Mediante a Resolución do 2 de xullo de 2018, esta Secretaría Xeral Técnica convocou o concurso público para a adxudicación de novas oficinas de farmacia. O punto segundo da citada resolución establece que a súa tramitación se rexerá polo disposto nos artigos 22 e seguintes do Decreto 146/2001, do 7 de xuño, sobre planificación, apertura, traslado, peche e transmisión de oficinas de farmacia.
Así as cousas, o pasado sábado 18 de xaneiro de 2020 tivo lugar, logo de aprobarse a lista definitiva de puntuacións obtidas polas persoas participantes no concurso, o acto público de elección de oficinas de farmacia, ao cal foran convocadas, mediante a Resolución do 11 de decembro de 2019, todas as persoas participantes que figuraban na citada lista.
Xa que logo, á vista do resultado do acto de elección e do contido da acta redactada para o efecto, e de conformidade co disposto no artigo 25.ter do Decreto 146/2001, do 7 de xuño, esta secretaría xeral técnica
RESOLVE:
Primeiro. Aprobar a lista provisional de persoas adxudicatarias no concurso público para a adxudicación de novas oficinas de farmacia.
A citada lista, que contén tamén a delimitación territorial da oficina de farmacia elixida por cada unha delas, poderá ser consultada na páxina web oficial da Consellería de Sanidade (www.sergas.es) desde o mesmo día da publicación da presente resolución no Diario Oficial de Galicia.
Segundo. Consonte o sinalado no número 2 do artigo 25.ter do Decreto 146/2001, do 7 de xuño, os/as farmacéuticos/as que resultasen adxudicatarios/as provisionais disporán dun prazo de dez (10) días hábiles, contados a partir do día seguinte ao de publicación da presente resolución no Diario Oficial de Galicia, para acreditar documentalmente ter constituída garantía suficiente para cubrir o importe de 3.000 €, en calquera das formas sinaladas no citado precepto.
A documentación xustificativa da constitución da dita garantía deberá ser remitida a esta secretaría xeral técnica por vía electrónica, a través do modelo xenérico denominado «achega de documentación separada da solicitude», o cal se atopa dispoñible na sede electrónica da Xunta de Galicia, https://sede.xunta.gal. Para a presentación da devandita documentación poderá empregarse calquera dos mecanismos de identificación e sinatura admitidos pola sede electrónica da Xunta de Galicia, incluído o sistema de usuario e clave Chave 365 (https://sede.xunta.gal/chave365).
De non constituírse a preceptiva garantía no prazo indicado, os/as adxudicatarios/as provisionais quedarán excluídos do procedemento, e procederase de acordo co sinalado no número 3 do artigo 25.ter do Decreto 146/2001, do 7 de xuño.
Santiago de Compostela, 27 de xaneiro de 2020
Alberto Fuentes Losada
Secretario xeral técnico da Consellería de Sanidade