UvigoTV é un servizo de televisión por internet prestado pola Área das Tecnoloxías da Información e as Comunicacións (ATIC) da Vicerreitoría de Novas Tecnoloxías da Universidade de Vigo. Agrupa todos os servizos de transmisión de vídeo sobre internet da Universidade, poñendo á disposición dos usuarios contidos audiovisuais de carácter educativo e institucional. Ademais, para desenvolver esta actividade será necesario un espazo de traballo coas seguintes características técnicas: 300 m2, proximidade ao Campus Universitario, estudio de gravación, zona de despachos e videoconferencia.

A Universidade de Vigo non dispón de ningún espazo libre con estas características.

Xustificada a necesidade, procédese á adxudicación directa do aluguer do local citado (de conformidade co disposto no artigo 55 do Decreto 50/1989 do Regulamento de patrimonio da Comunidade Autónoma galega, en execución da Lei 3/1985, do 12 de abril, do patrimonio da Comunidade Autónoma de Galicia, e ao abeiro das competencias outorgadas polos estatutos da Universidade de Vigo), a Cidade Universitaria, S.A. con CIF A36857902, atendendo ás peculiaridades específicas de dimensión e localización do referido local e á necesidade de proximidade ao Campus de Vigo da Universidade de Vigo para satisfacer a necesidade exposta.

Á vista do citado, resolvo facer pública a formalización do contrato (con data 1 de novembro de 2018) e o acordo da utilización do procedemento de adxudicación directa para o aluguer do local onde se situará o servizo de UvigoTV a sociedade mercantil Cidade Universitaria, S.A.

Vigo, 28 de novembro de 2018

O reitor da Universidade de Vigo
P.D. (Resolución do 21.6.2018, DOG do 28 de xuño)
Raquel María Souto García
Xerenta da Universidade de Vigo