A Resolución do 12 de marzo de 2020, da Secretaría Xeral Técnica da Consellería de Presidencia, Administracións Públicas e Xustiza, pola que se dá publicidade do Acordo do Consello da Xunta de Galicia, do 12 de marzo de 2020, polo que se aproba o Protocolo de actuación para o persoal empregado público da Administración da Xunta de Galicia en relación co coronavirus COVID-19, establece no punto 6 do seu anexo o seguinte: «O órgano convocante de cada proceso selectivo en curso deberá pospor, polo tempo imprescindible –como mínimo dous meses– a realización de probas selectivas, especialmente aquelas de concorrencia masiva».

Por outra banda, é una recomendación das autoridades das diferentes comunidades autónomas á cidadanía evitar as viaxes que non sexan necesarias.

Tendo en conta que a Consellería do Mar, a través da Dirección Xeral de Desenvolvemento Pesqueiro, preveu realizar probas selectivas para a obtención das titulacións de embarcacións de recreo e que ás ditas probas pode concorrer un número importante de persoas aspirantes, moitos das cales se desprazan desde diversas poboacións da Comunidade Autónoma de Galicia e doutras comunidades autónomas, esta dirección xeral, en uso das funcións atribuídas no Decreto 168/2015, do 15 de novembro,

ACORDA:

Primeiro. Suspender a realización das probas polas que se convocan exames extraordinarios teóricos co fin de obter as titulacións que habilitan para o goberno das embarcacións de lecer na Comunidade Autónoma de Galicia da convocatoria de marzo.

Segundo. Trasladar as solicitudes de participación nas ditas probas á seguinte convocatoria programada ou para algunhas das restantes convocatorias ordinarias ou extraordinarias que se van realizar durante o ano 2020, que se indican na Resolución do 3 de febreiro de 2020, da Dirección Xeral de Desenvolvemento Pesqueiro, pola que se convocan exames ordinarios teóricos e prácticos para a obtención das titulacións que habilitan para o goberno das embarcacións de lecer e motos náuticas na Comunidade Autónoma de Galicia (DOG núm. 30, do 13 de febreiro) ou na Resolución do 3 de febreiro de 2020, da Dirección Xeral de Desenvolvemento Pesqueiro, pola que se convocan exames extraordinarios teóricos para a obtención das titulacións que habilitan para o goberno das embarcacións de lecer na Comunidade Autónoma de Galicia (DOG núm. 29, do 12 de febreiro).

As persoas interesadas terán que indicarlles aos centros de ensino náutico-pesqueiros onde se realicen as probas a convocatoria en que queiran participar.

Terceiro. As persoas interesadas que non queiran participar en ningunha das convocatorias restantes poderán solicitar a devolución da correspondente taxa.

Cuarto. A presente resolución entrará en vigor o mesmo día da súa publicación no Diario Oficial de Galicia.

Santiago de Compostela, 16 de marzo de 2020

Susana Rodríguez Carballo
Directora xeral de Desenvolvemento Pesqueiro