Mediante Lei orgánica 16/1995, do 27 de decembro, lévase a cabo a transferencia de competencias de titularidade estatal á Comunidade Autónoma de Galicia, utilizando a vía prevista no artigo 150.2 da Constitución. En concreto, no seu artigo 3, transfírense as competencias de desenvolvemento lexislativo e execución en materia de corporacións de dereito público representativas de intereses económicos e profesionais, no marco da lexislación básica do Estado.

A propia lei orgánica prevé, tal como expón o mandato constitucional, a transferencia de servizos necesarios, que se leva a cabo de forma efectiva a través do Real decreto 1643/1996, do 5 de xullo, de traspaso de funcións e servizos da Administración do Estado en materia de colexios oficiais ou profesionais.

Tendo en conta o dito traspaso, o Decreto 337/1996 estableceu a asunción de funcións transferidas á Comunidade Autónoma de Galicia polo Real decreto 1643/1996, asignándolle as funcións á Consellería de Xustiza, Interior e Relacións Laborais (na actualidade Vicepresidencia e Consellería de Presidencia, Administracións Públicas e Xustiza, segundo a estrutura establecida no Decreto 72/2013, do 25 de abril).

A Lei 11/2001, do 18 de setembro, de colexios profesionais da Comunidade Autónoma de Galicia, ditada en virtude da devandita competencia, regula no seu artigo 13 o procedemento de modificación de denominación dos colexios profesionais, atribuíndo facultades de iniciativa ao propio colexio, á Administración autonómica ou ao consello galego respectivo, sinalando que a aprobación do cambio de denominación se realizará por decreto do Consello da Xunta de Galicia.

En relación coa aprobación dos estatutos, establece a mesma norma no seu artigo 16 en relación co 18 que os colexios profesionais gozarán de autonomía para a elaboración e aprobación dos seus estatutos, sen máis límites que os establecidos polo ordenamento xurídico.

O Colexio acordou, en asemblea xeral que tivo lugar o 17 de decembro de 2016, a modificación da denominación e a aprobación dos seus estatutos que foron presentados ante a Vicepresidencia e Consellería de Presidencia, Administracións Públicas e Xustiza, para os efectos da súa cualificación de legalidade, aprobación definitiva e inscrición no rexistro de colexios, de conformidade co disposto na antedita Lei 11/2001.

En virtude do sinalado, por proposta do vicepresidente e conselleiro de Presidencia, Administracións Públicas e Xustiza, logo da deliberación do Consello da Xunta de Galicia na súa reunión do vinte e dous de xuño de dous mil dezasete,

DISPOÑO:

Artigo 1. Modificación da denominación

Aprobar a modificación da denominación do Colexio Oficial de Enxeñeiros Técnicos de Minas de Galicia, que pasa a denominarse Colexio Oficial de Enxeñeiros Técnicos e Graos en Minas e Enerxía de Galicia.

Artigo 2. Aprobación dos estatutos

Aprobar os estatutos do Colexio Oficial de Enxeñeiros Técnicos e Graos en Minas e Enerxía de Galicia, que figuran como anexo ao presente decreto.

Artigo 3. Publicación e inscrición

Ordenar a súa publicación no Diario Oficial de Galicia e a inscrición correspondente no Rexistro de Colexios Profesionais da Comunidade Autónoma de Galicia.

Disposición derrogatoria única. Derrogación dos estatutos anteriores

Quedan derrogados os anteriores estatutos que foron aprobados por Decreto 355/2002, do 5 de decembro, e cantas disposicións de igual ou inferior rango se opoñan ao disposto no presente decreto.

Disposición derradeira única. Entrada en vigor

Este decreto entrará en vigor o día seguinte ao da súa publicación no Diario Oficial de Galicia.

Santiago de Compostela, vinte e dous de xuño de dous mil dezasete

Alberto Núñez Feijóo
Presidente

Alfonso Rueda Valenzuela
Vicepresidente e conselleiro de Presidencia, Administracións Públicas e Xustiza

ANEXO
Estatutos do Colexio Oficial de Enxeñeiros Técnicos
e Graos en Minas e Enerxía de Galicia

TÍTULO I
Disposicións xerais

Artigo 1. Natureza xurídica

1. O Colexio Oficial de Enxeñeiros Técnicos e Graos en Enerxía e Minas de Galicia (en diante o Colexio) é unha corporación de dereito público de carácter profesional, amparada pola lei, con personalidade xurídica propia, e que se rexerá segundo o previsto no artigo 36 da Constitución española, polas leis e disposicións vixentes na materia e polas prescricións dos presentes estatutos.

2. O Colexio ten plena capacidade para o cumprimento dos seus fins. En consecuencia, e de acordo coa legalidade vixente, pode adquirir, vender, allear, posuír, reivindicar, permutar, gravar toda clase de bens e dereitos, celebrar contratos, obrigarse e exercitar accións e interpoñer recursos en todas as vías e xurisdicións para o cumprimento dos seus fins.

3. O Colexio funcionará baixo o principio de estrutura interna democrática, independente das Administracións públicas, sen prexuízo das relacións de dereito público que con elas lle corresponda.

Artigo 2. Relacións coa Administración

O Colexio, nas cuestións relativas aos aspectos institucionais e corporativos relaciónase coa Administración da Comunidade Autónoma de Galicia a través da consellería competente en materias de colexios profesionais, e nas cuestións referentes ao contido da profesión ou actividade profesional coa consellería competente por razón da materia. A relación coa Administración do Estado será a través do Consello Xeral de Colexios de Enxeñeiros Técnicos e Graos en Minas e Enerxía a que pertence.

Artigo 3. Ámbito territorial e domicilio

O ámbito territorial de Colexio é o correspondente ás provincias da Coruña, Lugo, Ourense, e Pontevedra, que constitúen a Comunidade Autónoma de Galicia. O seu domicilio e sede radica en Santiago de Compostela, rúa Alejandro Novo González, nº 4 baixo, sen prexuízo de ter reunións en calquera lugar do seu ámbito territorial, podendo establecerse oficinas administrativas territoriais.

Artigo 4. Fins

Son fins esenciais do Colexio os que a título enunciativo e non limitativo se relacionan a seguir:

1. A ordenación, no ámbito da súa competencia, e de acordo co establecido polas leis, do exercicio da profesión de enxeñeiro técnico de Minas, en todas as súas formas e especialidades e a representación exclusiva desta profesión conforme o establecido na normativa vixente, así como a protección dos intereses dos consumidores e usuarios, todo isto sen prexuízo das competencias das administracións públicas por razón da relación funcional, nin das organizacións sindicais e patronais no ámbito específico das súas funcións.

2. A promoción, salvagarda e observancia dos principios deontolóxicos e éticos da profesión de enxeñeiro técnico de Minas e da súa dignidade e prestixio.

3. A promoción e fomento do progreso das actividades propias da profesión, do desenvolvemento científico e técnico, así como da solidariedade profesional e do servizo da profesión á sociedade.

