A Xunta de Goberno da Cidade de Santiago de Compostela, na sesión ordinaria que tivo lugar o día 21 de outubro de 2019, adoptou, entre outros, o seguinte acordo:
Primeiro. Aprobar inicialmente o Plan parcial de ordenación do SUND-8 (Monte Vidán), promovido por iniciativa particular de Santiago Sur Galicia, S.L., e elaborado polo arquitecto Manuel Gallego Jorreto, coas seguintes condicións:
O proxecto que se somete á aprobación inicial é o presentado con data do 12.11.2018, xunto co anexo presentado o 30.9.2019, que clarifica e complementa o anterior en resposta ao requirimento municipal de xullo 2019.
O documento que se somete á aprobación inicial xa incorpora os planos reformados de información (I2 a I6, I8 e I9) presentados con data do 5.7.2019.
Como condición para a aprobación definitiva deberase presentar un documento refundido que integre a documentación referenciada, emendando as cuestións sinaladas no acordo de aprobación inicial.
Segundo. Someter o plan á información pública durante o prazo de dous meses, mediante anuncios que para o efecto se publicarán no Diario Oficial de Galicia e nun xornal dos de maior difusión na provincia. Simultaneamente, efectuarase notificación persoal aos propietarios dos terreos afectados, segundo figuren no catastro.
Durante o trámite de información pública solicitaranse os informes da Dirección Xeral do Patrimonio Cultural, así como o da Axencia Galega de Infraestruturas sobre posibles afeccións a vías de titularidade autonómica.
Así mesmo, solicitarase co informe da Intervención Municipal sobre o estudo de sustentabilidade económica.
O que se publica co fin de que, durante o prazo de dous meses, contado a partir do día seguinte ao da publicación deste anuncio, os interesados poidan consultar o expediente e formular as alegacións que xulguen oportunas. A documentación sometida á exposición pública estará a dispor dos interesados no Servizo de Planeamento e Xestión do Concello de Santiago (Pazo de Raxoi, 2º andar), de luns a venres, das 9.00 ás 14.00 horas; e na páxina web do Concello http://transparencia.santiagodecompostela.gal/Plan-parcial-do-SUND-8-Monte-Vidan/gl
Santiago de Compostela, 7 de novembro de 2019
O alcalde
P.D. (DEC/4742/2019 do 17 de xuño)
Mercedes Rosón Ferreiro
Concelleira delegada de Urbanismo, Vivenda e Cidade Histórica