Examinado o expediente iniciado por solicitude de EDP Renovables España, S.L.U. en relación coa declaración de utilidade pública do parque eólico Corme modificación substancial (en diante, o parque eólico), constan os seguintes
Antecedentes de feito:
Primeiro. O 15.4.1998, a Dirección Xeral de Industria da Consellería de Industria e Comercio resolveu autorizar as instalacións electromecánicas, aprobar o proxecto de execución e recoñecer a condición de instalación acollida ao réxime especial do parque eólico Corme G-3 (número de expediente 1/1997).
O 4.7.2000, a Delegación Provincial da Consellería de Industria autorizou a posta en servizo das instalacións do parque eólico Corme G-3.
Segundo. O 24.1.2017, Desarrollos Eólicos Corme, S.A.U. solicitou a autorización administrativa e a aprobación do proxecto de execución da repotenciación do parque eólico Corme G-3, segundo o previsto no Decreto 138/2010, do 5 de agosto, polo que se establecen o procedemento e as condicións técnico-administrativas para a obtención das autorizacións de proxectos de repotenciación de parques eólicos existentes na Comunidade Autónoma de Galicia. Coa dita solicitude a promotora achegou o anteproxecto de repotenciación, coa súa correspondente memoria ambiental.
Terceiro. O 23.11.2017, EDP Renovables España, S.L.U. solicitou a tramitación do expediente da repotenciación do parque eólico Corme G-3 (en diante, o parque eólico) conforme a disposición transitoria terceira da Lei 5/2017, do 19 de outubro, de fomento da implantación de iniciativas empresariais en Galicia, e a declaración de utilidade pública para o parque eólico.
Cuarto. O 11.12.2017, a Dirección Xeral de Enerxía e Minas autorizou a transmisión da titularidade de parques eólicos das sociedades Desarrollos Eólicos de Galicia, S.A.U. e Desarrollos Eólicos Corme, S.A.U. (sociedades absorbidas) a favor de EDP Renovables España, S.L.U. (sociedade absorbente), entre as que se atopa o parque eólico.
Quinto. O 29.12.2017, a promotora solicitou a declaración de interese especial para o parque eólico. O 15.2.2018, o Consello da Xunta de Galicia declarou o proxecto do parque eólico como de interese especial.
Sexto. Mediante o Acordo do 21 de marzo de 2018, da Xefatura Territorial da Consellería de Economía, Emprego e Industria da Coruña (en diante, a xefatura territorial), someteuse a información pública a solicitude de autorización administrativa previa, a declaración de utilidade pública, en concreto, e a necesidade de urxente ocupación que iso implica, a autorización administrativa de construción, o proxecto sectorial de incidencia supramunicipal e o estudo de impacto ambiental do parque eólico.
O dito acordo publicouse no Diario Oficial de Galicia do 5 de abril de 2018 e no xornal La Voz de Galicia do 3 de abril de 2018. Así mesmo, permaneceu exposta ao público nos taboleiros de anuncios do concello afectado (Ponteceso), da xefatura territorial, e da Xefatura Territorial da Consellería de Medio Ambiente e Ordenación do Territorio da Coruña, que emitiron os correspondentes certificados de exposición pública.
A continuación resúmese o contido das alegacións presentadas durante o período de información pública relativas ao expediente de declaración de utilidade pública do parque eólico:
– Oposición á declaración de utilidade pública, xa que a promotora solicita a expropiación de terreos nos cales xa dispón de contratos de arrendamento e, ademais, non se pode acudir á expropiación sen intentar previamente acadar un acordo cos titulares.
– A promotora pretende a expropiación de novos predios sen achegar unha xustificación sobre a imposibilidade de executar o proxecto sobre aquelas parcelas de que xa dispón.
– A promotora ten subscritos numerosos contratos de arrendamento en vigor coa maioría dos propietarios do actual parque eólico Corme, os cales pretende renegociar e, ante a negativa dos propietarios, solicita ante a Administración a declaración de utilidade pública para que os terreos sexan expropiados. O presuposto da necesidade de ocupación non se produce neste caso, posto que a promotora xa conta coa posesión dos terreos.
– Mencionan diversas sentenzas do Tribunal Supremo sobre supostos similares en que se establece a imposibilidade de declarar a utilidade pública, cando xa existe a plena dispoñibilidade dos terreos, así como a vinculación directa entre a utilidade pública e a necesidade de ocupación.
