Mediante Resolución reitoral do 5 de xullo de 2010 (DOG núm. 140, do 23 de xullo) estableceuse a composición permanente da mesa de contratación da Universidade de Vigo e fixáronse as súas normas de funcionamento.

O 9 de marzo de 2018 entrou en vigor a Lei 9/2017, do 8 de novembro, de contratos do sector público. Nesta lei establécese que, excepto no caso en que a competencia para contratar corresponda a unha xunta de contratación, nos procedementos aberto, aberto simplificado, restrinxido, de diálogo competitivo, de licitación con negociación e de asociación para a innovación, os órganos de contratación das administracións públicas estarán asistidos por unha mesa de contratación. Asemade, e ao respecto tanto da composición como do funcionamento da mesa de contratación, a lei establece unha serie de limitacións en canto ás persoas que a poden integrar ou emitir informes.

Polo tanto, faise necesario modificar a dita resolución reitoral co obxecto de acomodar a composición da mesa de contratación ao novo marco xurídico creado pola referida lei.

Por todo o anteriormente exposto, acórdase ditar a seguinte resolución, mediante a cal modifícase o punto primeiro da Resolución do 5 de xullo de 2010 (modificada pola Resolución reitorial do 26 marzo de 2018, que queda sen efecto) pola que se fai pública a composición e funcionamento da mesa de contratación permanente da Universidade de Vigo que queda redactada nos seguintes termos:

«Primeiro. Composición da mesa de contratación

Desígnanse con carácter permanente os membros da mesa de contratación da Universidade de Vigo que se sinalan a seguir:

– Presidente/a: a persoa que ocupe a xefatura do Servizo de Contabilidade, Orzamentos e Tesouraría, que poderá ser suplida en caso de vacante, ausencia ou enfermidade pola persoa que designe o reitor.

– Vogal: a persoa que ocupe a Vicexerencia en materia económica e que poderá ser suplida en caso de vacante, ausencia ou enfermidade pola persoa que designe o reitor.

– Vogal: o/a presidente/a do Consello Social ou persoa en que delegue.

– Vogal: a persoa que ocupe a xefatura do Servizo de Asesoría Xurídica ou letrado/a dela.

– Vogal: o/a xefe/a do Servizo de Control Interno ou funcionario/a do servizo que o substitúa.

– Secretario/a: o/a xefe/a de Servizo de Xestión Económica e Contratación ou funcionario/a do servizo que o substitúa.

Esta designación enténdese sen prexuízo das que de xeito específico se poidan efectuar para a adxudicación de determinados contratos».

Esta resolución entra en vigor o día seguinte ao da súa publicación no Diario Oficial de Galicia.

Vigo, 10 de abril de 2018

Salustiano Mato de la Iglesia
Reitor da Universidade de Vigo