa e autorización administrativa de construción para a instalación IN407A 2019/090-4. Esta resolución publicouse no Diario Oficial de Galicia (DOG) do 18 de novembro de 2019 e no Boletín Oficial da provincia de Pontevedra (BOPPO) do 19 de novembro de 2019.

Cuarto. O 19 de febreiro de 2020, UFD Distribución Electricidad solicita a declaración de utilidade pública do expediente IN407A 2019/090-4 por problemas de permisos.

Quinto. Mediante escritos do 2 de xuño de 2020, esta xefatura territorial notificou ás persoas contidas na relación de bens e dereitos afectados a solicitude de declaración de utilidade pública da instalación eléctrica referida.

Sexto. O proxecto someteuse ao trámite de información pública mediante resolución do 2 de xuño de 2020 publicada nos seguintes medios:

– DOG: 22 de xuño de 2020.

– BOPPO: 18 de xuño de 2020.

– Xornal Faro de Vigo: 18 de xuño de 2020.

– Taboleiro de anuncios do Concello de Meis: desde o 3.6.2020 ata o 3.7.2020 conforme certificado do Concello de Meis.

Durante o mencionado trámite non se recibiron alegacións.

Consideracións legais e técnicas:

Primeira. A Xefatura Territorial de Pontevedra é competente para resolver este expediente con fundamento no Decreto 135/2017, do 28 de decembro, da Consellería de Economía, Emprego e Industria, polo que se establece a estrutura orgánica da Consellería de Economía, Emprego e Industria (DOG nº 18, do 25 de xaneiro de 2018) e no Decreto 9/2017, do 12 de xaneiro, da Consellería de Economía, Emprego e Industria, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG nº 22, do 1 de febreiro).

Segunda. A lexislación de aplicación ao presente expediente é:

– Lei 24/2013, do 26 de decembro, do sector eléctrico.

– Lei 39/2015, do 1 de outubro, do procedemento administrativo común das administracións públicas.

– Lei do 16 de decembro de 1954, sobre expropiación forzosa.

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica.

– Decreto do 26 de abril de 1957 polo que se aproba o Regulamento da Lei de expropiación forzosa.

Terceira. As características técnicas máis salientables da LMTS e CT Caticovas, para a que UFD Distribución Electricidad solicita a declaración de utilidade pública de construción, son:

• LMT aérea a 20 kV con condutor tipo LA110 de 62 metros de cable (cable por substituír no van existente do tramo CBD8076338), co orixe no apoio existente HV-630/14 do tramo CBD8076338, e final no apoio proxectado C-2000/14 para intercalar na traza da LMTA existente do tramo CBD8076338.

• LMT subterránea a 20 kV con condutor tipo RHZ de 635 metros de lonxitude, con orixe no apoio proxectado C-2000/14 para intercalar na traza da LMTA existente do tramo CBD8076338 e final no CT proxectado.

• CT con relación 20.000/400 V a 160 kVA.

As instalacións están situadas na parroquia de Nogueira, no concello de Meis (Pontevedra).

Conforme todo o indicado,

RESOLVO:

Declarar a utilidade pública, en concreto, da citada instalación eléctrica, o que leva implícita a necesidade de ocupación dos bens ou de adquisición dos dereitos afectados e implica a urxente ocupación para os efectos do artigo 52 da Lei de expropiación forzosa.

Contra a presente resolución, que non é definitiva en vía administrativa, poderase interpoñer recurso de alzada ante o conselleiro de Economía, Emprego e Industria da Xunta de Galicia, no prazo dun (1) mes contado a partir do día seguinte ao da súa notificación ou publicación, de acordo co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.

Pontevedra, 4 de setembro de 2020

Ignacio Rial Santomé
Xefe territorial de Pontevedra