– Falta de información por parte da empresa ás persoas interesadas, especialmente tendo en conta a idade avanzada de moitas delas.
– Desacordo coas compensacións pola utilización dos predios.
– Con respecto á relación de bens e dereitos afectados (RBDA), estase ocultando a situación xurídica dos terreos afectados, posto que no parque eólico Corme G-3 a promotora xa ten á súa disposición a práctica totalidade dos terreos que se pretende expropiar, e ten subscritos contratos de arrendamento coa maioría dos propietarios. A estes contratos aínda lles quedan varios anos de vixencia (foron subscritos por un período de 25 anos, prorrogables por períodos sucesivos de 10 anos), e a súa finalidade é o desenvolvemento da mesma actividade para a cal se solicita a autorización.
– Existencia de erros na relación de bens e dereitos afectados (RBDA), maioritariamente en relación coa titularidade das parcelas, coas superficies afectadas, coa clasificación do solo, co tipo de aproveitamento, cos enderezos para os efectos de notificacións, etc.
– Desacordo co prazo do trámite de información pública, posto que se entende que é de aplicación o Decreto 138/2010, do 5 de agosto, o cal establece o prazo dun mes, e non a Lei 8/2009, do 22 de decembro.
– Solicítase un novo trámite de información pública e que se denegue a declaración de utilidade pública e a necesidade de urxente ocupación, a autorización administrativa de construción, o proxecto sectorial e o estudo de impacto ambiental.
– Na solicitude da promotora non se tivo en conta o establecido na Lei 3/2007, do 9 de abril, de prevención e defensa contra os incendios forestais de Galicia, polo que non se inclúen as afeccións que se establecen nesta lei. Esta cuestión tampouco se tivo en conta nos informes emitidos sobre o impacto ambiental, cultural e turístico.
– Dado que a aplicación da Lei 3/2007, do 9 de abril, supón o establecemento de limitacións sobre as parcelas que se ven afectadas pola xestión da biomasa, deberíase ter en conta esta circunstancia no proxecto técnico e os propietarios deberían ser incluídos na relación de bens e dereitos afectados (RBDA). Vulnerouse o trámite de audiencia respecto a estes propietarios posto que non foron notificados da información pública.
– Solicitan que se denegue a declaración de utilidade pública e as autorizacións administrativas e que a promotora formule unha nova solicitude adaptando o proxecto á Lei 3/2007, do 9 de abril.
Sétimo. O 22.5.2018, a xefatura territorial informou que a poligonal do parque eólico non se atopa afectada por ningún dereito mineiro vixente.
Oitavo. O 25.6.2018, o Servizo de Montes da Coruña informou que non se prevén afeccións derivadas da execución do proxecto do parque eólico a montes catalogados de utilidade pública, montes veciñais en man común, montes de xestión pública, infraestruturas forestais relevantes, masas de especial valor de frondosas autóctonas, rodais selectos ou parcelas de experimentación.
Noveno. O 26.10.2018, a xefatura territorial remitiu o expediente do parque eólico á Dirección Xeral de Enerxía e Minas para continuar coa tramitación do procedemento.
Décimo. O 23.4.2019, a Asociación de Veciños Eduardo Pondal solicitou que se considerase desistida de todas as alegacións formuladas en relación co expediente de referencia.
Décimo primeiro. O 24.5.2019, publícase no DOG unha corrección do erros do Acordo do 21 de marzo de 2018, da xefatura territorial, en que se corrixe a coordenada Y do aeroxerador CO.6 do P.E. Corme modificación substancial, onde di «4.792.477», debe dicir «4.792.447».
Décimo segundo. O 27.5.2019, a Asociación de Veciños Eduardo Pondal presentou un escrito en que manifestou a súa oposición ao proxecto eólico.
Décimo terceiro. O 12.6.2019, o órgano ambiental formulou a declaración de impacto ambiental relativa ao parque eólico, que se fixo pública por medio do Anuncio do 14 de xuño de 2019, da Dirección Xeral de Calidade Ambiental e Cambio Climático (DOG núm. 122, do 28 de xuño).
