Antecedentes:
Mediante a Resolución da Dirección da Axencia Galega de Infraestruturas do 30 de xaneiro de 2020 aprobouse provisionalmente o proxecto de construción da senda na AC-424, pp.qq. 1+150-1+400 (O Couto), de clave AC/19/073.06.
O artigo 6.2 da Lei 8/2013, do 28 de xuño, de estradas de Galicia, e o artigo 12.2 do Decreto 66/2016, do 26 de maio, polo que se aproba o Regulamento xeral de estradas de Galicia, determinan que os espazos destinados a sendas para peóns ou para a circulación de ciclistas teñan a consideración de elementos funcionais da estrada. Tendo en conta este precepto, a Xunta Galicia elaborou a Estratexia en materia de mobilidade alternativa de Galicia, entre cuxos obxectivos está o fomento dos sistemas de transporte alternativos aos motorizados que permitan minimizar as repercusións sobre o ambiente e os seus impactos sociais e económicos.
Este proxecto ten por obxecto a execución dunha senda peonil e ciclista continua por ambas as marxes da estrada AC-424, que fomente a mobilidade alternativa, mellore a seguridade viaria na contorna do núcleo do Couto e continúe a senda existente desde o núcleo de Ponteceso ata o p.q. 1+140, coas seguintes características:
1. Senda da marxe dereita da AC-424: inicia no p.q. 1+100 ata o 1+380.
2. Senda da marxe esquerda da AC-424: inicia no p.q. 1+140, dá continuidade á senda existente e remata no p.q. 1+378.
O escaso espazo dispoñible e a necesidade de executar a senda por ambas as marxes (por estaren ambas densamente poboadas) supón que se teñan que executar as seguintes actuacións complementarias:
1. Estreitamento da calzada existente na travesía do Couto: redúcese de 7 m a 6 m, mantendo as beirarrúas de 0,5 m.
2. Canalización da drenaxe da calzada e das marxes mediante un colector baixo as sendas.
3. Redución do largo das sendas ata os 1,5 m (1,2 m onde sexa necesario) para evitar a afección a vivendas e/ou peches con protección arquitectónica.
Outras actuacións complementarias para executar son:
1. A revisión da sinalización na contorna do p.q. 1+490 e da curva posterior.
2. A execución de zonas para aparcamento de vehículos na marxe dereita, entre os pp.qq. 1+300 e 1+340.
3. Reforzo do firme coa renovación da rodadura na zona de travesía, entre os pp.qq. 1+090 e 1+550.
Considerando todo o exposto e o establecido na normativa vixente,
RESOLVO:
Primeiro. De acordo co establecido no artigo 21.1 da Lei 8/2013, do 28 de xuño, de estradas de Galicia, e no artigo 50 do Decreto 66/2016, do 26 de maio, polo que se aproba o Regulamento xeral de estradas de Galicia, o mencionado proxecto de trazado sométese ao trámite de información pública durante un período de trinta (30) días hábiles, contados a partir do seguinte ao da publicación deste anuncio no Diario Oficial Galicia, para que as persoas que o consideren oportuno poidan formular por escrito, ante a Axencia Galega de Infraestruturas, as observacións que crean convenientes relativas á concepción global do trazado deseñado.
Segundo. Que, simultaneamente ao trámite sinalado no parágrafo anterior e para os efectos previstos no artigo 56.1 do Decreto do 26 de abril de 1957, polo que se aproba o Regulamento de expropiación forzosa, se somete á información pública a relación individual de bens, dereitos e propietarios afectados pola realización da obra correspondente, para que os afectados presenten cantas alegacións ou rectificacións consideren convenientes en canto aos bens e dereitos descritos na relación anexa.
Terceiro. A exposición ao público, para os efectos da presente resolución, realízase na Axencia Galega de Infraestruturas (San Caetano, s/n, 15781 Santiago de Compostela), no Servizo de Infraestruturas da Coruña (rúa Vicente Ferrer, 2, 15008 A Coruña), na Casa do Concello de Ponteceso (Concello 18, 15110 Ponteceso, A Coruña). Así mesmo, na páxina web da Consellería de Infraestruturas e Mobilidade (https://infraestruturasemobilidade.xunta.gal/organizacion/c/CIV_Axencia_Galega_de_Infraestruturas), atópase á disposición dos interesados o documento completo do proxecto de construción.
Santiago Compostela, 30 de xaneiro de 2020
Francisco Menéndez Iglesias
Director da Axencia Galega Infraestruturas
