De conformidade co previsto no artigo 8.4 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade á Resolución do 20 de agosto de 2018, do Servizo Galego de Saúde, pola que se encomenda á Axencia Galega para a Xestión do Coñecemento en Saúde a xestión da formación en abordaxe de disfuncións de solo pelviano feminino dirixido a matronas e fisioterapeutas.
– Actividade: a axencia asumirá a xestión das inscricións para a asistencia de matronas e fisioterapeutas do Servizo Galego de Saúde a actividades formativas relacionadas coa abordaxe de disfuncións do solo pelviano feminino no ámbito da atención primaria da saúde.
Tamén asumirá a programación, planificación, acreditación e contratación de recursos formativos, humanos e materiais para a realización de dúas edicións dun obradoiro teórico práctico de 16 horas de duración propostas pola Subdirección Xeral de Planificación e Programación Asistencial, dentro dos límites orzamentarios establecidos.
– Natureza e alcance da xestión encomendada: a encarga ten natureza de encarga a medio propio, de acordo co disposto nos artigos 47 e seguintes da Lei 16/2010, do 17 de decembro, e no artigo 13 da Lei 14/2013, do 26 de decembro, de racionalización do sector público autonómico. Tal condición de medio propio está recollida no artigo 5 do Decreto 112/2015, do 31 de xullo, polo que se crea a Axencia Galega para a Xestión do Coñecemento en Saúde e se aproban os seus estatutos.
– Prazo de vixencia: ata o 31 de decembro de 2018.
Santiago de Compostela, 21 de agosto de 2018
Jesús Vázquez Almuíña
Presidente do Servizo Galego de Saúde