Visto o expediente para outorgamento da autorización administrativa previa e de construción para a instalación eléctrica que a seguir se describe:

Solicitante: Unión Fenosa Distribución, S.A.

Domicilio social: A Batundeira, Velle, Ourense.

Denominación: LMTS, CT e RBTS Irmáns Fernández Dorrego, nº 7 e o seu anexo.

Situación: concello de Carballedo.

Características técnicas:

• LMT soterrada a 20 kV con orixe nun paso aéreo a soterrado situado no apoio existente BCSVEVSQ/80-4-5 e final no centro de transformación proxectado, cunha lonxitude de 155 metros en condutor tipo RHZ1-95.

• Centro de transformación compacto telecontrolado GSM/GPRS/FO, cunha potencia proxectada de 250 kVA, no cal se instalan dúas celas de liña e unha de protección, relación de transformación 20.000/400-230 V.

• RBT soterrada con orixe no CT proxectado e final na CXP da residencia da terceira idade, cunha lonxitude de 4 metros en condutor tipo XZ1.

• RBT soterrada con orixe no CT proxectado e final na RBT existente, cunha lonxitude de 30 metros en condutor tipo XZ1.

• RBT soterrada con orixe no CT proxectado e final na CXP do grupo escolar da Barrela, cunha lonxitude de 4 metros en condutor tipo XZ1.

Cumpridos os trámites ordenados na Lei 24/2013, do 26 de decembro (BOE núm. 310), do sector eléctrico e no título VII, capítulo II, do Real decreto 1955/2000, do 1 de decembro (BOE núm. 310), polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, no Real decreto 337/2014, do 9 de maio, polo que se aproba o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias, e na Resolución de 19 de febreiro de 2014, da Dirección Xeral de Enerxía e Minas, pola que se aproba o procedemento de autorización administrativa de construción (DOG núm. 54, do 19 de marzo), esta xefatura territorial, de acordo cas competencias que resultan dos decretos 135/2017, do 28 de decembro, polo que se crea e establece a estrutura orgánica da consellería, e tendo en conta o Decreto 9/2017, do 12 de xaneiro, sobre órganos competentes para autorización de instalacións eléctricas na Comunidade Autónoma de Galicia, resolve:

Conceder a autorización administrativa previa e de construción ás ditas instalacións, cuxas características se axustarán en todas as súas partes ás que figuran no seu proxecto e ás condicións técnicas e de seguridade establecidas nos regulamentos de aplicación e nos condicionados establecidos polos ministerios, organismos ou corporacións que constan no expediente, independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.

O prazo de posta en marcha das instalacións que se autorizan será de doce meses, contados a partir da data da última autorización administrativa necesaria para a súa execución.

Contra esta resolución poderase interpor recurso de alzada ante o conselleiro de Economía, Emprego e Industria no prazo dun mes, a partir do día seguinte ao da notificación ou publicación desta resolución; tamén se poderá interpor calquera outro recurso que considere pertinente ao seu dereito.

Lugo, 16 de novembro de 2018

Pilar Fernández López
Xefa territorial de Lugo