Nas dependencias municipais do Concello de Cambre subscribiuse o 30 de xuño de 2020 o convenio urbanístico de planeamento entre este concello e a entidade Fincela, S.L., propietaria de distintas parcelas situadas no ámbito físico do lugar do Graxal-O Temple lindeiro coa estrada nacional AC-12, antes N-VI, e incluídas na súa maior parte na unidade de execución nº 19 das normas subsidiarias do planeamento de Cambre.
De conformidade co establecido no artigo 168.1 da Lei 2/2016, do solo de Galicia, sométese o texto do convenio ao trámite de información pública por un período dun mes mediante anuncio no Diario Oficial de Galicia e nun dos diarios de maior difusión da provincia, prazo que comezará a contar desde a última publicación deste anuncio.
Durante o citado prazo as persoas interesadas poderán examinar o seu contido e o expediente nas oficinas da Área de Urbanismo deste concello de luns a venres de 8.30 a 13.30 horas, logo de cita, e presentar as alegacións que xulguen convenientes.
Cambre, 3 de xullo de 2020
O alcalde
P.D. (R.A. 1323/2019, do 1 de xullo)
Juan González Leirós
Concelleiro delegado da Área de Urbanismo e Obras