Antecedentes:

Primeiro. Con data do 17.10.2018, Juan Antonio Pérez Vidal, con NIF ***9530**, en nome e representación da Sociedad Cooperativa Gallega del Mar Santa Eugenia Ltda., con NIF F15025877, presentou solicitude para o recoñecemento como organización de produtores pesqueiros (OPP) de ámbito autonómico.

Segundo. Con data do 21.12.2018 a Subdirección Xeral de Acuicultura e Comercialización Pesqueira, do Ministerio de Agricultura y Pesca, Alimentación, certificou a non pertenza das unidades de produción a ningunha OPP de ámbito nacional ou transnacional.

Terceiro. O 28.1.2019 notificóuselle á Sociedad Cooperativa Gallega del Mar Santa Eugenia Ltda. un requirimento de emenda. Con datas de rexistro do 15.2.2019 e 21.3.2019 tivo entrada na Dirección Xeral de Pesca, Acuicultura e Innovación Tecnolóxica, da Consellería do Mar, a documentación requirida.

Cuarto. O 6.3.2019 emítese o informe do Servizo de Análise e de Rexistros para efectos de determinar o ámbito da OPP, a actividade económica suficiente e o segmento de pesca a que pertence, de conformidade cos artigos 2.3, 3.3.a) e 2.4 do Real decreto 277/2016, do 24 de xuño.

Quinto. O 2.4.2019 emítese o informe de Portos de Galicia para efectos de determinar o estado da concesión administrativa á Sociedad Cooperativa Gallega del Mar Santa Eugenia Ltda.

Sexto. Con data do 3.4.2019 emítese o informe favorable do Servizo de Mercados á solicitude da Sociedad Cooperativa Gallega del Mar Santa Eugenia, Organización de Productores Pesqueros, de recoñecemento como OPP de ámbito autonómico para o sector da pesca e o segmento de litoral.

Sétimo. Con data do 4.4.2019 asínase a proposta de recoñecemento da Sociedad Cooperativa Gallega del Mar Santa Eugenia, Organización de Productores Pesqueros, con NIF F15025877, como OPP de ámbito autonómico, para o sector da pesca e o segmento de litoral, e concédese neste mesmo acto trámite de audiencia ao solicitante.

Oitavo. Con data do 22.4.2019 ten rexistro de entrada na Dirección Xeral de Pesca, Acuicultura e Innovación Tecnolóxica a aceptación da proposta de recoñecemento da Sociedad Cooperativa Gallega del Mar Santa Eugenia, Organización de Productores Pesqueros, con NIF F15025877, como OPP de ámbito autonómico, para o sector da pesca e o segmento de litoral.

Fundamentos de dereito:

Primeiro. O artigo 14.1 do Regulamento (UE) núm. 1379/2013, do Parlamento Europeo e do Consello, do 11 de decembro, polo que se establece a organización común de mercados no sector dos produtos da pesca e da acuicultura, e se modifican os regulamentos (CE) núm. 1184/2006 e (CE) núm. 1224/2009, do Consello, e se derroga o Regulamento (CE) núm. 104/2000, do Consello, establece que poden ser recoñecidas como OPP todas as agrupacións creadas por iniciativa de produtores do sector pesqueiro que o soliciten, sempre que cumpran os principios establecidos no artigo 17 do dito regulamento, desenvolvan unha actividade económica suficiente, teñan personalidade xurídica e estean en condicións de perseguir os obxectivos recollidos no artigo 7 do presente regulamento, entre outros.

Segundo. O artigo 2 do Regulamento de execución (UE) núm. 1419/2013, da Comisión, do 17 de decembro, relativo ao recoñecemento das organizacións de produtores pesqueiros e as organizacións interprofesionais, a aplicación extensiva das normas das organizacións de produtores e as organizacións interprofesionais e a publicación dos prezos de activación, de conformidade co Regulamento (UE) núm. 1379/2013, do Parlamento Europeo e do Consello, polo que se establece a organización común de mercados no sector dos produtos da pesca e da acuicultura, dispón os prazos, procedementos e formularios de solicitude de recoñecemento das organizacións de produtores e as organizacións interprofesionais.

Terceiro. O Regulamento de execución (UE) núm. 1418/2013, da Comisión, do 17 de decembro, relativo aos plans de produción e comercialización en virtude do Regulamento (UE) núm. 1379/2013, do Parlamento Europeo e do Consello, polo que se establece a organización común de mercados no sector dos produtos da pesca e da acuicultura.