4. A colaboración cos poderes públicos na consecución dos dereitos individuais e colectivos da profesión recoñecidos pola Constitución aos colexios profesionais.

5. Favorecer os ensinos técnicos profesionais e de investigación relacionadas coa carreira, facilitando a formación de titulados universitarios aptos para as súas diversas funcións, promovendo, para o efecto, o entendemento entre os centros de ensinos e as empresas, con obxecto de obter o máximo nivel intelectual, cultural e de aplicación dos enxeñeiros técnicos de Minas e titulados de grao de acordo co Real decreto 1393/2007, do 29 de outubro, polo que se establece a ordenación dos ensinos universitarios oficiais e futuras modificacións.

O cumprimento do devandito fin desenvolverase no ámbito estritamente profesional, quedando excluídas aquelas actividades que a Constitución atribúe especificamente a outros órganos e institucións.

Artigo 5. Funcións

Para o cumprimento dos devanditos fin, o Colexio exercerá as funcións encomendadas na lexislación estatal e autonómica e como propias as seguintes:

1. Facilitar aos colexiados o exercicio da profesión, procurando a irmandade entre todos eles.

2. Asesorar a Administración, institucións, entidades e particulares, en materia da súa competencia, emitindo informes e resolvendo as consultas que lle sexan formuladas.

3. Informar dos proxectos de lei e as disposicións de calquera rango que teñan incidencia na actividade dos colexiados ou que se refiran ás condicións xerais da función profesional dos enxeñeiros técnicos e graos en Minas e Enerxía.

4. Ter no seu ámbito a representación e defensa do Colexio e os colexiados ante as administracións públicas, institucións, tribunais, entidades e particulares, coa lexitimación para ser parte interesada en todos aqueles litixios que afecten os intereses profesionais, en defensa dos seus dereitos.

5. Participar nos consellos ou organismos consultivos das distintas administracións públicas en materia da súa competencia profesional, cando as súas normas reguladoras o permitan, así como estar representado nos órganos de participación social existentes.

6. Participar na elaboración dos plans de estudo dos ensinos universitarios ou de formación profesional que teñan relación coas actividades propias da profesión, e informar a posible creación de escolas universitarias mantendo contacto con estas, e preparar a información necesaria para facilitar o acceso á vida profesional dos novos titulados. Esta participación non terá en ningún caso carácter vinculante.

7. Estar representados, se é o caso, nos consellos sociais das universidades.

8. Cooperar coa Administración de xustiza e demais organismos oficiais na designación de colexiados que puidesen ser requiridos para realizar informes, ditames, taxacións, peritacións ou outras actividades profesionais, para cuxo efecto se facilitará periodicamente, e sempre que o soliciten, a relación de colexiados dispoñibles para estes efectos.

9. Colaborar coa Administración xeral do Estado e administracións autonómicas na realización de estudos, emisión de informes, elaboración de estatísticas e outras actividades relacionadas cos seus fins que lle sexan solicitadas ou acorde formular por propia iniciativa.

10. Ordenar, no ámbito da súa competencia, a actividade profesional dos colexiados, que deberá realizarse en réxime de libre competencia. Os acordos, decisións e recomendacións do Colexio observarán os límites da Lei 15/2007, do 3 de xullo, de defensa da competencia. Así mesmo, velar pola ética, a deontoloxía e a dignidade profesional e polo debido respecto aos dereitos dos particulares, exercendo, se cabe, a facultade disciplinaria na orde profesional e colexial.

11. Encargarse do cobramento das percepcións, remuneracións ou honorarios profesionais de traballos previamente visados, só por petición libre e expresa dos colexiados, nas condicións que se determinen nestes estatutos ou na correspondente normativa do colexio.

12. Impedir e, se é o caso, denunciar ante a Administración, e mesmo perseguir ante os tribunais de xustiza, todos os casos de intrusismo profesional que afecten os enxeñeiros técnicos e grao en Minas e Enerxía e o exercicio da profesión.

13. Intervir, pola vía da conciliación ou arbitraxe, nas cuestións que, por motivos profesionais, se susciten entre os colexiados.

14. Resolver, por laudo, por instancia das partes interesadas, as discrepancias que poidan xurdir sobre o cumprimento das obrigacións dimanantes dos traballos realizados polos colexiados no exercicio da profesión.

15. Realizar os recoñecementos de sinatura, revisión documental, o rexistro ou calquera que sexa a súa denominación de proxectos, informes, ditames, valoracións, peritaxes e demais traballos realizados polos colexiados no exercicio da súa profesión. Realizar o visado nos supostos previstos na normativa aplicable.

16. Crear e manter un portelo único nos termos previstos na lei.

17. Organizar actividades e servizos comúns de interese para os colexiados, de carácter profesional, formativo, cultural, asistencial e de previsión, prevendo o sustentamento económico cos medios necesarios. A recepción deste tipo de servizos polos colexiados será voluntaria, logo de solicitude expresa. Así mesmo, os prezos que se lles cobren aos colexiados non incluirán custos alleos á prestación específica que se trate.

18. Elaborar os seus estatutos particulares e as súas modificacións, redactar e aprobar o seu propio regulamento interior e demais acordos para o desenvolvemento das súas competencias.

19. Recoller e canalizar as inquedanzas e aspiracións dos colexiados, elevando ás administracións públicas correspondentes, aquelas suxestións que garden relación co perfeccionamento e coas normas que rexan os servizos que presten ou poidan prestar os colexiados tanto nas administracións públicas como nas entidades particulares.

20. Facilitar ao colexiado un activo e eficaz servizo de información sobre os postos de traballo que vaian desenvolver tanto os enxeñeiros técnicos de Minas, como os titulados de grao en Minas e Enerxía, as ofertas de traballo, plans industriais, cursos, xornadas técnicas, etc., que permita alcanzar un maior grao de formación profesional e un mellor entendemento nas súas tarefas de actuación.

21. Garantir unha organización colexial eficaz, promovendo o funcionamento de accións especializadas, fomentando as actividades e servizos comúns de interese colexial e profesional nas ordes formativa, cultural, administrativa, asistencial e de previsión. Para estes efectos, poderá establecerse a colaboración con outros colexios profesionais e entidades legalmente constituídas.

22. Promover relacións entre os enxeñeiros técnicos de Minas dos distintos colexios de España.

23. Administrar a economía colexial, repartindo equitativamente as cargas mediante cotas de achega, recadándoas, custodiándoas e distribuíndo segundo o orzamento e necesidades e levando unha clara e rigorosa contabilidade conforme a lexislación vixente.

24. Atender as solicitudes de información sobre os seus colexiados e sobre as sancións firmes a eles impostas, así como as peticións de inspección ou investigación que lles formule calquera autoridade competente dun Estado membro da Unión Europea nos termos previstos na Lei 17/2009, do 23 de novembro, sobre o libre acceso ás actividades de servizos e o seu exercicio, en particular, no que se refire a que as solicitudes de información e de realización de controis, inspeccións e investigacións estean debidamente motivadas e que a información obtida se empregue unicamente para a finalidade para a que se solicitou.

