O Concello de Vilanova de Arousa remite a documentación relativa á modificación puntual referida, para a súa aprobación definitiva, conforme o previsto nos artigos 60.13 e 60.16 da Lei 2/2016, do 10 de febreiro, do solo de Galicia (LSG) e os artigos 144.13 e 144.16 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia (RLSG).

Unha vez analizada a documentación achegada, con dilixencia de terse aprobado provisionalmente mediante o Acordo do Pleno do 30.9.2019, e vista a proposta literal que eleva a Dirección Xeral de Ordenación do Territorio e Urbanismo, resulta:

I. Antecedentes.

I.1. O Concello de Vilanova de Arousa conta cunhas normas subsidiarias de planeamento (NNSSP) aprobadas definitivamente o 14.3.1997 (DOG do 28 de maio de 1997 e BOP do 5 de maio).

I.2. Mediante a Resolución do 24 de xullo de 2017, a Dirección Xeral de Calidade Ambiental e Cambio Climático formulou o informe ambiental estratéxico desta modificación puntual (MP) (DOG do 31 de agosto de 2017, expediente 2017AAE2032 e código 1943/2017) en que resolveu non someter a modificación ao procedemento de avaliación ambiental estratéxica ordinaria.

I.3. Constan informes técnicos municipais dos días 19.7.2018 e 5.12.2018; o informe xurídico do 5.12.2018 e o informe de intervención do 5.12.2018.

I.4. A modificación puntual foi aprobada inicialmente polo Pleno municipal na sesión do 13.12.2018 e expúxose ao público polo prazo de dous meses, mediante a publicación no DOG do 17 de xaneiro de 2019 e nun xornal o día 31.1.2019. Consta certificado do secretario municipal, do 12.6.2019, das alegacións achegadas nese prazo.

I.5. Segundo o establecido no artigo 60.7 da LSG, foron solicitados informes sectoriais ao Instituto de Estudos do Territorio (consta o Informe do 5.4.2019), á Dirección Xeral de Calidade Ambiental e Cambio Climático en materia de residuos (Informe do 6.2.2019), a Augas de Galicia (Informe do 24.4.2019), á Axencia Galega de Infraestruturas (informes do 20.3.2019 e 21.3.2019), á Deputación de Pontevedra (Acordo da Xunta de Goberno do 29.3.2019), á Dirección Xeral de Patrimonio Cultural (informes do 14.6.2019 e do 25.11.2019) e déuselle traslado á Dirección Xeral de Emerxencias e Interior o 24.1.2019. Non foi recibida contestación á solicitude de informe da Secretaría Xeral Técnica da Consellería de Economía, Emprego e Industria.

Déuselles audiencia aos concellos limítrofes de Caldas de Reis, Cambados, Meis, Portas, Ribadumia e Vilagarcía de Arousa e non se recibiu a súa resposta.

I.6. O Concello de Vilanova de Arousa solicitou informe á Subdelegación do Goberno (que remite o Informe da Unidade de Estradas do Estado do 5.2.2019 e do Servizo Provincial de Costas do 5.2.2019) ao Ministerio de Economía e Empresa (consta o Informe da Dirección Xeral de Telecomunicacións e Tecnoloxías da Información do 16.1.2019), á Deputación de Pontevedra, á Dirección Xeral de Patrimonio Cultural, á Consellería do Medio Rural (consta o Informe do 8.3.2019), a Augas de Galicia, á Dirección Xeral de Ordenación do Territorio e Urbanismo (constan informes do 1.3.2019 e 12.11.2019 en materia de costas), ao Ministerio para a Transición Ecolóxica (constan informes do 17.11.2017 e 5.2.2019), á Dirección Xeral de Calidade Ambiental e Cambio Climático, ao Instituto de Estudos do Territorio, á Dirección Xeral de Emerxencias e Interior (consta informe do 21.1.2019), á Consellería de Economía, Emprego e Industria e á Axencia Galega de Infraestruturas.

I.7. Constan o Informe técnico municipal favorable e o Informe xurídico do 4.9.2019, o Informe de Intervención do 20.5.2019 e o Informe do secretario do 9.9.2019.

I.8 O Pleno do Concello aproba provisionalmente a modificación puntual en sesión do 30.9.2019, que é remitida á Xunta de Galicia segundo o establecido no artigo 60 da LSG.

II. Obxecto da modificación puntual.

O obxecto da modificación puntual simplificouse respecto do previsto no borrador sometido a consultas na fase de avaliación ambiental, reducíndose a unha as tres propostas de modificacións previstas inicialmente, nomeadamente a reclasificación como solo urbano consolidado dunha zona clasificada nas normas subsidiarias como solo non urbanizable común (SNUC), integrada na zona norte do polígono industrial de Tremoedo e que linda polo norte coa estrada EP-9703 e polo sur, leste e oeste co polígono industrial.

O ámbito da modificación puntual abarca unha superficie de 5 193,67 m², de forma sensiblemente rectangular, que se desenvolverá mediante as condicións da Ordenanza 7. Solo urbano mixto industrial, residencial e comercial das NNSS vixentes.

III. Análise e consideracións.

III.1. As razóns de interese público exixidas no artigo 83.1 da LSG para a modificación do planeamento urbanístico xustifícanse con base na conveniencia de adaptar a clasificación do solo establecida nas NNSS á realidade existente e ao disposto na LSG, emendar erros e contradicións existentes nas NNSS no que ao ámbito de actuación se refire e dar resposta á necesidade municipal de ampliar o polígono industrial de Tremoedo.

III.2. Nos informes sectoriais recadados non se manifestaron obxeccións ao documento da modificación puntual, e aqueles que estaban condicionados foron cumpridos tras emendar as cuestións indicadas neles.

A competencia para resolver sobre a aprobación definitiva do planeamento xeral corresponde á conselleira de Medio Ambiente, Territorio e Vivenda, de conformidade co disposto nos artigos 60, 61.1, 83.5 da LSG e nos artigos 146.1 e 200.5 do RLSG, en relación co Decreto 42/2019, do 28 de marzo, polo que se establece a estrutura orgánica desta consellería.

IV. Resolución.

En consecuencia, e visto o que antecede,

RESOLVO:

1. Outorgar a aprobación definitiva á modificación puntual número 20 das normas subsidiarias de planeamento municipal do Concello de Vilanova de Arousa.

2. De conformidade co artigo 88 da Lei 2/2016, do 10 de febreiro, do solo de Galicia, e co artigo 212.1 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, a Dirección Xeral de Ordenación do Territorio e Urbanismo inscribirá de oficio a modificación puntual do Plan xeral de ordenación municipal no Rexistro de Planeamento Urbanístico de Galicia.

3. De conformidade co disposto polos artigos 82 e 88.4 da Lei 2/2016, do 10 de febreiro, do solo de Galicia, e 70 da Lei 7/1985, do 2 de abril, reguladora das bases do réxime local, o Concello deberá publicar no Boletín Oficial da provincia a normativa e as ordenanzas da modificación aprobada definitivamente, unha vez inscrita no Rexistro de Planeamento Urbanístico.

4º. Notifíquese esta orde ao Concello.

5º. Contra esta orde cabe interpoñer recurso contencioso-administrativo, ante a sala correspondente do Tribunal Superior de Xustiza de Galicia, no prazo de dous meses que se contarán desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 10 de xaneiro de 2020

Ángeles Vázquez Mejuto
Conselleira de Medio Ambiente, Territorio e Vivenda