De conformidade co disposto nos artigos 44 e 46 da Lei 39/2015 (BOE nº 236, do 2 de outubro), do procedemento administrativo común das administracións públicas, notifícaselle á mercantil Galicia Mar Renovables, S.L., mediante a publicación no Boletín Oficial del Estado, Resolución do presidente de Portos de Galicia do 3 de abril de 2018 que decreta a caducidade da concesión administrativa outorgada o 28 de maio de 2011 con destino á construción dunha planta para a ensamblaxe de sistemas de xeración de enerxía undimotriz expedidos por vía marítima no porto de Cariño, por non ser posible a notificación no domicilio.

Así mesmo, este anuncio publicarase no Diario Oficial de Galicia, ben que a eficacia do acto notificado quedará supeditada á súa publicación no Boletín Oficial del Estado.

A resolución emítese pola concorrencia das causas imperativas de caducidade previstas na condición 45 do título, alíneas b) e c).

A caducidade determina a extinción anticipada do título, a reversión da superficie ocupada e das instalacións ao dominio público portuario, o que se efectuará nun prazo máximo de tres (3) meses contado desde a publicación desta cédula, e a incautación da totalidade das garantías que se constituísen para responder da explotación ou construción da concesión.

Para ao seu exame, o expediente completo está nas dependencias dos servizos centrais de Portos de Galicia en Área Central, praza de Europa, 5-A, 6º, Santiago de Compostela.

A presente resolución esgota a vía administrativa, e contra ela poderase interpor recurso contencioso-administrativo nun prazo de dous (2) meses contados desde o día seguinte ao da súa publicación no Boletín Oficial del Estado, perante o Xulgado do Contencioso-Administrativo de Santiago de Compostela que corresponda, ou recurso potestativo de reposición perante a Presidencia de Portos de Galicia, no prazo dun mes contado desde a mesma data.

Santiago de Compostela, 10 de abril de 2018

José Juan Durán Hermida
Presidente de Portos de Galicia