Para os efectos previstos no artigo 45 da Lei 39/2015, do 1 de outubro, do procedemento administrativo común das administracións públicas, faise público que o Xurado Provincial de Clasificación de Montes Veciñais en Man Común de Lugo, na sesión do día 8 de novembro de 2018, baixo a presidencia de María Olga Iglesias Fontal e coa asistencia dos vogais Josefina Pereira de la Riera, Carlos Vázquez Díaz e Antonio José López-Acuña Herrero, e da secretaria Lucía Belver Quiroga, tomou o seguinte acordo:
Monte de Ortoá (expediente 68/78), pertencente aos veciños da parroquia de Ortoá, no termo municipal de Sarria. Na reunión celebrada polo xurado o 14 de xuño de 2018 acordouse, aceptando a proposta do Servizo de Montes, homologar o deslindamento do monte de utilidade pública Ludeiro e Macaque na parte do perímetro correspondente con este monte veciñal de Ortoá. O día 24 de agosto de 2018, tivo entrada un escrito presentado por Alfonso López López, como presidente da comunidade, de interposición dun recurso de reposición contra o devandito acordo, en que solicitaba, con base nas argumentacións que expón, a súa estimación.
A resolución impugnada foi notificada directamente á comunidade propietaria a través do sistema Notifica.gal, e consta rexeitada polo destinatario o 22 de xullo de 2018, logo de envío de aviso da súa posta á disposición, recibido polo presidente da comunidade (Alfonso López López) o 13 de xullo de 2018. Con posterioridade, o día 23 de xullo de 2018, o secretario da comunidade, José López Castro, presentouse nas dependencias do Rexistro de MVMC e asinou a recepción en man do certificado do acordo (aínda que, suponse que por erro, fixo constar como data o 23 de maio de 2018). O recurso foi presentado no portelo único do Concello de Sarria o día 24 de agosto de 2018, polo tanto, fóra de prazo.
Examinado o devandito recurso, o xurado, por unanimidade, acorda inadmitir o recurso de reposición interposto, de conformidade cos fundamentos que se recollen na correspondente resolución do recurso.
Contra esta resolución poderá interpor, no prazo de dous meses contados desde o día seguinte ao da súa notificación ou publicación no Diario Oficial de Galicia, recurso contencioso-administrativo perante o Xulgado do Contencioso-Administrativo de Lugo, de conformidade co artigo 46 da Lei 29/1998, do 13 de xullo, da xurisdición contencioso-administrativa.
Lugo, 23 de novembro de 2018
María Olga Iglesias Fontal
Presidenta do Xurado Provincial de Clasificación de Montes
Veciñais en Man Común de Lugo