Décimo cuarto. O 18.7.2019, a Dirección Xeral de Ordenación do Territorio e Urbanismo emitiu o informe a que fai referencia o artigo 13.3 do Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal en relación co proxecto sectorial do parque eólico Corme modificación substancial (repotenciación do parque eólico Corme G-3), no cal o dito organismo informa que se seguiron os trámites establecidos no Decreto 80/2000, do 23 de marzo.
Décimo quinto. Pola Resolución do 16 de setembro de 2019, da Dirección Xeral de Enerxía e Minas, outorgáronse as autorizacións administrativas previa e de construción ao parque eólico Corme modificación substancial (repotenciación do parque eólico Corme G-3), sito no concello de Ponteceso (A Coruña) e promovido por EDP Renovables España, S.L.U. (DOG núm. 204, do 25 de outubro), coa súa corrección de erros da coordenada X do vértice 4 da poligonal do P.E. Corme modificación substancial, onde di «502.225», debe dicir «502.255» (DOG núm. 88, do 8 de maio).
Décimo sexto. Pola Resolución do 21 de novembro de 2019, da Dirección Xeral de Enerxía e Minas, fíxose público o Acordo do Consello da Xunta de Galicia, do 7 de novembro de 2019, polo que se aproba definitivamente o proxecto do parque eólico Corme modificación substancial (repotenciación do parque eólico Corme G-3) como proxecto sectorial de incidencia supramunicipal, así como das disposicións normativas contidas no mencionado proxecto (DOG núm. 38, do 26 de febreiro de 2020).
Décimo sétimo. O 18.11.2019, José Ramón Dourado Lema presentou no Rexistro Xeral da Xunta de Galicia na Coruña dous escritos en que solicitou que esta Administración e ao abeiro do disposto no artigo 95 da Lei 39/2015, do 1 de outubro, declare a caducidade do procedemento da declaración da utilidade pública do parque eólico Corme modificación substancial.
Décimo oitavo. O 19.11.2019, José Ramón Dourado Lema presentou no Rexistro Xeral da Xunta de Galicia na Coruña un escrito de Luis Manuel Moreira Varela e outro de Ángel Santiago Suárez Baneira, en que solicitan que esta Administración e ao abeiro do disposto no artigo 95 da Lei 39/2015, do 1 de outubro, declare a caducidade do procedemento da declaración da utilidade pública do parque eólico Corme modificación substancial.
Décimo noveno. O 12.2.2020, a Dirección Xeral de Enerxía e Minas desestimou as solicitudes de declaración de caducidade do procedemento da declaración da utilidade pública do parque eólico Corme modificación substancial, a que se fai referencia nos dous antecedentes de feito anteriores.
Vixésimo. O 5.12.2019, o 20.1.2020, o 24.2.2020 e o 6.3.2020, como consecuencia das negociacións e acordos acadados con algunhas das persoas afectadas, a promotora actualizou a relación de bens e dereitos afectados (RBDA).
Vixésimo primeiro. O 23.3.2020, esta dirección xeral requiriulle á promotora unha copia de cada un dos acordos asinados cos propietarios das parcelas que figuraban na publicación no Diario Oficial de Galicia do 5 de abril de 2018 e que se suprimiron na última RBDA presentada o 6.3.2020.
Vixésimo segundo. O 24.3.2020, tivo entrada nesta dirección xeral unha solicitude de certificado por silencio administrativo relativa á declaración de utilidade pública do parque eólico Corme modificación substancial, presentada pola Asociación de Veciños Eduardo Pondal.
Vixésimo terceiro. O 3.4.2020, EDP Renovables España, S.L.U. presentou copia dos acordos requiridos.
Vixésimo cuarto. O 14.4.2020, esta dirección xeral solicitoulle á promotora aclaracións con respecto aos acordos presentados.
Vixésimo quinto. O 17.4.2020, EDP Renovables España, S.L.U. presentou as aclaracións requiridas a que se fai referencia no antecedente de feito anterior.
Fundamentos de dereito:
Primeiro. A Dirección Xeral de Enerxía e Minas é competente para resolver este procedemento con fundamento no Decreto 135/2017, do 28 de decembro, polo que se establece a estrutura orgánica da Consellería de Economía, Emprego e Industria, e no artigo 44.1 da Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental, modificada pola Lei 5/2017, do 19 de outubro, de fomento da implantación de iniciativas empresariais en Galicia.