Cuarto. A Lei 3/2001, do 26 de marzo, de pesca marítima do Estado, modificada pola Lei 33/2014, do 26 de decembro, dispón no artigo 55 que o recoñecemento oficial das OPP, da súa representatividade e o seu carácter exclusivo nunha zona, corresponde ás comunidades autónomas cando se trate dunha OPP cuxa produción pertenza principalmente a unha soa comunidade autónoma, e nas porcentaxes e nos termos que regulamentariamente se establezan.

Quinto. O Real decreto 277/2016, do 24 de xuño, polo que se regulan as organizacións profesionais no sector dos produtos da pesca e da acuicultura, establece nos artigos 2, 3 e 9 os requisitos para que unha OPP poida ser recoñecida e, no seu artigo 3.6, dispón que o recoñecemento dunha OPP, así como a súa modificación e retirada, corresponderá aos órganos competentes das comunidades autónomas no caso de ámbito autonómico.

Sexto. O artigo 2 do Real decreto 956/2017, do 3 de novembro, polo que se establece o marco regulador de axudas ás organizacións profesionais do sector da pesca e da acuicultura, cofinanciadas polo Fondo Europeo Marítimo e de Pesca, e as súas bases reguladoras de ámbito estatal, e polo que se modifican o Real decreto 418/2015, do 29 de maio, polo que se regula a primeira venda de produtos pesqueiros, e o Real decreto 277/2016, do 24 de xuño, polo que se regulan as organizacións profesionais no sector dos produtos da pesca e da acuicultura, define a administración competente, no caso dunha comunidade autónoma.

Sétimo. Lei 11/2008, do 3 de decembro, de pesca marítima de Galicia, modificada por Lei 6/2009, do 11 de decembro, nos artigos 90 e 91 establece que as organizacións de produtores son entidades recoñecidas oficialmente, constituídas por iniciativa das persoas produtoras co fin de garantir o exercicio racional da pesca, do marisqueo e da acuicultura e a mellora das condicións de venda da súa produción; e que validamente constituída unha asociación de produtores, para obter o recoñecemento oficial de OPP, os seus membros deberán ter principalmente o seu domicilio social e a súa produción en Galicia, nas porcentaxes e nos termos establecidos na normativa vixente nesta materia, que regulamentariamente se estableceran as condicións e os requisitos para acceder e conservar o recoñecemento de OPP e que este recoñecemento se poderá retirar cando se incumpran os requisitos que determinaron o seu outorgamento.

Oitavo. O artigo 1 do Decreto 168/2015, do 13 de novembro, polo que se aproba a estrutura orgánica da Consellería do Mar, establece a competencia da Consellería do Mar para propor e executar as directrices xerais do Goberno en materia de ordenación pesqueira en augas interiores, marisqueo, acuicultura, confrarías de pescadores/as e demais organizacións e asociacións dos/das profesionais do sector, entre outros, de acordo co establecido no Estatuto de autonomía para Galicia e segundo os termos sinalados pola Constitución española. Así mesmo, segundo o artigo 8, á Dirección Xeral de Pesca, Acuicultura e Innovación Tecnolóxica correspóndelle exercer a dirección e coordinación das competencias e funcións en materia de ordenación pesqueira en augas interiores e acuicultura; das industrias de transformación e comercialización e almacenamento dos produtos da pesca, o marisqueo e a acuicultura, entre outros.

Noveno. Lei 39/2015, do 1 de outubro, do procedemento administrativo común das administracións públicas.

Décimo. Demais normativa de aplicación.

Na súa virtude, esta consellería en cumprimento do artigo 55.1.a) da Lei 3/2001, do 26 de marzo, de pesca marítima do Estado, e do establecido no artigo 3.6 do Real decreto 277/2016, do 24 de xuño,

RESOLVO:

Primeiro. Recoñecer a Sociedad Cooperativa Gallega del Mar Santa Eugenia, Organización de Productores Pesqueros, con NIF F15025877, como organización de produtores pesqueiros de ámbito da Comunidade Autónoma de Galicia para o sector da pesca e o segmento de litoral.

Este recoñecemento queda supeditado ao cumprimento das condicións e obrigas das OPP establecidas na lexislación vixente e, en particular:

– Comunicar á Dirección Xeral de Pesca, Acuicultura e Innovación Tecnolóxica, da Consellería do Mar, calquera cambio nas condicións que deron lugar ao seu recoñecemento.

