Visto o expediente para outorgamento de autorización administrativa previa e de construción da instalación eléctrica que a seguir se cita:

Solicitante: Soc. Coop. de Vivendas parque ofimático.

Domicilio social: Paseo de los Puentes, 16, baixo, 15004 A Coruña.

Denominación: proxecto técnico de LMTS e CT en parcela Z-42, sector S-10 do parque ofimático-A Coruña.

Situación: parcela Z-42, sector S-10 parque ofimático-A Coruña.

Características técnicas:

Liña de media tensión soterrada de 15 kV, con inicio e fin na liña de distribución (expediente IN407A 2016/17-1), condutor RHZ1 2OL 12/20 kV 3×(1×340 mm2), Al, lonxitude 40 m.

Centro de transformación soterrado compacto en edificio no prefabricado sito en parcela Z-42, sector S-10 do parque ofimático (A Coruña), cunha potencia de 400 kVA, unha relación de transformación de 15/0.42 kV e configuración 2L+1P.

Cumpridos os trámites ordenados na Lei 24/2013, do 26 de decembro (BOE núm. 310), do sector eléctrico, e no título VII, capítulo II do Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica, na Lei 5/2017, do 19 de outubro, de fomento da implantación de iniciativas empresariais, e de acordo coa Resolución do 19 de febreiro de 2014 da Dirección Xeral de Enerxía e Minas pola que se aproba o procedemento de autorización administrativa de construción (DOG núm. 54), esta xefatura territorial resolve:

Conceder a autorización administrativa previa e a autorización administrativa de construción da devandita instalación, cuxas características se axustarán en todas as súas partes ás que figuran no seu proxecto e ás condicións técnicas e de seguridade establecidas nos regulamentos de aplicación.

Esta instalación executarase no prazo dun ano, contado a partir do día seguinte ao da publicación desta resolución no Diario Oficial de Galicia.

Esta autorización outórgase sen prexuízo das concesións e autorizacións que sexan necesarias, de acordo con outras disposicións que resulten aplicables e, en especial, as relativas á ordenación do territorio e ao medio.

Contra o presente acordo, que non é definitivo en vía administrativa, cabe interpor recurso de alzada ante o conselleiro de Economía, Emprego e Industria no prazo dun mes contado a partir do día seguinte ao da súa notificación ou publicación nos termos establecidos nos artigos 112, 115, 121 e 122 da Lei 39/2015, do 1 de outubro, do procedemento administrativo común das administracións públicas, sen prexuízo de que os interesados poidan interpor calquera outro recurso que se considere pertinente.

A Coruña, 22 de outubro de 2018

Isidoro Martínez Arca
Xefe territorial da Coruña