25. Colaborar coas autoridades competentes dos Estados membros da Unión Europea para o cumprimento ao principio de asistencia recíproca e adoptar as medidas necesarias para que nos rexistros de colexiados consten datos suficientes dos prestadores de servizos, para efectos de que os destinatarios teñan garantías para resolución de litixios, de conformidade coa Directiva 2006/1323/CE do Parlamento Europeo e do Consello, do 12 de decembro de 2006.

26. Todas as outras funcións que lle sexan atribuídas polas disposicións vixentes e que beneficien os intereses profesionais dos colexiados ou da profesión.

TÍTULO II
Dos colexiados

CAPÍTULO I
Adquisición, denegación e perda da condición de colexiado

Artigo 6. Membros do Colexio

É requisito indispensable para o exercicio da profesión de enxeñeiro técnico de Minas acharse incorporado ao colexio correspondente, de conformidade coa normativa aplicable.

O Colexio agrupará a quen acredite, mediante as formas legalmente establecidas, estar en posesión do título de enxeñeiro técnico, facultativo ou perito de minas ou do título de grao en Minas e Enerxía que cumpra os requisitos da Orde CIN/306/2009, do 9 de febreiro, por a que se establecen as condicións para a verificación dos títulos universitarios oficiais que habiliten para o exercicio da profesión de Enxeñeiro Técnico de Minas, ou ben outro título homologado a algún dos anteriores ou recoñecido para efectos do exercicio da devandita profesión. Estes serán os chamados membros de número.

O Colexio recolle tamén os membros ou colexiados de honra, que serán aquelas persoas, pertencentes ou non á profesión que rendan ou rendesen servizos destacados a este ou á profesión. O título de membro ou colexiados de honra será outorgado, mediante acordo da xunta xeral, por proposta da xunta de goberno.

Artigo 7. Colexiación

Para a incorporación ao Colexio, será necesario estar en posesión do título universitario oficial de enxeñeiro técnico de Minas, ou de facultativo ou perito de Minas, ou do título de grao en Minas e Enerxía que cumpra co Real decreto 1393/2007, do 29 de outubro, polo que se establece a ordenación dos ensinos universitarios oficiais, ou os titulados que conforme as normas vixentes sexan homologados a aqueles ou recoñecidos para efectos profesionais. Se é o caso, deberán cumprir os requisitos legalmente exixidos para o establecemento e traballo dos estranxeiros en España.

Os titulados aceptan, polo simple feito de solicitar a súa Colexiación, o contido dos presentes estatutos.

As peticións de colexiación tramitaranse da forma seguinte:

1. Toda petición de incorporación ao Colexio deberá formalizarse, mediante instancia dirixida ao decano-presidente directamente, por correo postal ou por portelo único, acompañada do título habilitante para o exercicio profesional, testemuño legalizado deste ou xustificante de solicitalo, con certificación académica de estar en condicións de poder ser expedido, outros documentos que aprobe a xunta de goberno. Esta petición será resolta pola xunta de goberno no prazo máximo de tres meses desde a súa formulación ou, se é o caso, desde que se acheguen polo interesado os documentos necesarios ou se corrixan os defectos emendables da petición, de conformidade coa Lei 39/2015, reguladora do procedemento administrativo común.

2. Acabado este prazo, máis o que se deu de acordo coa lei, sen que se resolveu a solicitude de incorporación ao Colexio, poderase entender estimada esta, nos termos establecidos na Lei 39/2015, do procedemento administrativo común das administracións públicas.

3. Con todo, unha vez presentada a documentación e emendada as deficiencias, se as houber, a Secretaría do Colexio poderá aprobala, aínda que con carácter provisional e condicionada á ulterior resolución da xunta de goberno.

A cota de inscrición, reincorporación e Colexiación será a marcada pola xunta xeral e levarase a cabo tendo en conta os custos asociados á tramitación da inscrición.

Toda tramitación de colexiación poderá realizarse a través do portelo único previsto na Lei 17/2009, do 23 de novembro, sobre o libre acceso ás actividades de servizos e o seu exercicio.

Deberán inscribirse no Rexistro de Sociedades Profesionais as sociedades profesionais a que se refire a Lei 2/2007, do 15 de marzo, cuxo obxecto social sexa o exercicio da actividade profesional da enxeñería técnica mineira no ámbito territorial do Colexio, sexa este único ou multidisciplinar.

A inscrición no Colexio das sociedades profesionais non supoñerá, en ningún caso, que as ditas persoas xurídicas teñan a condición de colexiados e levará a cabo co fin de que os colexios poidan exercer sobre as sociedades profesionais as competencias que lle outorga o ordenamento xurídico sobre os profesionais colexiados.

As sociedades profesionais só serán inscritas no Rexistro de Sociedades Profesionais do Colexio cando o rexistrador mercantil comunique a este a súa inscrición no Rexistro Mercantil e o Colexio comprobe o cumprimento das condicións establecidas na Lei 2/2007, do 15 de marzo, de sociedades profesionais.

As sociedades profesionais deberán estipular un seguro que cubra a responsabilidade na que estas poidan incorrer no exercicio da actividade que constitúe o obxecto social.

Artigo 8. Denegacións

A solicitude de colexiación poderá ser suspendida ou denegada pola xunta de goberno, polas seguintes causas:

a) Cando os documentos presentados sexan insuficientes ou ofrezan dúbidas respecto da súa autenticidade.

b) Cando o peticionario estea baixo condena imposta polos tribunais de Xustiza que leve anexa unha pena accesoria de inhabilitación para o exercicio da profesión.

c) Cando estivese suspendido no exercicio da profesión por outro Colexio e non obtivese a correspondente rehabilitación.

Contra as resolucións denegatorias das peticións de incorporación, que se deberán comunicar ao solicitante de forma debidamente razoada, cabe recurso de alzada ante o Consello Xeral, que se deberá interpoñer no termo dun mes desde a data de notificación da denegación de incorporación ao Colexio.

Contra a resolución do recurso de alzada, que pon fin á vía administrativa, poderá interpoñerse recurso contencioso-administrativo na forma e prazos establecidos na Lei da xurisdición contencioso-administrativa.

Artigo 9. Baixas

Pérdese a condición de colexiado en calquera das seguintes circunstancias:

a) Por petición propia, mediante instancia dirixida ao decano-presidente do Colexio acompañada de copia do DNI. Esta petición non será eximente das obrigacións que o interesado contraese co Colexio con anterioridade á súa solicitude.

b) Por pena de inhabilitación para o exercicio profesional por sentenza xudicial firme ou pola resolución firme dun expediente disciplinario pola que se impoña a expulsión do Colexio.

c) Por falta de pagamento da cota colexial durante un ano ou doutras achegas establecidas polos órganos de goberno do Colexio, logo de requirimento do pagamento polos medios que os órganos de goberno do Colexio estimen oportunos, establecéndose un prazo dun mes de prórroga para o pagamento da débeda.

d) Por falecemento ou incapacidade legal.

