O Pleno do Concello, na súa sesión do 27 de setembro de 2018, aprobou definitivamente o Plan de sectorización do parque empresarial de Vilarmaior, promovido pola Comisión Xestora do parque empresarial de Vilarmaior, segundo o documento refundido de outubro de 2017 (sen visar), redactado por Cerne Ingeniería, S.A. e asinado dixitalmente polo enxeñeiro de camiños, Ángel Delgado Cid, colexiado número 4.657.
Medidas adoptadas para o seguimento dos efectos no ambiente da aplicación do Plan de sectorización: segundo a Resolución do 11 de setembro de 2012 ditada pola Secretaría Xeral de Calidade e Avaliación Ambiental (Consellería de Medio Ambiente, Territorio e Infraestruturas) pola que se formulou a memoria ambiental do devandito Plan de sectorización (clave 2009AAE0476), consultable no enderezo http://aae.medioambiente.xunta.es.
Enderezo electrónico en que figura o contido íntegro do Plan de sectorización á disposición do público: www.concellodevilarmaior.es.
A eficacia do acto de aprobación definitiva e a entrada en vigor do Plan de sectorización do parque empresarial de Vilarmaior aprobado quedan condicionadas á súa publicación de conformidade co establecido no artigo 82 da Lei 2/2016, do 10 de febreiro, do solo de Galicia (LSG), á inscrición do instrumento no Rexistro de Planeamento Urbanístico de Galicia de conformidade co disposto no artigo 88 da LSG e ao que dispoña para tal efecto a lexislación vixente en materia de réxime local (artigos 65.2 e 70.2 da Lei 7/1985, do 2 de abril, reguladora das bases de régimen local –entrada en vigor, logo do cumprimento dos trámites preceptivos e logo de transcorreren 15 días hábiles desde a publicación completa do texto no Boletín Oficial da provincia–).
O Plan de sectorización aprobado de xeito definitivo, como instrumento de planeamento urbanístico de desenvolvemento do Plan xeral de ordenación municipal, será inmediatamente executivo (artigo 84 LSG) tras a súa entrada en vigor, segundo o disposto no artigo 82 da LSG.
Os instrumentos de planeamento son disposicións de carácter xeral, polo que a súa aprobación definitiva non poderá ser obxecto de recurso en vía administrativa, senón tan só a través do correspondente recurso contencioso-administrativo, nos termos previstos na lexislación aplicable.
O que se publica para os efectos previstos nos artigos 82.2 da LSG e 199.2 do Decreto 143/2016, do 22 de setembro, polo que se aproba o regulamento da LSG.
Vilarmaior, 22 de outubro de 2018
Carlos Vázquez Quintián
Alcalde presidente