– Adaptar os seus estatutos ás exixencias que deriven da evolución da Organización Común de Mercados (OCM) ou normativa vixente que afecte as OPP.

– Aplicar as medidas previstas no artigo 8 do Regulamento (UE) núm. 1379/2013, do 11 de decembro, para acadar os distintos obxectivos establecidos no artigo 7 do dito regulamento.

– Cumprir os principios de funcionamento interno establecidos no artigo 17 do Regulamento (UE) núm. 1379/2013, do 11 de decembro.

– Manter unha estrutura organizativa propia dotada do persoal, da infraestrutura e do equipamento necesario para poder cumprir as obrigas establecidas na normativa, en particular, o coñecemento da produción dos seus membros e da xestión orzamentaria.

– Levar unha contabilidade diferenciada para a xestión da OPP.

– Facer constar por escrito as normas que adopten en materia de explotación, produción e comercialización, e velar polo seu cumprimento.

– Velar polo cumprimento por parte dos produtores membros das normas estatutariamente adoptadas.

– Facilitar o labor de inspección e subministrar a documentación e información que se precise por requirimento da Administración competente.

– Rexerase, no seu funcionamento, polo disposto no capítulo V da OCM, así como na Lei 15/2007, do 3 de xullo, de defensa da competencia, de xeito que non exista unha posición dominante no mercado da OPP.

– Cumprir coas normas comúns de comercialización vixentes e en particular co disposto nos artigos 34 e 47 do Regulamento (UE) núm. 1379/2013, do 11 de decembro.

– Manter unha actividade económica suficiente conforme os artigos 3.3 do Real decreto 277/2016, do 24 de xuño.

– Impoñer aos seus membros a obriga de permanecer na organización un período mínimo de un ano natural desde a data da súa admisión. Una vez transcorrido o dito período, a renuncia á condición de membro comunicarase por escrito cunha antelación de polo menos catro meses á data efectiva da baixa, de acordo co artigo 3.2 do Real decreto 277/2016, do 24 de xuño.

– Notificar á Dirección Xeral de Pesca, Acuicultura e Innovación Tecnolóxica as novas adhesións e as baixas, para dar cumprimento ao disposto no artigo 3.8 do Real decreto 277/2016, do 24 de xuño, e poder determinar o cumprimento da actividade económica suficiente.

– Presentar ante a Dirección Xeral de Pesca, Acuicultura e Innovación Tecnolóxica un plan de produción e comercialización, no prazo de dous meses a partir do día seguinte á resolución de recoñecemento, cun prazo de aplicación ata o 31 de decembro do ano seguinte ao seu recoñecemento. Posteriormente, poderán presentar un plan anual ou plurianual, de conformidade co disposto no artigo 14.3 do Real decreto 277/2016, do 24 de xuño. Os plans de produción e comercialización posteriores presentaranse antes do 31 de outubro do ano en que finalice a vixencia do seu plan aprobado de conformidade co artigo 14 da dita norma.

– Presentar ante a Dirección Xeral de Pesca, Acuicultura e Innovación Tecnolóxica un informe anual de actividades desenvolvidas no marco do plan de produción e comercialización establecido no artigo 28 do Regulamento (UE) núm. 1379/2013, do 11 de decembro. Este informe deberá presentarse antes do 28 de febreiro de cada ano segundo o artigo 15 do Real decreto 277/2016, do 24 de xuño.

– En todo caso, o incumprimento das condicións de recoñecemento como OPP pode levar consigo a retirada deste.

Segundo. Ordenar a publicación da presente resolución de recoñecemento como OPP no Diario Oficial de Galicia (DOG), de conformidade co establecido no artigo 45 da Lei 39/2015, do 1 de outubro, do procedemento administrativo común das administracións públicas.

Contra esta resolución, que pon fin á vía administrativa, cabe interpoñer recurso potestativo de reposición ante a conselleira do Mar no prazo máximo dun (1) mes, ou ben recurso contencioso-administrativo ante o órgano competente desta orde xurisdicional, no prazo de dous (2) meses, contados en ambos os dous casos desde o día seguinte ao da súa notificación.

Santiago de Compostela, 23 de abril de 2019

Rosa María Quintana Carballo
Conselleira do Mar