O Decreto 191/2011, do 22 de setembro, de organización e funcionamento dos rexistros da Administración xeral e das entidades públicas instrumentais da Comunidade Autónoma de Galicia, dispón no seu artigo 8.2 que a creación, modificación ou supresión das oficinas de rexistro auxiliares se fará mediante orde da consellería competente en materia de administracións públicas, por proposta da consellería ou entidade correspondente, logo de informe da Oficina de Rexistro Xeral.
No anexo I do Decreto 191/2011, do 22 de setembro, de organización e funcionamento dos rexistros da Administración xeral e das entidades públicas instrumentais da Comunidade Autónoma de Galicia (DOG núm. 196, do 13 de outubro), figura a listaxe inicial de oficinas de rexistro. A relación actualizada delas está á disposición da cidadanía no portal institucional www.xunta.gal, segundo o previsto na disposición adicional segunda dese decreto.
Debido a variacións de localización xurdiu a necesidade de suprimir un rexistro auxiliar, por non ser necesario no novo enderezo, ou de variar a localización doutra oficina de rexistro para reflectir unha nova localización.
Polo exposto e en uso das facultades que me confiren os artigos 34.6 e 38 da Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo 1. Supresión dunha oficina de rexistro auxiliar
Suprímese o Rexistro Auxiliar da Dirección Xeral de Mobilidade.
Artigo 2. Modificación de oficinas de rexistro auxiliar
Modifícase o enderezo do Rexistro Auxiliar do Equipo de Valoracion e Orientación (EVO), que pasa a estar na rúa Queixumes dos Pinos, 2, Salgueiriños, Santiago de Compostela.
Disposición derradeira primeira
O establecido nesta orde non suporá incremento de gasto.
Disposición derradeira segunda
Esta orde producirá efectos o mesmo día da súa publicación no Diario Oficial de Galicia.
Nesa mesma data, actualizarase para a cidadanía a relación de oficinas de rexistro auxiliar, existente na páxina web institucional.
Santiago de Compostela, 7 de febreiro de 2018
Alfonso Rueda Valenzuela
Vicepresidente e conselleiro de Presidencia,
Administracións Públicas e Xustiza
