Ao se descoñecer a identidade das persoas titulares dos inmobles relacionados a continuación, mediante este edicto ponse no seu coñecemento, polos medios establecidos no artigo 44 da Lei 39/2015, do 1 de outubro, do procedemento administrativo común das administracións públicas, o contido da Resolución 2020/0751, do 7 de agosto de 2020, que literalmente di:

«Decreto da Alcaldía.

Con data do 12.6.2020, 13.07, Adrián Martínez Bartol presentou escrito (Rexistro Xeral de Entrada número 2020-E-RC-2083) en que solicitaba que se limpase a maleza e se realizase a corta nos predios lindeiros coa súa propiedade, no lugar de Augas, Salceda de Caselas.

Con data do 6.8.2020 a Policía Local deste concello emitiu informe en relación co estado da parcela, que se encontra a unha distancia de menos de 50 metros da propiedade do denunciante, e que presentaba o seguinte estado especificado no informe, que se mostra no seguinte cadro, así coma os datos e titularidade da parcela denunciada facilitado por Catastro:

Ref. catastral	Polígono	Parcela	Metros vivenda	Árbores	Maleza	Nome do predio	Titular
36049A017009120000KT	17	912	<50	Piñeiros, eucaliptos e outras especies	Si	Aguas	Carballido Fernández, Serafina

Considerando que resulta aplicable ao presente suposto a Lei 3/2007, do 9 de abril, de prevención e defensa contra os incendios forestais de Galicia, que dispón no seu artigo 21 o seguinte:

“Artigo 21. Redes secundarias de faixas de xestión da biomasa

1. Nos espazos previamente definidos como redes secundarias de faixas de xestión da biomasa nos plans municipais de prevención e defensa contra os incendios forestais será obrigatorio para as persoas que resulten responsables consonte o artigo 21 ter xestionar a biomasa vexetal, de acordo cos criterios estipulados nesta lei e na súa normativa de desenvolvemento, nunha fanxa de 50 metros:

a) Perimetral ao solo urbano, de núcleo rural e urbanizable, sen prexuízo do disposto na disposición transitoria quinta.

b) Arredor das edificacións dedicadas a persoas, vivendas illadas, urbanizacións, depósitos de lixo, cámpings, gasolineiras e parques e instalación industriais situados a menos de 400 metros do monte.

c) Arredor das edificacións illadas destinadas ás persoas en solo rústico situadas a máis de 400 metros do monte.

2. Con carácter xeral, na mesma franxa de 50 metros mencionada no número anterior non poderá haber árbores das especies indicadas na disposición adicional terceira.

3. As distancias mencionadas neste artigo mediranse, segundo os casos:

a) Desde o límite do solo urbano, de núcleo rural e urbanizable.

b) Desde os paramentos exteriores das edificacións, vivendas illadas e urbanizable, ou os límites das súas instalacións anexas.

c) Desde o límite das instalacións no caso dos depósitos de lixo, gasolineiras e parques e instalación industriais.

d) Desde o peche perimetral no caso dos cámpings”.

Considerando que o artigo 21 ter da referida lei sinala que por persoas responsables se entenden as persoas titulares do dereito de aproveitamento sobre os terreos forestais e os terreos situados en zonas de influencia forestal en que exercen os seus dereitos.

Considerando ademais que, conforme o artigo 3.3 da Lei 3/2007, é unha obriga das persoas propietarias de terreos forestais e de zonas de influencia forestal mantelos en condicións que contribúan a previr ou evitar incendios forestais, respectando as normas de xestión da biomasa.

Considerando que o artigo 135 da Lei 2/2016, do 10 de febreiro, do solo de Galicia, dispón no parágrafo 1.c) que os propietarios de toda clase de terreos deberán conservalos nas condicións legais para servir de soporte aos ditos usos e, en todo caso, nas de seguridade, salubridade, accesibilidade universal e ornato legalmente exixibles. No mesmo artigo, dispón no parágrafo 3 que os propietarios de terreos conservarán e manterán o solo natural e, de ser o caso, a masa vexetal nas condicións precisas que eviten a erosión e os incendios, impedindo a contaminación da terra, o aire e a auga, e demais condicións que se determinen na lexislación vixente.

