O 30.1.2017 recibiuse documentación correspondente ao expediente de referencia, remitida polo Concello de Pol, para os efectos da súa aprobación definitiva, consonte o establecido na disposición transitoria segunda da Lei 2/2016, do 10 de febreiro, do solo de Galicia. Os plans aprobados provisionalmente antes da entrada en vigor desta lei poderán continuar a súa tramitación ata a súa aprobación definitiva segundo o teor do disposto na Lei 9/2002, do 30 de decembro, de ordenación urbanística e protección do medio rural de Galicia (LOUG).
No seu conxunto, a documentación remitida está integrada polo proxecto técnico de delimitación, datado en xuño de 2016, redactado pola consultora Monsa Urbanismo, S.L., así coma a documentación administrativa acreditativa da tramitación realizada.
Analizada a documentación achegada polo concello e vista a proposta subscrita pola Subdirección Xeral de Urbanismo, resulta:
I. Antecedentes.
a) O 4.3.2016 a Secretaría Xeral de Ordenación do Territorio e Urbanismo ditou resolución sobre un proxecto de delimitación precedente.
b) Despois do cumprimento do requirido, o Concello Pleno o 20.12.2016 adoptou acordo de aprobación provisional do proxecto de delimitación.
c) O concello de Pol carece de planeamento xeral, e dispón dun proxecto de delimitación de solo urbano aprobado o 1.7.1980. Os terreos exteriores a el (como os afectados pola presente delimitación) réxense polas normas de aplicación directa da LOUG e, no que non se opón a estas, polas normas complementarias e subsidiarias de planeamento provincial.
II. Aspectos xerais. Contido.
Proponse a delimitación, como núcleo rural complexo, do asentamento poboacional dos Porrás, cunha superficie bruta aproximada de 2,48 ha, na cal se diferencian unha área de núcleo rural histórico-tradicional (NRHT) e dúas de núcleo rural común (NRC), que ocupan unha superficie bruta global de 1,01 ha e 1,47 ha, respectivamente.
O proxecto delimita o núcleo, determina as aliñacións e as zonas edificables, regulando as condicións de uso e edificación, e contén un catálogo que inclúe o asentamento no seu conxunto de 3 construcións tradicionais (2 hórreos e unha edificación auxiliar). Non se identifican terreos destinados a dotacións.
III. Observacións.
Analizado o documento, púidose observar o cumprimento da resolución da SXOTU do 4.3.2016, nomeadamente:
– (Aptdo. III.1) da RSXOTU): incorporouse a prescrición relativa ao patrimonio cultural no número 2.2 da memoria da nova versión do proxecto.
– (Aptdo. III.2) da RSXOTU): eliminouse da delimitación unha parcela, parte doutra e prohibiuse a división destas, polo que acada o grao de consolidación requirido.
De acordo co punto 2 da disposición adicional segunda da LOUG, e co artigo 3.a en relación coa disposición transitoria segunda do Decreto 129/2015, do 8 de outubro, polo que se establece a estrutura orgánica das consellerías da Xunta de Galicia, a competencia para resolver sobre a aprobación definitiva dos expedientes de delimitación de solo de núcleos rurais corresponde á Dirección Xeral de Ordenación do Territorio e Urbanismo.
IV. Resolución.
Visto canto antecede,
RESOLVO:
1. Aprobar definitivamente o proxecto de delimitación do núcleo rural dos Porrás, no concello de Pol.
2. Contra esta resolución cabe interpoñer recurso contencioso-administrativo ante o Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, de conformidade co disposto nos artigos 10 e 46 da Lei 29/1998, do 13 de xullo, reguladora da xurisdicción contencioso-administrativa.
3. Notifíquese ao concello e publíquese no Diario Oficial de Galicia.
Santiago de Compostela, 16 de marzo de 2017
María Encarnación Rivas Díaz
Directora xeral de Ordenación do Territorio e Urbanismo
