Por Resolución do 21 de marzo de 2016, da Dirección Xeral de Enerxía e Minas, faise público o Acordo do Consello da Xunta de Galicia do 17 de marzo de 2016 polo que se autorizan as instalacións, se aproba o proxecto de execución e se declara a utilidade pública, en concreto, do parque eólico de Carracedo, nos concellos da Pastoriza e Mondoñedo, promovido pola sociedade Norvento, S.L., e por Resolución do 24 de setembro de 2018, da Dirección Xeral de Enerxía e Minas, faise público o Acordo do Consello da Xunta de Galicia do 13 de setembro de 2018, polo que se declara a utilidade pública, en concreto, así como a prevalencia sobre diversos aproveitamentos forestais da modificación do parque eólico Carracedo.
Esta declaración de utilidade pública, de conformidade co disposto no artigo 56 da Lei 24/2013, do 26 de decembro, do sector eléctrico, leva implícita en todo caso a necesidade de ocupación dos bens ou de adquisición dos dereitos afectados e a urxente ocupación para os efectos do artigo 52 da Lei do 16 de decembro de 1954, de expropiación forzosa.
Por razón do exposto, esta xefatura territorial, en cumprimento do disposto no devandito artigo 52 da Lei de expropiación forzosa, resolveu convocar os titulares de bens e dereitos afectados cos que non se chegou a un acordo e que se relacionan no anexo, para que comparezan o vindeiro 5 de novembro no Concello da Pastoriza como punto de reunión para levar a cabo o levantamento de actas previas á ocupación.
Todos os interesados, así como as persoas que sexan titulares de calquera clase de dereitos ou intereses sobre os bens afectados, deberán acudir persoalmente ou representados por persoa debidamente autorizada, achegando os documentos acreditativos da súa titularidade e o último recibo da contribución, podendo acudir acompañados dos seus peritos e un notario, se o consideran oportuno, con gastos á súa custa.
Así mesmo, advírtese a todos os interesados afectados que poderán formular alegacións por escrito nesta xefatura territorial (rolda da Muralla, 70, 27071 Lugo) ata o momento do levantamento das actas previas, para os únicos efectos de rectificar posibles erros na relación de bens e dereitos afectados (artigo 56.2 do Regulamento da Lei de expropiación forzosa).
Desta convocatoria darase traslado a cada interesado mediante a oportuna citación individual, na cal se sinalará o día e a hora para o levantamento de actas previas. Esta publicación realízase, igualmente, para os efectos que determina o artigo 44 da Lei 39/2015, do 1 de outubro, do procedemento administrativo común das administracións públicas, cando os titulares dos predios propostos sexan descoñecidos ou se ignore o lugar de notificación.
No expediente expropiatorio Norvento, S.L. asumirá a condición de beneficiaria.
Lugo, 1 de outubro de 2018
Pilar Fernández López
Xefa territorial de Lugo