Segundo. No expediente instruído para o efecto cumpríronse os trámites de procedemento establecidos na Lei 24/2013, do 26 de decembro, do sector eléctrico, no Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, na Lei 8/2009, do 22 de decembro, pola que se regula o aproveitamento eólico en Galicia e se crean o canon eólico e o Fondo de Compensación Ambiental, modificada pola Lei 5/2017, do 19 de outubro, na Lei 39/2015, do 1 de outubro, do procedemento administrativo común das administracións públicas, e demais normas vixentes de aplicación.
Terceiro. En relación coas alegacións presentadas durante a tramitación do expediente, visto o seu contido e as respostas efectuadas pola promotora, cómpre manifestar o seguinte:
1. No que respecta ás alegacións referidas aos bens e dereitos afectados, tomouse razón de todas as manifestacións e documentos achegados polas persoas alegantes, relativas á titularidade e ás características dos bens e dereitos afectados, así como á magnitude das afeccións. Non obstante, corresponde á fase de levantamento de actas previas, dentro do eventual procedemento expropiador, a determinación efectiva da titularidade dos bens e dereitos afectados e das súas características (localización, extensión, tipo de aproveitamento, ...), así como das afeccións reais do proxecto sobre eles.
2. Para aquelas parcelas sobre as cales non se acadou acordo coas persoas propietarias, as cales se indican no anexo II desta resolución, no caso de que non se chegase a un acordo entre a promotora eólica e os afectados durante o procedemento expropiador, fixaranse as compensacións correspondentes de acordo coa lexislación aplicable.
3. En relación co anterior, e en resposta ás alegacións en que se pon de manifesto que se pretende declarar a utilidade pública sobre terreos en que a promotora xa ten subscritos acordos, cómpre manifestar que a promotora acadou acordos para 244 parcelas que se incluíron no anexo do Acordo do 21 de marzo de 2018, da xefatura territorial (DOG núm. 66, do 5 de abril), polo que esta resolución se aplicará á RBDA definitiva indicada no anexo II.
En relación coas alegacións en que se solicita a caducidade do procedemento de declaración de utilidade pública, cómpre manifestar, en primeiro lugar, que a solicitude de autorización administrativa previa e de construción e a correspondente á declaración de utilidade pública non foron simultáneas, tal e como queda acreditado nos antecedentes de feito segundo e terceiro desta resolución.
Por outra parte, a Lei 8/2009, do 22 de decembro, en que se regula o outorgamento das autorizacións administrativas previa e de construción, así como a declaración de utilidade pública, regula de forma independente estes procedementos, con excepción do que se refire ao trámite de información pública, para o cal prevé, no seu artigo 33.8, que se efectúe de forma simultánea no caso de que a promotora solicitase a declaración de utilidade pública, en concreto, xunto coas mencionadas autorizacións administrativas.
Tendo en conta estas cuestións, considérase que a normativa de aplicación permite resolver de forma independente os procedementos de autorización administrativa previa e de construción e o de declaración de utilidade pública.
4. No que respecta ao prazo correspondente ao trámite de información pública, cómpre manifestar que a promotora se acolleu á tramitación do expediente do parque eólico, conforme a disposición transitoria terceira da Lei 5/2017, do 19 de outubro, e que o Consello da Xunta de Galicia declarou, o 15.2.2018, o proxecto do parque eólico como de interese especial, para os efectos do establecido na disposición adicional primeira da Lei 8/2009, do 22 de decembro.
De acordo con todo o que antecede, e no exercicio das competencias que teño atribuídas,
RESOLVO:
Único. Declarar a utilidade pública, en concreto, das instalacións do parque eólico Corme modificación substancial (repotenciación parque eólico Corme), sito no concello de Ponteceso (A Coruña), segundo o previsto nos artigos 54 e 56 da Lei 24/2013, do 26 de decembro, do sector eléctrico, o que leva implícita a necesidade de ocupación dos bens ou de adquisición dos dereitos afectados e implica a urxente ocupación para os efectos do artigo 52 da Lei de expropiación forzosa do 16 de decembro de 1954 (BOE núm. 351, do 17 de decembro).
Esta resolución publicarase no Diario Oficial de Galicia e no Boletín Oficial da provincia da Coruña, de acordo co establecido no artigo 148 do Real decreto 1955/2000, do 1 de decembro.
