O Pleno do Concello, na sesión que tivo lugar o 2 de xullo de 2020, adoptou, entre outros, o seguinte acordo:

Primeiro. Desestimar as alegacións formuladas ao estudo de detalle baseándose nos argumentos e criterios sinalados no informe técnico-xurídico municipal do 17 de xuño de 2020, reproducidos no punto II do informe proposta do 22 de xuño de 2020.

Segundo. Aprobar definitivamente o documento do estudo de detalle para completar e reaxustar rasantes na esquina da avenida de Lamadosa coa rúa Jerónimo Vázquez Franco. Xuño 2020, redactado polos arquitectos Mateo Miyar Olaiz, co número de colexiado do COAG 2565, e Gonzalo Serantes Conchado, co número de colexiado do COAG 1525, e promovido por Construcciones Atocha 2006, S.L.

Terceiro. Ordenar a publicación e realización dos trámites administrativos recollidos nos artigos 82 e 88 da Lei 2/2016, do 10 de febreiro, do solo de Galicia, e concordantes do regulamento de desenvolvemento desta, para procurar a eficacia do acto de aprobación definitiva e a entrada en vigor do estudo de detalle aprobado.

Cuarto. Notificar este acordo ao promotor e ás áreas municipais interesadas na tramitación do expediente.

O contido íntegro do estudo de detalle aprobado pódese consultar nas dependencias municipais de Urbanismo, na páxina web de Urbanismo do Concello https://www.coruna.gal/urbanismo, na epígrafe «Planeamento/planeamento vixente» ou ben, desde a mesma web, a través do visor «Desenvolvemento do planeamento».

Contra este acordo, con carácter de disposición administrativa de carácter xeral, pódese interpoñer directamente recurso contencioso-administrativo ante a sala correspondente do Tribunal Superior de Xustiza de Galicia (artigo 84.1 da Lei do solo de Galicia e artigo 201.1 do seu regulamento), no prazo de dous (2) meses que se contarán a partir do día seguinte ao da publicación deste anuncio, de conformidade co disposto no artigo 46 da Lei 29/1998, do 13 de xullo, reguladora da xurisdición contencioso-administrativa, sen prexuízo de interpoñer calquera outro recurso que se entenda máis procedente e sexa conforme dereito.

A Coruña, 10 de xullo de 2020

A alcaldesa
P.D. (Decreto 3829/2019; BOP núm. 124, do 3 de xullo)
Juan Manuel Díaz Villoslada
Concelleiro delegado de Urbanismo, Vivenda, Infraestruturas e Mobilidade