O Decreto 168/2015, do 13 de novembro (DOG núm. 221, do 19 de novembro), modificado polo Decreto 39/2018, do 5 de abril (DOG núm. 78, do 23 de abril), polo que se aproba a estrutura orgánica da Consellería do Mar, dispón que esta é o órgano da administración da Comunidade Autónoma ao cal lle corresponde propor e executar as directrices xerais do Goberno en materia de ordenación pesqueira en augas interiores, marisqueo, acuicultura, confrarías de pescadores/as e demais organizacións e asociacións dos/das profesionais do sector, de acordo co establecido no Estatuto de autonomía para Galicia e segundo os termos sinalados pola Constitución española.

A Lei 5/2011, do 30 de setembro, do patrimonio da Comunidade Autónoma de Galicia, no seu artigo 82, permite a cesión gratuíta de bens da Comunidade Autónoma a outras administracións públicas, fundacións públicas e entidades sen ánimo de lucro, sempre que se dediquen a fins de utilidade pública ou interese social; queda así obrigado o cesionario a destinar os bens ao fin expresado no correspondente acordo.

A Asociación Cultural e Deportiva Bielas Sport de Ribeira, con CIF G70036249 e inscrita no Rexistro de Asociacións co número 2004-7279-1, a través de escritos do 31.5.2019, 5.7.2019, 9.7.2019 e 26.9.2019, solicitou a cesión en propiedade dunha embarcación.

A referida asociación destinará a embarcación a fins de utilidade pública ou interese social e de xeito especial, a actividades de apoio e seguridade en eventos náutico-deportivos (regatas, competicións de wíndsurf, travesías a nado...), así como á colaboración en emerxencias marítimas de ámbito local.

En consecuencia, de conformidade co previsto no artigo 27, números 15 e 29, do Estatuto de autonomía de Galicia, e no uso das facultades que me confire a Lei 5/2011, do 30 de setembro, de patrimonio da Comunidade Autónoma de Galicia, e a Lei 1/1983, do 22 de febreiro, de normas reguladoras da Xunta e da súa presidencia,

DISPOÑO:

Artigo 1

Acórdase a cesión en propiedade do seguinte ben á Asociación Cultural e Deportiva Bielas Sport de Ribeira:

Nome da embarcación: Serra Barbanza.

Matrícula: 8ªVI 5-2-91.

Eslora: 13 m.

Manga: 3,80 m.

Puntal: 1,94 m.

Arqueo: 19,13 TRB.

Antigüidade: 1987.

Material casco: P.R.F.V.

2 motores: MAN D-2866 LE 405.

Sistema propulsor: Jets Hamilton Mod. HJ362 (2).

Artigo 2

O ben citado no artigo 1 atópase desafectado do servizo público por Resolución da Consellería do Mar do 4 de xuño de 2019.

Artigo 3

A cesión sinalada no artigo anterior queda sometida ás seguintes cláusulas:

a) De conformidade co establecido pola Lei 5/2011, do 30 de setembro, de patrimonio da Comunidade Autónoma de Galicia, no seu artigo 82, o ben cedido destinarao a entidade cesionaria a fins de utilidade pública ou interese social e, de maneira especial, a actividades de apoio e seguridade en eventos náutico-deportivos (regatas, competicións de wíndsurf, travesías a nado...), así como á colaboración en emerxencias marítimas de ámbito local.

b) Coa cesión outórgase á Asociación Cultural e Deportiva Bielas Sport a propiedade do ben moble cedido.

c) Serán a cargo da entidade cesionaria todos os gastos da conservación e mantemento do ben moble cedido.

d) Tanto se o ben cedido non se aplicase aos fins sinalados, como se se descoidase ou utilizase con grave quebrantamento, ou se incumprisen as condicións do acordo, considerarase resolta a cesión e os bens reverterán á Comunidade Autónoma de Galicia, que terá dereito a percibir, logo de taxación pericial, o valor do detrimento ou deterioración que sufrisen.

e) A entidade cesionaria realizará todos os trámites necesarios para o cambio de titularidade do ben cedido no rexistro marítimo da capitanía marítima correspondente, e correrán pola súa conta todos os gastos que estes orixinen.

Artigo 4

A cesión formalizarase mediante acta subscrita pola secretaria xeral técnica desta consellería ou funcionario/a en quen delegue, e nela deberá constar o acordo de cesión e a aceptación do cesionario.

Artigo 5

Corresponde á Consellería do Mar verificar a aplicación do ben cedido sinalado no artigo 1 ao fin para o que é cedido e pode adoptar para isto cantas medidas sexan necesarias.

Disposición derradeira primeira

A Consellería do Mar, a través da Secretaría Xeral Técnica, realizará os trámites necesarios para a efectividade de canto se dispón nesta orde.

Disposición derradeira segunda

Esta orde producirá efectos desde o día seguinte ao da súa publicación no Diario Oficial de Galicia.

Santiago de Compostela, 11 de novembro de 2019

Rosa María Quintana Carballo
Conselleira do Mar