Contra a presente resolución, que non é definitiva en vía administrativa, poderase interpoñer recurso de alzada ante o conselleiro de Economía, Emprego e Industria da Xunta de Galicia, no prazo dun mes contado a partir do día seguinte ao da súa notificación, de conformidade cos artigos 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpoñer calquera outro recurso que consideren pertinente.
Santiago de Compostela, 15 de maio de 2020
Ángel Bernardo Tahoces
Director xeral de Enerxía e Minas
ANEXO I
Alegacións presentadas durante a tramitación do procedemento:
Manuela Martínez Méndez, o 17.4.2018; Agustín Blanco Blanco, o 18.4.2018; José Figueroa Neira, o 18.4.2018; José Novo Méndez, o 19.4.2018; Rocas Ornamentales Torres de Mens, S.L., o 20.4.2018; Mª Ángeles Martínez Ouréns, o 20.4.2018; Luis García Lema, o 20.4.2018; Axencia Galega de Infraestruturas, o 23.4.2018; Manuel Cousillas Veiga, o 24.4.2018; Josefa Baneira Torrado, o 24.4.2018 e o 27.6.2018; Manuel Varela García, o 26.4.2018; Asociación de Veciños Eduardo Pondal, o 26.4.2018, o 20.9.2018, o 2.10.2018 e o 25.10.2018; Asociación de afectados polos parques eólicos Fonte do Xardín, o 26.4.2018; Jesús Castro Castro, o 27.4.2018; hdros. de Rosa Camiño Méndez, o 27.4.2018; hdros. de Dolores Méndez Ouréns, o 27.4.2018; hdros. de Serafina Alvarellos Nuñel, o 27.4.2018; Perfecto Pose Nuñel, o 27.4.2018; Eliseo Varela Recarey, o 27.4.2018; hdros. de Etelvina Chans Fuentes, o 27.4.2018; Modesto José Martínez Figueiras, o 27.4.2018; Estrella Méndez Puñal, o 27.4.2018; hdros. de Josefa Suárez Lema, o 27.4.2018; Serafina Alvarellos Nuñel, o 27.4.2018; Antonio García Martínez e Manuel García Martínez, o 27.4.2018; María Méndez Ouréns, o 27.4.2018; hdros. de Rosa Méndez Ouréns, o 27.4.2018; hdros. de Perfecto Pose Nuñel, o 27.4.2018; Estrella Méndez Puñal, o 27.4.2018; Josefa Cotelo Ouréns, o 27.4.2018; hdros. de José M. Centeno Doldán, o 27.4.2018; José Doldán Varela e Dolores Álvarez Martínez, o 27.4.2018; hdros. de Serafín Lema Pose, o 27.4.2018; Josefa Chans Camiño, o 27.4.2018; Rafael Varela Chans, o 27.4.2018; Carmen Varela Varela, o 27.4.2018; Josefa Baneira Varela, o 27.4.2018; María Luz Varela Varela, o 27.4.2018; Eduarda Celia Nuñel Pérez, o 27.4.2018; Adolfo Alvarellos Blanco, Jesús Alvarellos Blanco e Manuel Alvarellos Blanco, o 27.4.2018; Carmen Méndez Chans, o 27.4.2018; Ramona Doldán Puñal, o 27.4.2018; Francisco Gómez Doldán, o 27.4.2018; Jesús Martínez Puñal, o 27.4.2018; Estrella Nuñel Méndez e Mª Carmen e Andrea, o 27.4.2018; Jesús Martínez Lema, José Martínez Lema, María Jesús Martínez Lema, Manuel Martínez Lema e Ramón Martínez Lema, o 27.4.2018; Ignacio Cereijo Rial, o 27.4.2018; Dolores García Lorenzo, o 27.4.2018; María Dolores Facal Méndez, o 27.4.2018; Carmen Andrade Villanueva, Celia Villanueva Martelo e outros, o 27.4.2018; María Estrella García Méndez, o 27.4.2018; José Doldán Varela, o 27.4.2018; hdros. de Francisco Carrillo Antelo, o 