En todo caso, a perda da condición de colexiado polas causas expresadas nas letras a), b) e c) deste artigo deberá ser comunicada a este a través da aprobación da xunta de goberno seguinte á data na que produciu efecto.

No caso de sociedades profesionais serán causa de baixa no Rexistro de Sociedades Profesionais:

e) A disolución da sociedade.

f) Cando na sociedade profesional multidisciplinar eliminase do obxecto social a actividade profesional propia dos enxeñeiros técnicos de Minas.

g) A imposición ao colexiado pertencente a unha sociedade profesional dunha sanción firme que leve aparellada a expulsión do Colexio e non haxa outro colexiado na sociedade coa titulación que capacite para o exercicio da profesión de enxeñeiro técnico de Minas.

Artigo 10. Reincorporación

Cando o motivo da baixa fose o que dispón o artigo 9.a) destes estatutos, o solicitante deberá satisfacer a cota de reincorporación marcada pola xunta xeral.

Cando o motivo da baixa fose o que dispón o artigo 9.b) destes estatutos, o solicitante deberá acreditar o cumprimento da pena ou sanción que motivou a súa baixa colexial.

Cando o motivo da baixa fose o que dispón o artigo 9.c) destes estatutos, o solicitante deberá satisfacer a débeda pendente máis os xuros legais, se procede, desde a data do libramento daquela.

Artigo 11. Colexiación única e exercicio en territorio diferente ao de colexiación

A colexiación habilita para o exercicio profesional en todo o territorio nacional, abondando a adscrición a un só Colexio.

Para o exercicio profesional en territorio doutro Colexio, procederase da seguinte forma:

a) O Colexio utilizará, con outros colexios territoriais, os mecanismos e sistemas de cooperación Administrativa prevista na Lei 17/2009, para facilitar o exercicio respectivo das competencias de ordenación e da potestade disciplinaria, en beneficio dos consumidores e usuarios, en relación cos colexiados que exerzan a profesión nun territorio distinto ao da súa colexiación. As sancións impostas, se é o caso, polo Colexio do territorio no que se exerza a actividade profesional fornecerán efecto en todo o territorio español.

b) Os profesionais estarán sometidos ás competencias de ordenación de visado, control deontolóxico e potestade disciplinaria vixentes.

c) No caso de desprazamento temporal dun profesional doutro Estado membro da Unión Europea; haberá que aterse ao disposto na normativa vixente en aplicación do dereito comunitario relativo ao recoñecemento de cualificacións.

CAPÍTULO II
Dos dereitos e deberes dos colexiados

Artigo 12. Dereitos

Son dereitos dos colexiados con carácter xeral:

a) Ser asistido, asesorado e defendido polo Colexio, de acordo cos medios de que este dispoña e nas condicións que regulamentariamente se fixen, cando se lesionen ou menoscaben os seus dereitos ou intereses profesionais.

b) Ser representado pola xunta de goberno do Colexio, cando así o solicite, nas reclamacións de calquera tipo dimanantes do exercicio profesional, nos termos que regulamentariamente se determinen.

c) Utilizar os servizos e medios do Colexio nas condicións que regulamentariamente se fixen.

d) Participar, como electores e como elegibles, en cantas eleccións se convoquen no ámbito colexial; intervir de forma activa na vida do Colexio; ser informado, informar e participar con voz e voto nas xuntas xerais do Colexio.

e) Formar parte das comisións ou seccións que se establezan.

f) Presentar á xunta de goberno escritos con peticións, queixas ou suxestións relativas ao exercicio profesional ou á marcha do Colexio.

g) Gardar o segredo profesional respecto dos datos e información coñecidos con ocasión do exercicio profesional.

h) Someter a conciliación ou arbitraxe do Colexio as cuestións de carácter profesional que se produzan entre os colexiados.

i) Promover a remoción dos titulares dos órganos de goberno do Colexio mediante o voto de censura, segundo se regulamenta nos presentes estatutos.

j) Promover, xunto cun número de colexiados equivalente ao 20 % do total, a inclusión de calquera punto para tratar na orde do día das xuntas xerais. Para exercer este dereito, será necesario que os colexiados solicitantes dirixan por escrito asinado por todos eles, acompañado con copia do DNI, ao decano-presidente. Os devanditos escritos deberán presentarse na oficina do Colexio.

k) O Colexio dispoñerá dunha páxina web para que, a través do portelo único previsto na Lei 17/2009, do 23 de novembro, os colexiados poidan realizar todos os trámites necesarios para a colexiación, o seu exercicio e a súa baixa no Colexio, a través dun único punto, por vía electrónica e a distancia.

l) As sociedades profesionais inscritas no Rexistro de Sociedades Profesionais serán titulares dos dereitos establecidos nestes estatutos como persoas físicas, con excepción dos dereitos electorais e de participación nos órganos de Goberno.

Artigo 13. Deberes dos colexiados

Son deberes dos colexiados:

a) Exercer a profesión eticamente, e cumprindo os preceptos e normas das disposicións vixentes, actuando dentro das normas da libre competencia, con respecto cara aos compañeiros e sen incorrer en competencia desleal, de acordo co establecido pola Lei 3/1991, do 10 de xaneiro, de competencia desleal.

b) Acatar e cumprir estes estatutos, e en xeral, as normas que rexen a vida colexial, así como os acordos adoptados polos órganos de goberno do Colexio, sen prexuízo dos recursos oportunos.

c) Poñer en coñecemento da xunta de goberno todos os feitos que poidan afectar a profesión tanto particular como colectivamente considerada, e cuxa importancia poida determinar a intervención corporativa con carácter oficial.

d) Someter ao visado do Colexio toda a documentación técnica ou facultativa que subscriba no exercicio da súa profesión, cando así o exixa a normativa vixente, aboando ao Colexio os dereitos económicos que se establezan pola práctica do visado.

e) Comunicar ao Colexio, nun prazo de trinta días, os cambios de residencia ou domicilio ou outros datos de interese para o Colexio.

f) Asistir aos actos corporativos.

g) Aboar as cotas e achegas establecidas polos órganos de goberno do Colexio.

h) Desenvolver con dilixencia e eficacia os cargos para os que fose elixido, e cumprir as encargas que os órganos de goberno lle poidan encomendar.

i) Cooperar coa xunta xeral e coa xunta de goberno, prestando declaración e facilitando información nos asuntos de interese colexial nos que poida ser requirido, sen prexuízo do segredo profesional.

j) Gardar escrupulosamente o segredo profesional, respecto dos datos e información coñecidos con ocasión do exercicio profesional.

k) Subscribir conxuntamente cos clientes os contratos de encarga e dirección facultativa de todos os traballos profesionais cuxa realización asuman, que conterá, como mínimo, a identificación dos contratantes, a determinación suficiente do obxecto da prestación e o seu custo previsible. Sen este requisito, o Colexio non poderá actuar en defensa do colexiado por falta de pagamento dos honorarios correspondentes a calquera outra cuestión que puidese xurdir.

l) Non aceptar traballos nos que interviñese outro colexiado sen comunicalo previamente ao colexiado substituído, o que deberá acreditarse no Colexio.

