A Xunta de Goberno local, con data oito de xaneiro de dous mil dezanove, adoptou o seguinte acordo:

«III. Aprobación definitiva do Proxecto de equidistribución do Plan parcial S-04.

Con data do 31 de outubro de 2018, a Xunta Xeral ordinaria e universal da sociedade Queizúar, S.L. aprobou inicialmente o Proxecto de equidistribución do Plan parcial S-04 de Touro, conforme o establecido no artigo 121.3.a) da Lei 2/2016, do 10 de febreiro, do solo de Galicia, tramitado polo sistema de concerto.

Conforme o establecido no artigo 106 da citada Lei 2/2016, expúxose ao público o mencionado proxecto durante o prazo dun mes sen que se presentasen reclamacións a este. Igualmente e conforme o establecido no artigo 401.3 do Regulamento da Lei do solo (Decreto 143/2016, do 22 de setembro), expúxose ao público o convenio de monetarización, aprobado inicialmente con data do 28 de novembro de 2018, durante o prazo dun mes, sen que se presentasen alegacións.

Tendo en conta o exposto e os informes que constan no expediente, a Xunta de Goberno local, por unanimidade, acorda:

Primeiro. Aprobar definitivamente o Proxecto de equidistribución do Plan parcial S-04 de Touro, promovido por Queizúar, S.L.

Segundo. Aprobar definitivamente o convenio de monetarización que se vai subscribir coa empresa Queizúar, S.L.

Terceiro. Para os efectos establecido no artigo 403 do Decreto 143/2016, do 22 de setembro, o presente acordo co texto íntegro do convenio publicarase no Diario Oficial de Galicia para xeral coñecemento...».

Así mesmo, publícase o texto íntegro do Convenio urbanístico de monetarización de aproveitamento urbanístico.

«No Concello de Touro,

Comparecen

Dunha parte: Ignacio Codesido Barreiro, alcalde presidente do Concello de Touro.

E doutra parte: Benigno Pereira Ramos, maior de idade, veciño de Santiago de Compostela, con domicilio na rúa Rosario, nº 10, provisto do DNI 33251020N.

Interveñen

O alcalde presidente, en nome e representación do Concello de Touro, conforme o disposto no artigo 21.1.b) da Lei 7/1985, do 2 de abril, reguladora das bases do réxime local.

Benigno Pereira Ramos, en nome e representación da entidade mercantil Queizúar, S.L., segundo acredita mediante escritura de constitución de sociedade outorgada ante o notario Manuel Julio Reigada Montoto, con data 14 de marzo de 1997, e número 844 do seu protocolo.

Ambas as dúas partes recoñécense mutua e recíproca capacidade para formalizar o presente convenio, e libremente e para o efecto

Expoñen:

Primeiro. O Plan xeral de ordenación municipal (PXOM) de Touro delimita un sector de solo urbanizable na parroquia de Bama, denominado S-04, cunha superficie bruta de 30.508 m2, que aumentou a 32.424 m2 tras a aprobación definitiva do plan parcial, segundo o disposto no artigo 157 do Decreto 143/2016, do 22 de setembro, polo que se aproba o Regulamento da Lei 2/2016, do 10 de febreiro, do solo de Galicia (en diante, RLSG), e un aproveitamento lucrativo máximo de 17.624 m2.

Segundo. O Pleno do Concello, en sesión do 22 de maio de 2018, acordou aprobar definitivamente o Plan parcial do S-04 do PXOM de Touro, promovido por Queizúar, S.L. No plan parcial asignouse ao ámbito un aproveitamento tipo de 17.624 m2; corresponden ao Concello de Touro, de conformidade co indicado no artigo 29.d) da Lei 2/2016, do 10 de febreiro, do solo de Galicia (en diante, LSG), 1.762,4 m2 de aproveitamento (10 % do aproveitamento tipo do sector).

Terceiro. Dada a dificultade de establecer unha parcelación que permita a materialización do aproveitamento correspondente ao concello, cumprindo coas condicións mínimas exixidas na normativa, así como co disposto nos informes sectoriais emitidos durante o período de exposición ao público (que recomendaban, en exclusiva, regularizar e ampliar as instalacións existentes), o promotor propón e o Concello de Touro acepta a monetarización do dito aproveitamento. É por iso que, coincidindo a vontade de ambas as dúas partes, formalizan o presente convenio urbanístico de xestión, de acordo coas seguintes estipulacións.

Cuarto. A monetarización do aproveitamento lucrativo lexitímase en base ao disposto no artigo 400.2 do RLSG.

Estipulacións

1ª) O presente convenio urbanístico ten por obxecto a substitución do aproveitamento correspondente ao Concello de Touro no sector S-04 polo seu equivalente económico.

2ª) Como consecuencia do cumprimento do deber legal de cesión do 10 % do aproveitamento tipo do sector do S-04, corresponden ao Concello de Touro 1.762,4 m2 de aproveitamento. Tendo en conta que a totalidade do solo con edificabilidade lucrativa ten o mesmo uso e a mesma edificabilidade, será equivalente a esta cantidade a cesión do 10 % do solo con aproveitamento lucrativo, é dicir, o 10 % de 20.857 m2, equivalente a 2.085,70 m2.

3ª) Da valoración proposta polos promotores e sometida a informe dos servizos urbanísticos municipais, resulta unha monetarización do aproveitamento urbanístico do Concello de Touro equivalente a 86.619,12 € (oitenta e seis mil seiscentos dezanove euros con doce céntimos), tendo en conta un valor de repercusión de solo de 41,53 €/m2 (2.085,70 m2 x 41,53 €/m2 = 86.619,12 €).

4ª) O promotor deberá realizar o pagamento da dita cantidade con anterioridade á inscrición do Proxecto de equidistribución no Rexistro da Propiedade e, en consecuencia, no prazo máximo de tres meses a partir da firmeza en vía administrativa do acordo de aprobación definitiva do dito proxecto, e deberá achegar no dito prazo copia da carta de pagamento nas dependencias municipais.

5ª) O Concello de Touro obrígase a respectar o disposto nos artigos 132 a 134 da LSG, e 329 a 331 e seguintes do RLSG en canto a destino e transmisión do patrimonio público do solo.

6ª) A validez e vinculación do presente convenio queda supeditada á súa formalización e perfeccionamento de acordo co indicado nos artigos 401 a 403 do RLSG.

7ª) Todos os gastos e impostos que se orixinen como consecuencia deste convenio aboaraos cada parte segundo a lexislación vixente.

E para que así conste e en proba de conformidade asinan o presente convenio por duplicado exemplar no lugar e data arriba indicados».

Touro, 7 de febreiro de 2019

Ignacio Codesido Barreiro
Alcalde