Feitos.

Primeiro. A Orde do 23 de agosto de 2017, da Consellería de Infraestruturas e Vivenda, publicada no Diario Oficial de Galicia (en diante, DOG) núm. 167, do 4 de setembro de 2017, aprobou as bases reguladoras das subvencións do Programa de instalación de ascensores e outros dispositivos de accesibilidade en edificios de tipoloxía residencial colectiva, nas súas vivendas dúplex e en vivendas unifamiliares, e as convocou para o ano 2017, con carácter plurianual.

Segundo.- No seu artigo 14 indícase que as resolucións de concesión se ditarán por rigorosa orde cronolóxica de entrada das solicitudes no rexistro da correspondente área provincial do Instituto Galego da Vivenda e Solo (en diante, IGVS), ata esgotar o crédito orzamentario dispoñible.

Terceiro. Unha vez revisadas e ordenadas todas as solicitudes presentadas coa documentación completa, a última solicitude que se puido conceder antes do esgotamento do crédito tivo a data do 24 de outubro de 2017, ás 19.03 horas.

Consideracións xurídicas.

O artigo 25 da Orde do 23 de agosto de 2017 establece que o momento do esgotamento do crédito será publicado no DOG mediante resolución da persoa titular da Dirección Xeral do IGVS.

En virtude do exposto anteriormente, e de acordo co establecido no artigo 31.4 da Lei 9/2007, do 13 de xuño, de subvencións de Galicia,

RESOLVO:

Dar a coñecer o esgotamento, con data do 24 de outubro de 2017, ás 19.03 horas, do crédito autorizado no exercicio 2017 para sufragar as subvencións do Programa de instalación de ascensores e outros dispositivos de accesibilidade en edificios de tipoloxía residencial colectiva, nas súas vivendas dúplex e en vivendas unifamiliares.

Santiago de Compostela, 5 de decembro de 2017

Heriberto García Porto
Director xeral do Instituto Galego da Vivenda e Solo