Foi aprobado inicialmente, o 28 de decembro de 2018, o estudo de detalle redactado pola Oficina Galega de Proxectos Arquitectónicos, S.L.P.U., cuxo promotor é o Bispado de Lugo, referente a área que comprende o Souto no lugar de Ponte Queimadas coa cualificación urbanística de solo urbano co obxecto de modificar e reordenar os volumes de acordo co planeamento que afecta o soar obxecto deste, para levar a cabo a realización dun equipamento con uso sociocultural e/ou relixioso na parcela. Organizando a situación da nova edificación sen modificar ocupacións nin aliñacións xa fixadas polo planeamento, nin alterar os usos do solo, cun criterio de integración paisaxística e urbanística, conseguirase a implementación dun novo uso (permitido na ordenanza) en edificación illada (permitida tamén pola ordenanza que lle é de aplicación ao soar) para uso e desfrute dos veciños do contorno e de todo o concello, cumprindo sempre e en todo momento co disposto na normativa.
En cumprimento da Resolución da Alcaldía 265/2018, do 27 de decembro, e do artigo 80.2 da Lei 2/2016, do 10 de febreiro, do solo de Galicia, así como no artigo 194.2 do seu regulamento, sométese o expediente a información pública polo prazo dun mes, contado desde o día seguinte ao de publicación deste anuncio no Diario Oficial de Galicia.
Durante o período de información pública quedará o expediente á disposición de calquera que queira examinalo, para os efectos de que se presenten as alegacións que se consideren pertinentes. Así mesmo, estará á disposición dos interesados na sede electrónica deste concello (https://www.toques.es).
A aprobación inicial do estudo de detalle comporta a suspensión do outorgamento de licenzas no ámbito afectado por el, suspensión que se extinguirá coa aprobación definitiva do estudo de detalle.
Toques, 2 de xaneiro de 2019
Miguel Ángel Buján Varela
Alcalde