27.4.2018; Basilio Baña Vila e Erundina Alvarellos Pailos, o 27.4.2018; Andrea Blanco Puñal, María Silvia Blanco Medina e Daniel Blanco Medina, o 27.4.2018; Erundina Alvarellos Pailos, o 27.4.2018; hdros. de José Méndez Méndez, o 27.4.2018; Manuel Méndez Méndez, o 27.4.2018; hdros. de Jesús Méndez Méndez, o 27.4.2018; Estrella Ouréns Torrado, o 27.4.2018; Luis Manuel Moreira Varela, o 27.4.2018; hdros. de Josefa Lema Rey, o 27.4.2018; Josefa Lema Gómez, o 27.4.2018; José Nuñel Blanco, o 27.4.2018; Jesús Cruz Camiño, o 27.4.2018; hdros. de Gervasio García Serantes, o 27.4.2018; hdros. de José Lema Castro, o 27.4.2018; Mª del Carmen Lema Varela, o 27.4.2018; Cecilia Martelo Villanueva, Lucinda Andrade Villanueva e Carmen Andrade Villanueva, o 27.4.2018; hdros. de Carmen Ferreiro Costa, o 27.4.2018; Centeno Souto, o 27.4.2018; Manuel Ouréns Figueira, o 27.4.2018; Irmáns Gómez Collazo, o 27.4.2018; hdros. de José Antonio Ferreiro Centeno, o 27.4.2018; hdros. de Rosa Pasandín Ferreiro, o 27.4.2018; Manuela Cotelo Méndez, o 27.4.2018; Rosa Castro Lema, o 27.4.2018; Manuela Castro Pailos, o 27.4.2018; hdros. de Carmen Chans Camiño, o 27.4.2018; Dolores Lema Gómez, o 27.4.2018; Carmen Camiño Antelo, o 27.4.2018; Áurea Ouréns Saleta, o 27.4.2018; Eduardo José Lema Camiño, o 27.4.2018; M. Rosa Blanco Camiño, o 27.4.2018; hdros. de Manuel Fariña García, o 27.4.2018; Dolores Ouréns Figueira, o 27.4.2018; Avelina Puñal Pailos, o 27.4.2018; Manuel Varela Suárez e Antonio Varela Suárez, o 27.4.2018; Nieves García Álvarez, no nome de hdros. de Gervasio García Serantes, o 3.5.2018; Ignacio Rial Cereijo, o 3.5.2018; Manuel Pose Carneiro, o 3.5.2018; Rosa Méndez López, o 4.9.2018; Jesús Ramón Suárez Torrado, o 4.5.2018; Manuel Enrique Suárez Torrado, o 4.5.2018; Manuel Ferreiro García, no nome de hdros. de Jesusa García Moreira, o 5.5.2018; Emilia Blanco Ferreiro, Perfecto Blanco Ferreiro, Teresa Blanco Ferreiro, Andrea Blanco Puñal, Demetrio Blanco Puñal e Manuel Blanco Puñal, o 5.9.2018; Dolores Ouréns Torrado, o 5.9.2018; Ángela Varela Souto, o 5.9.2018; hdros. de Julio Figueroa Neira, o 5.9.2018; José Mª Cousillas Pailos, o 5.9.2018; Joaquín Pombo Chans, o 5.9.2018; Josefa Ouréns Torrado, o 5.9.2018; José Ouréns Torrado, o 5.9.2018; Manuel Castro Calvo, Jesús Ouréns Calvo, José M. Ouréns Calvo, Josefa Ouréns Calvo, Natalia Ouréns Calvo, Teresa Ouréns Calvo, Manuel V. Ouréns Torrado, Cesareo Ouréns Varela e Serafín Ouréns Varela o 5.9.2018; Manuel Castro Calvo, Jesús Ouréns Calvo, José M. Ouréns Calvo, Josefa Ouréns Calvo, Natalia Ouréns Calvo, Julio Ouréns Calvo, Manuela Ouréns Calvo, o 5.9.2018; Adelaida Centeno Doldán, o 7.5.2018; Teresa Moreira Varela, o 8.5.2018; hdros. de Ramón Torrado Baña, o 10.5.2018; Jesús Puñal Méndez, o 23.8.2018; Manuel Puñal Méndez, o 23.8.2018; BNG de Ponteceso, o 12.11.2018; Asociación para a Defensa Ecolóxica de Galiza, o 13.11.2018; José Ramón Dourado Lema, o 5.12.2018 e o 7.1.2019.