Considerando en último lugar, que cando se trate de interesados descoñecidos ou cuxa notificación resulte infrutuosa, será de aplicación o recollido no artigo 44 da Lei 39/2015, do 1 de outubro, do procedemento administrativo común das administracións públicas, que establece o seguinte: “Cando os interesados nun procedemento sexan descoñecidos, se ignore o lugar da notificación ou ben, intentada esta, non se puidese practicar, a notificación farase por medio dun anuncio publicado no Boletín Oficial del Estado.

(…)

As administracións públicas poderán establecer outras formas de notificación complementarias a través dos restantes medios de difusión, que non excluirán a obriga de publicar o correspondente anuncio no Boletín Oficial del Estado”.

En uso das atribucións que me confire o artigo 7 da Lei 3/2007, así como o artigo 21.1 da Lei 7/1985, do 2 de abril, reguladora das bases de réxime local,

RESOLVO:

Primeiro. Requerir os titulares dos predios relacionados para que procedan, na súa obriga de xestionar a biomasa vexetal, a efectuar no prazo de quince (15) días naturais desde a publicación do presente decreto no BOE, a limpeza de maleza e árbores, así como a corta de piñeiros, eucaliptos e acacias nos terreos da súa propiedade, sitos en Augas, Salceda de Caselas, e que se relacionan a continuación:

Ref. catastral	Polígono	Parcela	Metros vivenda	Árbores	Maleza	Nome do predio	Titular
36049A017009120000KT	17	912	<50	Piñeiros, eucaliptos e outras especies	Si	Aguas	Carballido Fernández, Serafina

Segundo. Requirir o/a denunciado/a para que, unha vez limpa a parcela, dea conta ao Concello de Salceda de Caselas, co fin de levar a cabo a inspección dos traballos realizados.

Terceiro. Advertir o/a interesado/a de que, de persistir no incumprimento, logo de transcorrido o prazo outorgado, se procederá á execución subsidiaria sen máis trámite, para o cal se aplicarán á parcela os seguintes custos, segundo proceda:

1) Parcelas menores de 500,00 m2: custo mínimo 500 € (este prezo inclúe os gastos de desprazamento de medios mecánicos e persoais á parcela, así coma o tratamento da biomasa).

2) Parcelas maiores de 500,00 m2: custo mínimo 500 € (a este custo mínimo engadiráselle o resultado de aplicar o seguinte cadro de prezos segundo as tarefas que se vaian realizar na parcela).

Cadro de prezos para tratamento da biomasa

Roza manual: 0,50 €/m2.

Roza mecanizado con rozadora de cadeas: 0,15 €/m2.

Roza mecanizado con rozadora de martelos: 0,20 €/m2.

* Corta, corta polo pé e trituración de rama nas faixas de protección de 50 m: 150 €/árbore.

Fóra dos 50 m (pistas, etc.): 75 €/ud.

*No caso de corta e corta polo pé de arboredo, disporá de cinco (5) días para a retirada da madeira da parcela.

Cuarto. Faise constar que, no caso de que se proceda á execución subsidiaria, o titular do terreo ou do dereito de aproveitamento deste deberá facilitar o acceso ao suxeito que leve a cabo os traballos de execución subsidiaria, advertindo da facultade deste último para poder acceder á parcela sen necesidade de consentimento da persoa titular, agás naqueles supostos excepcionais en que o acceso afecte, dentro da parcela, espazos físicos susceptibles de merecer a cualificación de domicilio para os efectos do artigo 18.2 da Constitución española.

Quinto. Advírtese que a contía resultante en función da súa aplicación á superficie da parcela e elementos existentes nela deberá ser aboada polo titular da parcela, sen prexuízo do custo real dos traballos unha vez rematados. Está ademais este concello facultado para a tramitación dun procedemento sancionador e, se é o caso, imposición de multas coercitivas.

Sexto. Advertir, novamente ao interesado que este concello está facultado para proceder á incoación do correspondente expediente de expropiación forzosa, no suposto de incumprimento do disposto no presente decreto, ao tratarse de titulares descoñecidos, sempre e cando os custos da limpeza superen o valor catastral da parcela, tal e como establece a Lei 3/2007, do 9 de abril, de prevención e defensa contra os incendios forestais de Galicia, e normativa complementaria.

Sétimo. Notificar este acordo aos interesados neste expediente administrativo».

Salceda de Caselas, 13 de agosto de 2020

Mª Dolores Castiñeira Alén
Alcaldesa