Con data do 8 de maio de 2019, a Xefatura Territorial de Lugo da Consellería de Economía Emprego e Industria ditou resolución pola que se concelle á empresa UFD Distribución Eléctrica, S.A. autorización administrativa previa e de construción, e se declara a utilidade pública, en concreto para a ocupación da instalación eléctrica LMT, CT e RBT Os Queimós, no concello de Guitiriz (expediente 01/2018 AT).
Esta declaración de utilidade pública, segundo o disposto no artigo 54 da Lei 24/2013, do 26 de decembro, do sector eléctrico, implica a necesidade de ocupación dos bens ou a adquisición dos dereitos afectados e a súa urxente ocupación para os efectos do artigo 52 da Lei de expropiación forzosa do 16 de decembro de 1954.
De acordo co anterior, esta xefatura territorial, en cumprimento do disposto no artigo 52 da Lei de expropiación forzosa, resolve convocar todas as persoas afectadas coas cales non se chegou a un acordo, incluídas na relación de bens e dereitos que se inclúe como anexo á presente resolución e que tamén se publica no taboleiro de anuncios do Concello de Guitiriz, deducida da que se someteu a información pública no diario El Progreso do 12 de decembro de 2018 e no Diario Oficial de Galicia do 12 de decembro de 2018 para que comparezan no Concello de Guitiriz, sinalado como punto de reunión para, de conformidade co procedemento que se establece no citado artigo, levar a cabo o levantamento de actas previas á ocupación. Desta convocatoria darase traslado aos interesados mediante a oportuna citación individual, na cal se sinalará día e hora para o levantamento de actas previas. Así mesmo, no taboleiro de anuncios do Concello de Guitiriz estará exposta a data do levantamento de actas. Todos os interesados, así como as persoas que sexan titulares de calquera clase de dereitos ou intereses sobre os bens afectados, deberán acudir persoalmente ou representados por persoa debidamente autorizada, achegando os documentos acreditativos da súa titularidade, podéndose acompañar dos seus peritos e dun notario pola súa conta (art. 52.3 da Lei de expropiación forzosa).
Así mesmo, advírtese a todos os interesados que poderán formular alegacións por escrito nesta xefatura territorial (rolda da Muralla, 70, Lugo) ata o momento do levantamento de actas previas, para os únicos efectos de emendar os posibles erros cometidos na relación de bens e dereitos afectados (artigo 56.2 do regulamento da Lei de expropiación forzosa).
Lugo, 16 de xullo de 2019
Pilar Fernández López
Xefa territorial de Lugo