CAPÍTULO III
Os principios básicos reguladores do exercicio profesional

Artigo 14. Funcións da profesión

Conforme o previsto no artigo 36 da Constitución, a lei regulará o exercicio da profesión titulada de enxeñeiro técnico de Minas e as actividades para cuxo exercicio é obrigatoria a colexiación.

Sen prexuízo do anterior (así como das atribucións profesionais e normas de colexiación que se recollen nas leis reguladoras doutras profesións), o Colexio considera funcións que pode desempeñar o colexiado na súa actividade profesional, as que a titulo enunciativo están indicadas nas leis e normativa vixente.

Artigo 15. Modos do exercicio da profesión

A profesión de enxeñeiro técnico de Minas pode exercerse de forma liberal, xa sexa individual ou asociativamente, en relación laboral con calquera empresa pública ou privada ou mediante relación funcionarial.

En calquera caso, o exercicio da profesión baséase no respecto á independencia do criterio profesional, sen límites ilexítimos ou arbitrarios no desenvolvemento do traballo, no servizo á comunidade e o cumprimento das obrigacións deontolóxicas propias da profesión.

O exercicio da profesión realizarase en réxime de libre competencia, e estará suxeito á Lei 15/2007, do 3 de xullo, de defensa da competencia, e á Lei 3/1991, do 10 de xaneiro, sobre competencia desleal. Os demais aspectos do exercicio profesional continuasen rexéndose pola lexislación xeral e específica sobre a ordenación substantiva propia aplicable á profesión de enxeñeiro técnico de Minas.

O exercicio profesional de forma societaria rexerase polo disposto nas leis.

Artigo 16. Visado de traballos profesionais

Os traballos profesionais deberán ser asinados polos seus autores, expresando o seu número de colexiado e responsabilizándose do seu contido.

O Colexio visará os traballos profesionais no seu ámbito de competencia unicamente cando se solicite por peticións expresas dos clientes, incluídas as administracións públicas cando actúen como tales, ou cando así o estableza a lexislación vixente.

O obxecto do visado é comprobar, polo menos:

a) A identidade de habilitación profesional do autor do traballo utilizando para iso o rexistro de colexiados.

b) A corrección e integridade formal da documentación do traballo profesional de acordo coa normativa aplicable ao traballo de que se trate.

En todo caso, o visado expresará claramente cal é o seu obxecto, detallando que extremos son sometidos a control e informará sobre a responsabilidade que, de acordo co previsto no punto seguinte, asume o Colexio. En ningún caso comprenderá os honorarios nin demais condicións contractuais, cuxa determinación queda suxeita ao libre acordo entre as partes, nin tampouco comprenderá o control técnico dos elementos facultativos do traballo profesional.

En caso de danos derivados dun traballo profesional que visase o Colexio, no que resulte responsable o autor deste, o Colexio responderá subsidiariamente dos danos que teñan a súa orixe en defectos que debesen ser postos de manifesto polo Colexio ao visar o traballo profesional, e que garden relación directa cos elementos que se visaron nese traballo concreto.

Cando o visado sexa preceptivo, o seu custo será razoable, non abusivo nin discriminatorio. Os colexios farán públicos os prezos dos visados, que poderán tramitarse por vía telemática.

O Colexio levará un libro de rexistro de visados onde se incluirán por orde cronolóxica os visados solicitados, facendo constar, polo menos o número de visado, data da solicitude de visado, titulado que o insta e asunto sobre o que se emite o visado.

Artigo 17. Cobramento de honorarios

Os honorarios son libres e os colexiados poderán pactar o seu importe e as condicións de pagamento co seu cliente, aínda que deberán observar prohibicións legais relativas á competencia desleal.

O cobramento de honorarios profesionais dos colexiados percibidos no exercicio autónomo da profesión farase, cando o colexiado así o solicite libre e expresamente, a través do Colexio nas condicións que se determinen.

Artigo 18. Publicidade e comunicacións comerciais

O colexiado evitará toda forma de competencia desleal, de acordo co establecido pola Lei 3/1991, do 10 de xaneiro, de competencia desleal, aténdose na súa publicidade ás normas que establezan os órganos de goberno do Colexio de acordo coa Lei xeral de publicidade.

A conduta dos colexiados en materia de comunicacións comerciais estará axustada ao disposto na lei, coa finalidade de salvagardar a independencia e integridade da profesión, así como, se é o caso, o segredo profesional.

Artigo 19. Responsabilidade profesional

O colexiado responde directamente dos traballos profesionais que subscribe e está obrigado a ter unha póliza de responsabilidade civil que cubra os danos derivados dos traballos que se sometan a visado, polo menos, na contía que teña fixada o Colexio, en garantía dos intereses dos consumidores e usuarios.

Artigo 20. Igualdade de trato e non discriminación

O acceso e exercicio da profesión rexerase polo principio de igualdade de trato e non discriminación, en particular, por razón de orixe racial ou étnica, relixión ou conviccións, discapacidade, idade ou orientación sexual, nos termos da sección 3 do capítulo 3 do título 2 da Lei 62/2003, do 30 de decembro, de medidas fiscais, administrativas e da orde social.

TÍTULO III
Organización básica do Colexio

CAPÍTULO I
Dos órganos de goberno, as súas normas de constitución
e funcionamento e as súas competencias

Artigo 21. Órganos de representación

Os órganos de representación, desenvolvemento normativo, control, goberno e administración do Colexio son:

– A xunta xeral.

– A xunta de goberno.

– O decano-presidente.

Os acordos da xunta xeral e da xunta de goberno, que estarán recollidos na acta da reunión, serán efectivos de inmediato, salvo que nestes se estableza outra data para a súa eficacia, ou que polo seu contido haxa de quedar supeditada a súa eficacia á súa notificación ao colexiado ou colexiados a que afecte.

Artigo 22. A xunta xeral

1. A xunta xeral é o órgano supremo de expresión da vontade do Colexio, está formada por todos os colexiados con igualdade de voto, e adoptará os seus acordos polo principio maioritario e en concordancia cos presentes estatutos.

2. Os acordos adoptados obrigan a todos os colexiados, aínda aos ausentes, disidentes ou abstidos e mesmo aos que recorresen contra aqueles, sen prexuízo do que resolva o Consello Xeral, ou os tribunais competentes.

3. A xunta xeral reunirase con carácter ordinario dúas veces ao ano; unha, no último semestre para exame e aprobación do orzamento, e outra, no primeiro semestre para a aprobación das contas e información xeral sobre a marcha do Colexio en todos os seus aspectos.

4. Así mesmo, reunirase con carácter extraordinario cando o considere necesario o decano-presidente ou a xunta de goberno, ou cando o pida coa súa sinatura a terceira parte dos colexiados. A convocatoria das xuntas xerais extraordinarias, por iniciativa dos colexiados, exixirá solicitude dirixida por estes á xunta de goberno nas condicións citadas, á cal se acompañará a orde do día proposta para a devandita convocatoria. Cumpridos os requisitos anteriores, a xunta de goberno convocará a xunta xeral extraordinaria no prazo non superior a trinta días naturais desde a presentación da solicitude.

