Visto o expediente para outorgamento da autorización administrativa previa e de construción da instalación eléctrica que a seguir se describe:

– Solicitante: Eléctrica de Valdriz, S.L.

– Denominación: desvio de instalacións eléctricas pola construción de senda na LU-621.

– Situación: concello de Láncara.

– Características técnicas:

• Liña aérea de alta tensión a CT Bombeo (zona 1), con orixe no apoio existente nº 2 da derivación a CT Bombeo e final no apoio proxectado nº 3, cunha lonxitude de 74 metros en condutor LA-56.

• Liña aérea de alta tensión Pobra (zona 2), con orixe no apoio proxectado nº 1 e final no apoio existente nº 2, cunha lonxitude de 137 metros en condutor LA-56.

• Liña soterrada de alta tensión a CT Bombeo (zona 1), con orixe no apoio proxectado nº 3 e final no CT Bombeo existente, cunha lonxitude de 60 metros en condutor RHZ1-150.

• Liña soterrada de alta tensión Pobra (zona 2), con orixe nunha cela da liña da Central Hidroeléctrica e final no apoio proxectado nº 1, cunha lonxitude de 110 metros en condutor RHZ1-240.

• Liña aérea de baixa tensión do CT Bombeo, con orixe no CT Bombeo, cunha lonxitude de 30 metros en condutor RZ-25.

Cumpridos os trámites ordenados na Lei 24/2013, do 26 de decembro (BOE núm. 310), do sector eléctrico, e no título VII, capítulo II, do Real decreto 1955/2000, do 1 de decembro (BOE núm. 310), polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, no Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias, e na Resolución do 19 de febreiro de 2014, da Dirección Xeral de Enerxía e Minas, pola que se aproba o procedemento de autorización administrativa de construción (DOG núm. 54, do 19 de marzo), así como na Lei 5/2017, do 19 de outubro, de fomento da implantación de iniciativas empresariais en Galicia, esta xefatura territorial, de acordo coas competencias que resultan dos decretos 135/2017, do 28 de decembro, polo que se crea e establece a estrutura orgánica da consellería, e tendo en conta o Decreto 9/2017, do 12 de xaneiro, sobre órganos competentes para autorización de instalacións eléctricas na Comunidade Autónoma de Galicia, resolve:

Conceder a autorización administrativa previa e de construción ás ditas instalacións, cuxas características se axustarán en todas as súas partes ás que figuran no seu proxecto e ás condicións técnicas e de seguridade establecidas nos regulamentos de aplicación e nos condicionados establecidos polos ministerios, organismos ou corporacións que constan no expediente, independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.

O prazo de posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.

Contra esta resolución poderase interpor recurso de alzada ante o conselleiro de Economía, Emprego e Industria no prazo dun mes, a partir do día seguinte ao da notificación ou publicación desta resolución; tamén se poderá interpor calquera outro recurso que se conisidere pertinente en dereito.

De conformidade co establecido na disposición adicional oitava do Real decreto lei 11/2020, do 31 de marzo, polo que se adoptan medidas urxentes complementarias no ámbito social e económico para facer fronte ao COVID-19, o referido prazo para a interposición do recurso, segundo o disposto na resolución, computarase desde o día seguinte hábil á data de finalización da declaración do estado de alarma, con independencia do tempo que transcorrese desde a notificación da actuación administrativa obxecto do recurso ou impugnación con anterioridade á declaración do estado de alarma.

O antedito enténdese sen prexuízo da eficacia e executividade do acto administrativo obxecto de recurso ou impugnación.

Lugo, 25 de maio de 2020

Pilar Fernández López
Xefa territorial de Lugo