Como consecuencia da entrada en vigor da Lei 7/2012, do 28 de xuño, de montes de Galicia, e coa finalidade de levar a cabo o establecido na disposición transitoria décimo terceira con respecto á revisión de bosquexos de montes veciñais en man común, o xurado, na reunión que tivo lugar o 17 de setembro de 2012, acordou solicitar ao Servizo de Montes a realización de propostas de revisión e elaboración de cartografías actualizadas dos montes veciñais da provincia, susceptibles de tal adecuación.

En relación con isto, na sesión que tivo lugar polo xurado provincial o día 6 de marzo de 2018, figuran os seguintes acordos:

Monte Carracedo e Rioseco (expediente 35/78), pertencente aos veciños da parroquia de Bretoña, no termo municipal da Pastoriza, clasificado polo xurado con data do 5 de febreiro de 1979. Con data do 23 de febreiro de 2018, o Servizo de Montes elabora unha proposta de novo bosquexo para o monte Carracedo e Rioseco, axustando a superficie a unha cartografía actualizada na súa zona estremeira con zonas de concentración parcelaria, quedando o monte cunha superficie de 263,03 hectáreas de conformidade coa nova cartografía. Examinada a devandita proposta, o xurado, por unanimidade, acorda aceptala e proceder á oportuna incorporación dos bosquexos aos expedientes, e constancia segundo o Rexistro de Montes Veciñais en Man Común, de conformidade co dito anteriormente.

Monte Coto das Louseiras de Xemil (expediente 36/78), pertencente aos veciños do lugar de Xemil, da parroquia de Bretoña, no termo municipal da Pastoriza, clasificado polo xurado con data do 5 de febreiro de 1979. Con data do 23 de febreiro de 2018, o Servizo de Montes elabora unha proposta de novo bosquexo para o monte Coto das Louseiras de Xemil, axustando a superficie a unha cartografía actualizada na súa zona estremeira con zonas de concentración parcelaria, quedando o monte cunha superficie de 224,80 hectáreas de conformidade coa nova cartografía. Examinada a devandita proposta, o xurado, por unanimidade, acorda aceptala e proceder á oportuna incorporación do bosquexo ao expediente, e constancia segundo o Rexistro de Montes Veciñais en Man Común, de conformidade co dito anteriormente.

Este anuncio publicarase no Diario Oficial de Galicia de acordo co establecido na disposición décimo terceira da Lei 7/2012, do 28 de xuño, de montes de Galicia.

Lugo, 21 de marzo de 2018

María Olga Iglesias Fontal
Presidenta do Xurado Provincial de Clasificación
de Montes Veciñais en Man Común de Lugo