No BOP de Ourense do 27 de setembro de 2017 publicáronse íntegras as bases do concurso para a provisión de postos de traballo de segunda actividade vacantes na relación de postos de traballo da Deputación Provincial de Ourense.
Os postos que se convocan son os seguintes:
– Un (1) posto de ordenanza do Negociado de Réxime Interior.
– Un (1) posto de porteiro do equipo de portaría e limpeza do Centro Cultural Marcos Valcárcel.
– Un (1) posto de operario de almacén do taller de maquinaria.
– Dous (2) postos de sereno do parque móbil e de maquinaria.
As solicitudes presentaranse no Rexistro Xeral da Deputación durante o prazo dos 15 días naturais seguintes ao da publicación do anuncio da convocatoria no BOE, en modelo oficial que se facilitará no Negociado de Control e Administración do Servizo de Recursos Humanos. Así mesmo, poderán presentarse na forma que determina o artigo 16 da Lei 39/2015.
A Deputación facilitará copia das bases e modelo oficial de solicitudes nas oficinas do Rexistro Xeral, rúa Progreso, 32 (Ourense), e tamén desde a páxina web www.depourense.es.
Os sucesivos anuncios relativos a esta convocatoria publicaranse exclusivamente no taboleiro provincial de edictos en todo caso, na páxina web www.depourense.es e no BOP de Ourense cando proceda de conformidade coas bases do procedemento.
Publícase isto de conformidade co disposto no artigo 233.3 da Lei 5/1997, de Administración local de Galicia.
Ourense, 29 de setembro de 2017
José Manuel Baltar Blanco
Presidente da Deputación Provincial de Ourense