O Pleno do Concello do Carballiño, en sesión ordinaria, que tivo lugar o día 27 de setembro de 2018, adoptou, entre outros, o seguinte acordo:
Primeiro. Aprobar definitivamente a modificación puntual do Plan parcial do polígono industrial da Uceira (O Carballiño) para reordenación e definición de usos da zona comercial, redactado polo arquitecto municipal Sergio Mascareñas Nogueiras, nos termos que constan no expediente.
Segundo. Deixar sen efecto a suspensión de outorgamento de aprobacións, autorizacións e licenzas urbanísticas nas áreas afectadas por esta tramitación, e deberanse axustar no sucesivo os terreos, as instalacións, as construcións e as edificacións ao destino que resulte da súa clasificación e cualificación e ao réxime urbanístico que consecuentemente lles sexa de aplicación derivado do novo instrumento de planeamento.
Terceiro. Comunicar o acordo de aprobación definitiva da modificación puntual do Plan parcial do polígono industrial da Uceira (O Carballiño á consellería competente en materia de urbanismo e ordenación do territorio, ao mesmo tempo que se lle dará traslado dunha copia autenticada de dous exemplares do instrumento aprobado definitivamente con todos os planos e documentos que integran o plan sobre os que recaese o acordo de aprobación definitiva, debidamente dilixenciados polo secretario do concello.
Cuarto. Publicar o acordo de aprobación definitiva do planeamento, no prazo dun mes desde a súa adopción, no Diario Oficial de Galicia. Xunto coa publicación deste acordo publicarase a indicación das medidas adoptadas para o seguimento dos efectos no ambiente da aplicación do plan e a referencia ao enderezo electrónico en que figurará o contido íntegro do plan á disposición do público, así como, cando proceda, o extracto elaborado con carácter previo á aprobación do documento, que incluirá os seguintes aspectos:
a) A xustificación da integración no plan dos aspectos ambientais.
b) A xustificación de como se tomaron en consideración no plan o estudo ambiental estratéxico, os resultados da información pública e das consultas e a declaración ambiental estratéxica, así como, se é o caso, as discrepancias xurdidas no proceso.
c) As razóns da elección da alternativa seleccionada, en relación coas alternativas consideradas e o documento que conteña a normativa e as ordenanzas, no Boletín Oficial da provincia. Neste anuncio de aprobación definitiva farase constar a remisión da documentación á consellería competente en materia de urbanismo e ordenación do territorio.
Contra o acordo de aprobación definitiva da citada modificación, que pon fin á vía administrativa, por ser unha disposición de carácter xeral, cabe interpor recurso contencioso-administrativo perante a Sala do Contencioso-Administrativo do Tribunal Superior de Xustiza de Galicia, no prazo de dous (2) meses contados a partir do día seguinte ao da publicación deste anuncio, consonte o establecido na Lei 29/1998, do 13 de xullo. Todo isto sen prexuízo de interpor calquera outro recurso que se entenda máis procedente e sexa conforme dereito.
O Carballiño, 17 de outubro de 2018
Francisco José Fumega Piñeiro
Alcalde