En cumprimento dos artigos 9.3 e 8.4 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade á encomenda de xestión á Fundación Semana Verde de Galicia, ordenada pola Resolución do conselleiro de Sanidade, do 8 de marzo de 2019, coas seguintes características:
1. A actividade obxecto da encomenda é realizar os traballos de apoio para a realización das probas selectivas correspondentes a diversas categorías de persoal estatutario, que terán lugar os días 9 e 10 de marzo, 7 de abril e 12 de maio de 2019, de conformidade cos requirimentos técnicos que se detallan na correspondente resolución, relativos ás obrigas da entidade encomendante, as directrices de execución e o cronograma das actividades que se desenvolverán.
As categorías convocadas son: celador/a, grupo auxiliar da función administrativa e enfermeiro/a.
2. A Fundación Semana Verde de Galicia é unha fundación do sector público autonómico, de acordo co artigo 113 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, na medida en que o seu patrimonio fundacional, con carácter de permanencia, está formado en máis dun 50 % por bens e dereitos achegados ou cedidos pola Xunta de Galicia. De acordo co artigo 47 da citada Lei 16/2010, ten a consideración de medio propio e servizo técnico da Xunta de Galicia.
3. As probas selectivas a que se refiren as actividades encomendadas desenvolveranse os días 9 e 10 de marzo, 7 de abril e 12 de maio de 2019.
Santiago de Compostela, 12 de marzo de 2019
Antonio Fernández-Campa García-Bernardo
Xerente do Servizo Galego de Saúde