A directora xeral de Ordenación do Territorio e Urbanismo, mediante a Resolución do 6 de xuño de 2019, publicada no Diario Oficial de Galicia mediante o Anuncio do 7 de xuño de 2019 (DOG núm. 115, do 19 de xuño), adoptou o seguinte acordo:

«Primeiro. Aprobar definitivamente o proxecto de expropiación polo procedemento de taxación conxunta dos bens e dereitos necesarios para a execución do polígono número dous do proxecto sectorial do parque empresarial de Xinzo de Limia e, consecuentemente, a declaración de urxente ocupación dos bens e dereitos afectados.

Segundo. Ordenar a notificación desta resolución, de xeito individualizado, a todos os que aparezan como titulares de bens ou dereitos que figuran no presente expediente de expropiación, á que se lle deberá acompañar a correspondente folla de prezo xusto definitiva.

Igualmente, deberase notificar esta resolución ao IGVS e ao Ministerio Fiscal, para os efectos establecidos no artigo 5 da Lei de expropiación forzosa, en relación cos propietarios descoñecidos e os non comparecentes no expediente expropiatorio que se aproba.

Terceiro. Ordenar a publicación desta resolución, así como o seu anexo de relación de bens e dereitos afectados, no Diario Oficial de Galicia e no taboleiro de edictos do Concello de Xinzo de Limia. Así mesmo, publicarase un anuncio no Boletín Oficial del Estado que servirá de notificación aos propietarios descoñecidos e dos cales se ignore o lugar de notificación ou o medio, ou ben, intentada esta, non se puidese efectuar, de conformidade co artigo 44 da Lei 39/2015, do 1 de outubro, do procedemento administrativo común das administracións públicas.

Durante o prazo de vinte días, contados desde o seguinte da recepción da notificación ou, de ser o caso, da data da publicación no Boletín Oficial del Estado, os interesados poderán manifestar mediante escrito dirixido á Dirección Xeral do IGVS, por triplicado exemplar, que deberán presentar na Área Provincial do IGVS en Ourense, a súa desconformidade coa valoración establecida no expediente aprobado, conforme dispón o artigo 118.7 da Lei 2/2016, do 10 de febreiro, do solo de Galicia (LSG). Transcorrido o citado prazo sen que se formule oposición á valoración, entenderase aceptada a que se fixou no acto aprobatorio do expediente e entenderase determinado o prezo xusto definitivamente, de conformidade co artigo 118.8 da referida lei.

Contra esta resolución, que pon fin á vía administrativa, poderase interpor recurso potestativo de reposición ante a conselleira de Medio Ambiente, Territorio e Vivenda, no prazo dun mes, contado a partir do día seguinte ao da súa notificación, ou recurso contencioso-administrativo, de conformidade coa Lei 29/1998, do 13 de xullo, da xurisdición contencioso-administrativa».

De conformidade co disposto nos artigos 44 e 46 da Lei 39/2015, do 1 de outubro, do procedemento administrativo común das administracións públicas, logo de intentada a notificación persoal nos termos establecidos no artigo 42.2 da dita Lei 39/2015 aos titulares da parcela 5 e non sendo posible practicala, e ignorando o lugar de notificación da titular da parcela número 8, emprázanse as persoas interesadas que se sinalan no anexo para seren notificadas por comparecencia.

A comparecencia para coñecer o contido íntegro do acordo adoptado pola directora xeral de Ordenación do Territorio e Urbanismo deberá efectuarse no prazo de dez días, contados desde o día seguinte ao da publicación deste anuncio, na Área Provincial do IGVS en Ourense, rúa Sáenz Díez, nº 1, Ourense, das 9.00 ás 14.00 horas, de luns a venres.

A eficacia desta notificación queda supeditada á súa publicación no taboleiro de edictos único (TEU) do Boletín Oficial del Estado.

Transcorrido o dito prazo sen efectuarse a comparecencia, a notificación entenderase producida desde o día seguinte ao do vencemento do prazo sinalado para comparecer.

Ourense, 26 de setembro de 2019

Consuelo Fernández Sueiro
Xefa da Área Provincial de Ourense

ANEXO

Expediente: proxecto de expropiación forzosa, polo procedemento de taxación conxunta, dos bens e dereitos que se precisan ocupar para a execución do polígono número dous do proxecto sectorial do parque empresarial de Xinzo de Limia (Ourense).

Expropiante: Instituto Galego da Vivenda e Solo.

Beneficiario: Xestión do Solo de Galicia-Xestur, S.A.

Acto obxecto da notificación: Resolución da Dirección Xeral de Ordenación do Territorio e Urbanismo, do 6 de xuño de 2019, pola que se aproba definitivamente o proxecto de expropiación forzosa, polo procedemento de taxación conxunta, dos bens e dereitos que se precisan ocupar para a execución do polígono número dous do proxecto sectorial do parque empresarial de Xinzo de Limia e a folla de prezo xusto definitiva.

Persoa/s a notificar	Parcela obxecto de expropiación
Irene Diz Parada, Rosa Diz Parada, Purificación Diz Parada, Manuel Diz Parada, Leopoldo Diz Parada e José Ramón Díez Seguín	Número 5
María Santana Carrera	Número 8