Examinado o expediente de declaración de interese galego e inscrición no Rexistro de Fundacións de Interese Galego da Fundación Amedis, unha vez vista a proposta do subdirector xeral de Coordinación Administrativa, dítase esta resolución baseada nos feitos e fundamentos de dereito que se expoñen a seguir:
Feitos:
Primeiro. María del Carmen Álvarez Martínez, presidenta do padroado da Fundación, formulou solicitude de clasificación, declaración de interese galego e inscrición no Rexistro de Fundacións de Interese Galego.
Segundo. A Fundación Amedis foi constituída en escritura pública outorgada en Vigo o 24.5.2017, emendada por dilixencia do 20.6.2017, ante o notario Pablo Rueda Rodríguez-Vila, co número de protocolo 1.013, por María del Carmen Álvarez Martínez e Clemente Pousa Pereira.
Terceiro. Segundo consta no artigo 6 dos seus estatutos, a Fundación ten por obxecto traballar pola mellora da calidade de vida das persoas con discapacidade intelectual en todas as etapas e ámbitos da súa vida e conseguir unha integración social real, recoñecendo que o primeiro dereito de calquera persoa discapacitada é chegar a non selo.
A Fundación poderá exercer a tutela daqueles menores que teñan discapacidade intelectual nos casos en que así sexa requirido.
Cuarto. Na escritura de constitución constan os aspectos relativos á personalidade das persoas fundadoras e a súa capacidade e vontade de constituír a Fundación conforme os preceptos da Lei 12/2006, do 1 de decembro, de fundacións de interese galego (DOG núm. 242, do 19 de decembro).
Quinto. Nos estatutos da Fundación consta a denominación e natureza, obxecto e actividades, o domicilio e ámbito de actuación, as regras para a aplicación dos recursos aos fins fundacionais e para a determinación dos beneficiarios, a composición do padroado, as regras para a designación e substitución dos seus membros, as causas de cesamento, as súas atribucións e a forma de deliberar e de adoptar acordos.
Sexto. O padroado inicial da Fundación está formado por María del Carmen Álvarez Martínez como presidenta, Clemente Pousa Pereira como vicepresidente e Jesús Díaz Castro como vogal. Designan a Raquel Pérez Salgado como secretaria con voz pero sen voto.
Sétimo. A comisión integrada polos secretarios xerais técnicos de todas as consellerías na xuntanza do día 4.7.2017 elevoulle ao vicepresidente e conselleiro de Presidencia, Administracións Públicas e Xustiza proposta de clasificación como de interese asistencial da Fundación Amedis consonte as materias que constitúen o seu obxecto fundacional, polo que, cumpríndose os requisitos exixidos na Lei 12/2006, do 1 de decembro, e de conformidade co establecido no artigo 47 da antedita lei, no artigo 51 do Decreto 14/2009, do 21 de xaneiro, polo que se aproba o Regulamento de fundacións de interese galego e no artigo 7 do Decreto 15/2009, do 21 de xaneiro, polo que se aproba o Regulamento do Rexistro de Fundacións de Interese Galego, o protectorado será exercido pola Consellería de Política Social.
Oitavo. De conformidade coa dita proposta, por Orde da Vicepresidencia e Consellería de Presidencia, Administracións Públicas e Xustiza do 6 de xullo de 2017, clasificouse como de interese asistencial á Fundación Amedis, e adscribiuse á Consellería de Política Social para os efectos do exercicio das funcións de protectorado.
Fundamentos de dereito:
Primeiro. O artigo 34 da Constitución española recoñece o dereito de fundación para fins de interese xeral, e o artigo 27.26 do Estatuto de autonomía para Galicia establece que é competencia exclusiva da Comunidade Autónoma galega o réxime das fundacións de interese galego.
Segundo. De acordo co disposto no artigo 7.2 do Decreto 15/2009, do 21 de xaneiro, en relación co Decreto 176/2015, do 3 de decembro, polo que se establece a estrutura orgánica da Consellería de Política Social, correspóndelle a esta consellería a declaración de interese galego mediante resolución publicada no Diario Oficial de Galicia e a inscrición no Rexistro de Fundacións de Interese Galego, da Fundación Amedis, así como o exercicio das funcións de protectorado e as demais que correspondan á Xunta de Galicia, de conformidade co indicado no dito regulamento.
Terceiro. Á vista do disposto na Lei 12/2006, do 1 de decembro, e nos decretos 14/2009, do 21 de xaneiro, e 15/2009, do 21 de xaneiro, e despois do informe de idoneidade dos fins e de adecuación e suficiencia da dotación, resultan cumpridos os requisitos establecidos pola normativa vixente para a declaración de interese galego e inscrición no Rexistro de Fundacións de Interese Galego, sección da Consellería de Política Social, da Fundación Amedis, polo que:
RESOLVO:
Primeiro. Declarar de interese galego a Fundación Amedis.
Segundo. Ordenar a inscrición da Fundación Amedis, no Rexistro de Fundacións de Interese Galego, sección da Consellería de Política Social.
Terceiro. Esta Fundación queda sometida ao disposto na Lei 12/2006, do 1 de decembro, no Decreto 14/2009, do 21 de xaneiro, e no Decreto 15/2009, do 21 de xaneiro, así como na demais normativa que resulte de aplicación, onde se establecen especialmente as obrigas de dar publicidade suficiente do seu obxecto e actividades, ausencia de ánimo de lucro na prestación dos seus servizos, e presentar anualmente a documentación contable e plan de actuación ante o protectorado, que será exercido por esta Consellería de Política Social.
Contra esta resolución, que non pon fin á vía administrativa, pode interpoñerse recurso de alzada ante o conselleiro de Política Social, no prazo dun mes contado desde o día seguinte ao da súa publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas.
Santiago de Compostela, 10 de agosto de 2017
Francisco Javier Abad Pardo
Secretario xeral técnico da Consellería de Política Social