BDNS (Identif.): 414367.
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base nacional de subvencións (http://www.pap.minhap.gob.es/bdnstrans/index).
Primeiro. Persoas que poden participar na convocatoria
1. Poderá participar nesta convocatoria calquera emprendedor maior de idade, de calquera nacionalidade, que desexe implantar a súa idea ou desenvolver o seu proxecto dentro do ámbito das industrias culturais e creativas, co fin de converter a idea nunha actividade sustentable. Terán preferencia os proxectos presentados por emprendedores nados ou afincados en Galicia e os proxectos que teñan como obxectivo o seu desenvolvemento e implantación na nosa comunidade.
2. Non poderán participar na convocatoria aquelas persoas solicitantes que iniciasen unha actividade empresarial e/ou profesional para a posta en funcionamento da «idea emprendedora» a que se refire o artigo 5 das bases, sempre que medien máis de seis meses desde o inicio da dita actividade empresarial e/ou profesional.
3. A persoa solicitante non poderá estar incursa en ningunha clase de inhabilitación para a obtención de axudas previstas nos números 2 e 3 do artigo 10 da Lei 9/2007, do 13 de xuño, de subvencións de Galicia, e deberá estar ao día no pagamento das obrigas por reintegro de subvencións, conforme o artigo 10.2.g) da devandita lei e o artigo 9 do Regulamento de subvencións de Galicia, aprobado polo Decreto 11/2009, do 8 de xaneiro.
Segundo. Obxecto
Impulsar o desenvolvemento de novas ideas emprendedoras relacionadas coas industrias culturais e que queiran desenvolver a súa actividade no Gaiás Cidade da Cultura de Galicia: deseñadores-ilustradores, profesionais da comunicación, produtores, xestores culturais, programadores de aplicacións informáticas e de proxectos culturais na internet e calquera outra persoa con vinculación no emprendemento cultural.
Terceiro. Bases reguladoras
Resolución do 1 de xuño de 2018 pola que se aproban as bases reguladoras relativas á convocatoria 2018 do programa dos premios Emprende Cultura Gaiás-Sixto Seco.
Publícase o extracto das bases reguladoras relativas á convocatoria para 2018 do programa dos premios Emprende Cultura Gaiás-Sixto Seco, cuxo texto completo se pode consultar na sede electrónica da Xunta de Galicia (https://sede.xunta.gal) e na páxina web da Fundación Cidade da Cultura de Galicia (www.cidadedacultura.gal).
Cuarto. Premios
Os premios que se outorgarán á mellor idea emprendedora presentada en cada unha das modalidades consisten en:
A) Dous premios en metálico dotados con tres mil euros (3.000,00 €) cada un (un premio por categoría e proxecto seleccionado); o proxecto gañador en cada unha das categorías sinaladas no punto 5 recibirá tres mil euros en metálico para o desenvolvemento da idea premiada e diploma acreditativo. Só haberá un premio por categoría, polo que, no caso de empate entre varios candidatos na mesma modalidade, o premio en metálico repartirase entre estes gañadores/as.
B) Posibilidade de incorporación gratuíta durante doce meses ao espazo de cotraballo Centro de Emprendemento Creativo de Galicia da Cidade da Cultura de Galicia.
Quinto. Prazo de presentación de solicitudes
O prazo de presentación das solicitudes e da documentación será dun mes, que se contará a partir do seguinte ao da publicación do extracto da convocatoria no Diario Oficial de Galicia.
Santiago de Compostela, 7 de setembro de 2018
Ana Isabel Vázquez Reboredo
Directora xerente da Fundación Cidade da Cultura de Galicia