5. A convocatoria para a xunta xeral ordinaria e extraordinaria enviarase a todos os colexiados mediante comunicación por calquera medio valido en dereito asinado polo secretario, de orde do decano-presidente sempre cunha antelación mínima de quince días naturais respecto da data da súa celebración para as xuntas ordinarias e con oito días naturais de antelación para as extraordinarias. A convocatoria incluirá a data, hora e lugar da reunión, así como a orde do día e información complementaria que se crea oportuna.

6. Todos os colexiados teñen o dereito e o deber de asistir á xunta xeral con voz e voto.

7. De acordo co disposto no artigo 6.3.c) da Lei 2/1974, do 13 de febreiro, de colexios profesionais, queda expresamente prohibido adoptar acordos respecto de asuntos que non figuren na orde do día da xunta ordinaria ou extraordinaria de que se trate, sen prexuízo de que na quenda de rogos e preguntas se poida expor a conveniencia de tratar determinados asuntos en xuntas posteriores.

8. A xunta xeral ordinaria ou extraordinaria quedará validamente constituída, en primeira convocatoria, coa concorrencia, entre presentes e representados, da maioría absoluta dos colexiados e, en segunda, con calquera que sexa o número de asistentes e representados, debendo adoptar os seus acordos, en ambos os casos, por maioría simple dos votantes, salvo que se dispoña outra cousa nos presentes estatutos.

9. A xunta xeral será presidida polo decano-presidente do Colexio, e actuará de secretario o que o sexa do Colexio, quen levantará acta da reunión, podendo rexistrarse o seu desenvolvemento cos medios técnicos que procedan, para unha maior exactitude na redacción das actas.

Artigo 23. Competencias da xunta xeral

1. A aprobación das actas, das súas sesións, da memoria anual das actividades presentadas pola xunta de goberno do Colexio; as contas do Colexio, do ano anterior e orzamentos do seguinte; a modificación dos estatutos do Colexio e calquera outra normativa que afecte o funcionamento do Colexio, que en ningún caso poderán vulnerar o establecido nas leis.

2. A elección dos membros da xunta de goberno, así como a súa remoción por medio da moción de censura de acordo co especificado no artigo 26 destes estatutos.

3. A fixación da contía da cota de incorporación, colexiación e reincorporación, así como as cotas ordinarias ou as que, con carácter extraordinario, e por razóns que o xustifiquen, propoña a xunta de goberno.

4. Tomar acordos sobre a xestión da xunta de goberno.

5. Acordar a modificación do ámbito territorial do Colexio por agrupación ou segregación. Promover a disolución do Colexio, de acordo co que se estableza nos presentes estatutos.

6. Coñecer, discutir e, se é o caso, aprobar cantas propostas lle sexan sometidas e correspondan á esfera da acción e dos intereses do Colexio, por iniciativa da xunta de goberno ou de calquera colexiado se a súa proposición está avalada polo menos polo 20 % dos colexiados e é presentada con 45 días de antelación á celebración da xunta xeral ordinaria.

7. Todas as demais atribucións que non estivesen conferidas expresamente á xunta de goberno ou a algún dos cargos colexiais.

Artigo 24. Funcionamento da xunta xeral

1. As sesións da xunta xeral estarán presididas polo decano-presidente, acompañado dos demais membros da xunta de goberno. En ausencia do decano-presidente, a xunta estará presidida polo vicepresidente e en ausencia de ambos por outro membro da xunta de goberno.

2. O decano-presidente será o moderador e coordinador da xunta, concedendo ou retirando o uso da palabra e ordenando os debates e votacións.

3. Actuará como secretario da xunta xeral o secretario do Colexio, ou, na súa ausencia, outro membro da xunta de goberno que levantará acta da reunión. Nas actas de cada sesión especificarase necesariamente o número de asistentes e representados, a orde do día do día da reunión, as circunstancias do lugar e tempo en que se celebrou, os puntos principais das deliberacións, así como o contido dos acordos adoptados. As actas aprobásense na seguinte sesión, podendo con todo emitir o secretario certificación sobre os acordos específicos que se adoptaron, sen prexuízo da ulterior aprobación da acta.

4. Todos os colexiados teñen o dereito e a obrigación de asistir á xunta xeral con voz e voto.

5. A representación dada a outro colexiado será de forma expresa para unha sesión determinada e realizarase por medio de escrito dirixido ao decano-presidente, no que se exprese claramente o nome de quen terá a súa representación. Só serán válidas as representacións recibidas pola secretaría, antes do día fixado para a xunta, ou na mesa presidencial, antes de iniciarse a sesión da xunta xeral.

6. En ningún caso, un só colexiado poderá ter a representación simultánea de máis de dous colexiados.

7. É potestade do decano-presidente e da xunta de goberno convidar as sesións da xunta xeral, en calidade de asesor ou colaborador, sen voto, a persoa ou persoas cuxa asistencia se considere conveniente.

Artigo 25. Moción de censura

1. A moción de censura contra a xunta de goberno, ou algún dos seus membros, só poderá ser tratada en xunta xeral extraordinaria convocada para o efecto.

2. A xunta de goberno poderá acordar e propoñer moción de censura respecto dun ou varios dos seus membros, a dita moción de censura será efectiva cando sexa solicitada pola maioría dos membros da xunta de goberno.

3. Os colexiados poderán propoñer moción de censura contra a xunta de goberno, ou algún dos seus membros, solicitando a celebración da xunta xeral extraordinaria correspondente, a petición da terceira parte dos colexiados, de acordo con estes estatutos. Neste caso a xunta de goberno está obrigada a convocar inmediatamente e para que esta se celebra nun prazo non superior a dous meses, a xunta xeral solicitada.

4. A aprobación dunha moción de censura contra membros da xunta de goberno implicará o cesamento inmediato do ou dos afectados e posterior convocatoria de eleccións para cubrir as vacantes.

5. A aprobación dunha moción de censura contra a totalidade ou máis da metade dos membros da xunta de goberno implicará o cesamento inmediato de toda ela. Neste caso, e para evitar o baleiro de poder, a mesma xunta xeral adoptará un acordo consistente no nomeamento dunha xunta xestora que deberá convocar eleccións nun prazo non superior a dous meses. A xunta xestora, que actuará como xunta de goberno provisional non poderá adoptar outros acordos que os considerados de trámite.

Artigo 26. A xunta de goberno

1. A xunta de goberno, que é o órgano executivo e representativo do Colexio só subordinado á xunta xeral, será elixida por votación entre os seus propios colexiados e constará dun decano-presidente, vicepresidente, secretario, tesoureiro e catro vogais, un por cada provincia.

2. A duración dos cargos será de catro anos, renovándose a medias cada dous. Na primeira renovación entrasen o decano-presidente, o tesoureiro e dous vogais e, na segunda, o vicepresidente, o secretario e outros dous vogais.

