Visto o expediente para outorgamento da autorización administrativa previa e de construción para a instalación eléctrica que a seguir se describe:

Solicitante: Begasa.

Domicilio social: parque empresarial As Gándaras, r/ Ramón María Aller Ulloa, 9, 27003 Lugo.

Denominación: soterramento de LMT aéreas na zona oeste do Ceao.

Situación: concello de Lugo.

Características técnicas:

– Liña de media tensión soterrada a 20 kV baixo tubo, cunha lonxitude de 320 m, con orixe na LMT soterrada existente dirección CT rúa Inspección (5325), condutor tipo RHZ1 240, e final na LMT soterrada existente dirección CT Ceao, 10 (13121), con entrada e saída no CT proxectado.

– Centro de transformación en edificio prefabricado, cunha potencia de 1.260 kVA, e unha relación de transformación de 20.000/400-230 V.

– Liña de baixa tensión aérea, de 3 circuítos, cunha lonxitude de 40 m en condutor RZ 95 e RZ 150, con orixe no paso aerosoterrado do apoio HV 9-800 da liña soterrada proxectada e final na RBT existente.

– Liña de baixa tensión soterrada, de 7 circuítos, cunha lonxitude de 365 m en condutor RV 150, con orixe no centro de transformación proxectado e final nas RBT existentes.

– Liña de baixa tensión soterrada, de 3 circuítos, cunha lonxitude de 347 m en condutor RV 150, con orixe no CT rúa Inspección (5325) existente e final nas RBT existentes.

Cumpridos os trámites ordenados na Lei 24/2013, do 26 de decembro (BOE núm. 310), do sector eléctrico, e no título VII, capítulo II, do Real decreto 1955/2000, do 1 de decembro (BOE núm. 310), polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, no Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias, e na Resolución do 19 de febreiro de 2014, da Dirección Xeral de Enerxía e Minas, pola que se aproba o procedemento de autorización administrativa de construción (DOG núm. 54, do 19 de marzo), esta xefatura territorial, de acordo coas competencias que resultan do Decreto 135/2017, do 28 de decembro, polo que se crea e establece a estrutura orgánica da consellería, e tendo en conta o Decreto 9/2017, do 12 de xaneiro, sobre órganos competentes para autorización de instalacións eléctricas na Comunidade Autónoma de Galicia, resolve:

Conceder a autorización administrativa previa e de construción ás ditas instalacións, cuxas características se axustarán en todas as súas partes ás que figuran no seu proxecto e ás condicións técnicas e de seguridade establecidas nos regulamentos de aplicación e nos condicionados establecidos polos ministerios, organismos ou corporacións que constan no expediente, independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.

O prazo de posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.

Contra esta resolución poderase interpor recurso de alzada ante o conselleiro de Economía, Emprego e Industria no prazo dun mes, a partir do día seguinte ao da notificación ou publicación desta resolución; tamén se poderá interpor calquera outro recurso que considere pertinente ao seu dereito.

Lugo, 11 de decembro de 2018

Pilar Fernández López
Xefa territorial de Lugo