Para os efectos previstos no artigo 44 da Lei 39/2015, do 1 de outubro, do procedemento administrativo común das administracións públicas, faise público que o Xurado Provincial de Montes Veciñais en Man Común de Lugo, na sesión do día 14 de xuño de 2018, baixo a presidencia de María Olga Iglesias Fontal e coa asistencia dos vogais Josefina Pereira de la Riera e Antonio José López-Acuña Herrero, e do secretario en funcións Juan Carlos López Seijas, tomou o seguinte acordo:
Monte Rodela, Gándaras de Castro e Granda de Abelleira (expediente 42/79), pertencente aos veciños da parroquia de Loentia, e monte Gándaras de Castro, Coutado e Campela (expediente 44/79), pertencente aos veciños da parroquia de Bendia, ambos no termo municipal de Castro de Rei. Na reunión celebrada polo xurado con data do 6 de marzo de 2018, acordouse aprobar o deslindamento por avinza practicado por estas dúas comunidades e proceder ás oportunas modificacións nos expedientes respectivos. Con data do 13 de abril de 2018, ten entrada escrito presentado por Dositeo Barja Barja, en que interpón recurso de reposición contra o devandito acordo e solicita, con base nas fundamentacións que expón, a súa estimación e que se revise o expediente e non se teña en conta o deslindamento proposto. O recurso fundaméntase, de xeito resumido, no seguinte:
• Que os planos achegados coa resolución do xurado non recoñecen a verdadeira titularidade dos montes, xa que os documentos antigos reflicten que estes montes son propiedade dos veciños de Loentia.
• Manifesta que actualmente esta situación está a ser tratada na vía xudicial co fin de esclarecer a titularidade do monte.
Non achega ningunha documentación.
Dado traslado do recurso ás comunidades afectadas, recíbese, con data do 4 de maio de 2018, escrito de Mª Carmen Lázare González, como presidenta da comunidade de Loentia, en que, en resumo, manifesta:
• Que carece de razón o contido do escrito presentado, posto que o deslindamento practicado e aprobado polo Xurado reflicte non só a realidade histórica do patrimonio veciñal senón tamén a vontade actual dos comuneiros, que en todas as reunións realizadas aprobaron por maiorías significativas as propostas de acordo e deslindamento.
• Non é certo que a cuestión do deslindamento estea pendente de resolución xudicial, pois o Acordo do 9 de abril de 2017, polo que a asemblea xeral adoptou o acordo, é firme ao non ter sido impugnado. Dositeo Barja Barja unicamente impugnou a convocatoria da asemblea do 13 de maio de 2016, en que se autorizou a presidenta para alcanzar acordos de deslindamento cos montes estremeiros.
Coa mesma data ten entrada escrito de Telmo Fernández Iglesias, como presidente de Bendia, en que manifesta, en resumo:
• Que non é certo o manifestado polo recorrente, posto que o deslindamento realizado reflicte con exactitude a realidade histórica das estremas entre os montes, e é tamén a vontade actual dos comuneiros das respectivas comunidades.
Examinado o devandito recurso, o Xurado, por unanimidade, acorda inadmitir o recurso de reposición interposto, de conformidade cos fundamentos que se recollen na correspondente resolución do recurso.
Contra este acordo poderá interpoñerse recurso contencioso-administrativo, no prazo de dous meses, desde a súa publicación no Diario Oficial de Galicia, perante o Xulgado do Contencioso-Administrativo de Lugo, de conformidade cos artigos 123 e 124 da Lei 39/2015, do procedemento administrativo común das administracións públicas, e co artigo 46 da Lei 29/1998, do 13 de xullo, da xurisdición contencioso-administrativa.
Lugo, 29 de xuño de 2018
María Olga Iglesias Fontal
Presidenta do Xurado Provincial de Clasificación de Montes
Veciñais en Man Común de Lugo