3. Quen desempeñe o cargo de decano-presidente, deberá atoparse no exercicio da profesión e o seu cargo non será superior a dúas lexislaturas consecutivas. Deberán ser, así mesmo, exercientes os restantes membros, segundo establece o artigo 47.e) destes estatutos, aínda que estes poderán ser reelixidos sen limitación ningunha.

4. O cargo de secretario poderá ser retribuído, a condición de que desempeñe xornada laboral no domicilio ou sede do Colexio. Todos os demais cargos son de carácter non retribuído sen prexuízo de que os orzamentos do Colexio consignen as partidas precisas para atender os gastos inherentes aos cargos directivos, incluído o aboamento de axudas de custo e outras compensacións económicas, que deberán figurar desagregadas.

5. Cando por elección de calquera cargo da xunta de goberno se faga por vacante e non por finalización de mandato, a duración no cargo do elixido será só ata o final do mandato do cargo que produciu a vacante.

6. Dentro da xunta de goberno, poderá constituírse unha comisión permanente, para atender os asuntos urxentes que non poidan esperar á convocatoria e celebración da xunta de goberno. A comisión permanente estará formada polo decano-presidente, o secretario, o vicepresidente e o tesoureiro, estando validamente constituída cando estean presentes polo menos os dous primeiros e un dos dous últimos. Os seus acordos deberán someterse á ratificación da xunta de goberno na primeira reunión que se celebre.

Artigo 27. Competencias da xunta de goberno

Corresponde á xunta de goberno a dirección e administración do Colexio, para o cumprimento dos seus fins en todo aquilo que de maneira expresa non compete á xunta xeral.

1. Ter a representación do Colexio.

2. Executar os acordos da xunta xeral.

3. Cumprir e facer cumprir os estatutos e Normativa do Colexio, así como os seus propios acordos.

4. Elaborar o orzamento do exercicio seguinte e aprobar o balance do orzamento do exercicio anterior e a memoria de xestión anual, previamente á súa presentación ante a xunta xeral para a súa aprobación se procede.

5. Dirixir a xestión e administración do Colexio para o cumprimento dos seus fins.

6. Manifestar, en forma oficial e pública, a opinión do Colexio nos asuntos de interese profesional.

7. Representar os intereses profesionais ante os poderes públicos, así como velar polo prestixio da profesión e a defensa dos seus dereitos.

8. Presentar estudos, informes e ditames cando lle sexan requiridos, asesorando desta forma aos órganos do Estado e a calquera entidade pública ou privada. Para estes efectos, a xunta de goberno poderá designar comisións de traballo, ou designar os colexiados que estime oportunos para preparar tales estudos ou informes.

9. Designar, cando cumpra legal ou regulamentariamente, os representantes do colexio nos órganos consultivos das distintas administracións públicas.

10. Acordar o exercicio de accións e a interposición de recursos administrativos e xurisdicionais.

11. Someter calquera asunto de interese xeral para o Colexio á deliberación e acordo da xunta xeral.

12. Regular os procedementos de colexiación, baixa, pagamento de cotas e outras achegas, todo iso de acordo co establecido nestes estatutos.

13. Regular e exercer as facultades disciplinarias que lle correspondan, aténdose ao establecido nestes estatutos.

14. Organizar actividades e servizos de carácter cultural, profesional, asistencial e de previsión en beneficio dos colexiados.

15. Crear comisións abertas, por iniciativa propia ou dos colexiados, de acordo co establecido nestes estatutos.

16. Recadar as cotas e achegas establecidas, executar o orzamento e organizar e dirixir o funcionamento dos servizos xerais do Colexio.

17. Informar os colexiados das actividades e acordos do Colexio.

18. Nomear e cesar o persoal administrativo e de servizos do Colexio.

19. Acordar a convocatoria de sesións ordinarias e extraordinarias da xunta xeral.

20. Acordar a convocatoria para a elección de cargos para a xunta de goberno cando así proceda, segundo o que se establece nestes estatutos.

21. Aprobar as actas das súas sesións.

22. Adquirir ou allear calquera clase de bens do Colexio, segundo o orzamento vixente e aprobado pola xunta xeral.

23. En caso necesario, establecer oficinas administrativas territoriais.

24. Elixir de entre os seus propios membros a quen deba substituír, en caso de ausencia prolongada ou vacante do decano-presidente, vicepresidente, secretario e tesoureiro dando conta da nova situación á xunta xeral extraordinaria convocada para ese efecto e convocar inmediatamente eleccións para cubrir as postos vacantes.

Artigo 28. Funcionamento da xunta de goberno: convocatorias e adopción de acordos

1. A xunta de goberno reunirase como mínimo cada tres meses, salvo os meses de xullo e agosto, e sempre que o ordene o decano-presidente ou o soliciten polo menos tres dos seus membros.

2. As convocatorias para as xuntas de goberno faranse de forma telemática ou por escrito do secretario por orde do decano-presidente, a todos os seus membros, fixando lugar, data e hora, con sete días de antelación como mínimo, e irán acompañadas da orde do día, e da última acta para a súa aprobación.

3. As sesións da xunta de goberno estarán presididas polo decano-presidente. Na súa ausencia polo vicepresidente e en ausencia de ambos, polo vogal de máis idade.

O decano-presidente será o moderador e coordinador da xunta, concedendo ou retirando o uso da palabra e ordenando os debates e votacións.

O secretario do Colexio ou na súa ausencia, outro membro da xunta de goberno, levantará acta da sesión, co visto e prace do decano-presidente, que será sometida á súa aprobación posterior na seguinte reunión da xunta.

4. Todos os compoñentes da xunta de goberno teñen o dereito e o deber de asistir ás súas sesións con voz e voto.

5. Unha vez que a xunta de goberno quedase validamente constituída, que o será cando se atopen presentes a totalidade dos seus membros en primeira convocatoria e en segunda convocatoria calquera que sexa o número de asistentes, os seus acordos serán vinculantes para todos os seus compoñentes e colexiados, en materia das súas competencias. Entre ambas as convocatorias deberá transcorrer polo menos trinta minutos.

6. Os membros da xunta de goberno serán responsables dos acordos adoptados excepto cando en acta quede constancia expresa do seu voto en contra.

7. Os acordos tomásense por maioría simple dos votos emitidos, tendo cada membro un voto. En caso de empate, decidirá o voto de calidade do decano-presidente ou o seu substituto.

8. Cáusase baixa na xunta de goberno por:

a) Falecemento.

b) Expiración do mandato ou prazo para o que fose elixido.

c) Enfermidade que incapacita para o exercicio do cargo.

d) Renuncia.

e) Aprobación pola xunta xeral dunha moción de censura.

f) Baixa como colexiado.

g) Resolución firme en expediente disciplinario.

h) Tres faltas de asistencia consecutiva non xustificada ou seis descontinuas, igualmente sen xustificar, ás sesións da xunta de goberno, durante o mandato.

9. É potestade do decano-presidente convidar as sesións da xunta de goberno, en calidade de asesor ou colaborador, sen voto, a persoa ou persoas cuxa asistencia se considere conveniente.

Artigo 29. Atribucións do decano-presidente

Son atribucións do decano-presidente as seguintes:

1. Ter a representación legal e institucional do Colexio en todas as súas relacións xudiciais e extraxudiciais, incluídas as que manteña cos poderes públicos, administracións públicas, organizacións, corporacións e demais entidades de calquera orde sen prexuízo de que, en casos concretos, poida tamén a xunta de goberno, en nome do Colexio, encomendar as ditas funcións a determinados colexiados ou comisións constituídas.

2. Convocar, abrir e levantar as sesións ordinarias e extraordinarias da xunta xeral e da xunta de goberno, así como presidilas e dirixir as deliberacións que nelas haxa lugar.

3. Fixar a orde do día das reunións da xunta de goberno, sinalando lugar, día e hora da celebración.

4. Autorizar co seu visto e prace, as actas de cantas sesións se celebren baixo a súa presidencia.

5. Convocar as eleccións de membros da xunta de goberno.

6. Executar os acordos que os órganos colexiais adopten nas súas respectivas esferas de atribucións.

7. Adoptar, en caso de extrema urxencia, as resolucións necesarias, dando conta inmediata ao órgano correspondente para a súa ratificación na primeira sesión que se celebre.

8. Coordinar as actuacións dos membros da xunta de goberno, sen prexuízo da competencia e responsabilidade directa destes na súa xestión.

9. Autorizar todas as certificacións que expida o secretario.

10. Autorizar os libramentos ou ordes de pagamento.

11. Lexitimar coa súa firma os libros de contabilidade e calquera outro de natureza oficial, sen prexuízo das legalizacións establecidas pola lei.

12. Asinar os escritos, os informes e comunicacións que oficialmente se dirixan polo Colexio ás autoridades e entidades públicas ou privadas.

13. Autorizar o movemento de fondos das contas correntes ou de aforro do Colexio, unindo a súa sinatura á do tesoureiro ou membro da xunta autorizado.

14. Por acordo expreso da xunta de goberno, poderá outorgar poder a favor de procuradores dos tribunais e de letrados en nome do Colexio para a representación preceptiva ou potestativa deste ante calquera órgano administrativo ou xurisdicional, en cantas accións, excepcións, recursos, incluído o de casación, e demais actuacións que se teñan que levar a cabo ante estes, en defensa, tanto do Colexio como da profesión.

Artigo 30. Atribucións do vicepresidente

O vicepresidente substituirá o decano-presidente nos casos de ausencia, vacante ou enfermidade e desempeñará todas aquelas funcións que lle encomende a xunta de goberno ou delegue nel o decano-presidente, previo coñecemento pola xunta de goberno da referida delegación.

Artigo 31. Atribucións do secretario

Independentemente dos dereitos e obrigacións especiais que lle confiren os acordos da xunta de goberno, corresponden ao secretario as seguintes atribucións:

1. Redactar e cursar, seguindo as instrucións do decano, a convocatoria e a orde do día da xunta xeral, da xunta de goberno e dos demais órganos colexiados de que sexa membro, así como preparar e facilitar a documentación necesaria para a deliberación e adopción de resolucións na sesión correspondente.

2. Levantar acta das sesións da xunta xeral, da xunta de goberno e dos demais órganos colexiados dos que forme parte.

3. Levar e custodiar os libros de actas e documentación que reflicten a actuación dos órganos citados no punto anterior e dos demais libros de obrigada levanza no Colexio.

4. Expedir as certificacións de oficio ou por instancia de parte interesada, co visto e prace do decano-presidente.

5. Expedir e tramitar comunicacións e documentos, que haxan de remitirse por orde do decano e da xunta de goberno.

6. Exercer a xefatura do persoal administrativo e de servizos necesario para a realización das funcións colexiais, así como organizar materialmente os servizos administrativos.

7. Redactar a memoria de xestión anual.

8. Levar e xestionar o Rexistro de Sociedades Profesionais.

9. Conservar, xestionar e manter actualizada a base de datos do Colexio.

10. Conservar, xestionar e manter actualizada a páxina web do Colexio e o portelo único.

Artigo 32. Atribucións do tesoureiro

Corresponde ao tesoureiro a xestión económica do Colexio para cuxo fin se lle encomendan as seguintes atribucións:

1. Recadar e custodiar os fondos pertencentes ao Colexio, sendo responsable deles, a cuxo fin asinará recibos e recibirá cobramentos.

2. Pagar os libramentos que expida o decano e os demais pagamentos de ordinaria administración autorizados de forma xeral ata a contía autorizada polo decano.

3. Ingresar e retirar fondos das contas bancarias conxuntamente con sinatura autorizada do decano.

4. Cobrar os xuros e rendas do capital.

5. Dar conta da falta de pagamento das cotas dos colexiados para que a xunta de goberno adopte as medidas procedentes.

6. Levar os libros de contabilidade legalmente exixidos que poderán ser confeccionados por persoal do Colexio ou por consultorías ou entidades alleas autorizadas.

7. Redactar o anteproxecto de orzamentos do Colexio.

8. Facer o balance orzamentario do exercicio anterior.

9. Levar o inventario dos bens do Colexio.

10. Informar á xunta de goberno, cando se lle requira para iso, da marcha económica do Colexio.

Artigo 33. Atribucións dos vogais

Serán atribucións dos vogais as seguintes:

1. Desempeñar cantos cometidos sexanlles conferidos pola xunta xeral, a xunta de goberno ou polo decano-presidente, así como pertencer ás comisións creadas na xunta de goberno do Colexio, desenvolvendo o traballo que lles corresponda.

2. Colaborar cos titulares dos restantes cargos da xunta de goberno e substituílos nas súas ausencias, vacantes ou enfermidade, de acordo co establecido nos presentes estatutos.

CAPÍTULO II
Da modificación do ámbito territorial

Artigo 34. Fusión e/ou absorción con outros colexios

A fusión do Colexio con outro ou outros colexios requirirá a aprobación por parte das tres cuartas partes do total de colexiados censados mediante votación directa e secreta, en xunta xeral extraordinaria convocada para ese efecto.

A absorción doutro Colexio por parte deste precisará a súa aprobación nas condicións que se citan no punto anterior.

Artigo 35. Segregación e cambio de sede do Colexio

A segregación da totalidade ou parte do Colexio, a súa absorción por outro ou outros colexios e o cambio do seu domicilio, necesitará a aprobación das tres cuartas partes do total de colexiados censados mediante votación directa e secreta, en xunta xeral extraordinaria convocada para calquera dos efectos citados.

CAPÍTULO III
Da Directiva Europea de Servizos

Artigo 36. Portelo único

1. O Colexio dispoñerá dunha páxina web para que, a través do portelo único previsto na Lei 17/2009, do 23 de novembro, de libre acceso ás actividades de servizos e o seu exercicio, os profesionais poidan realizar todos os trámites necesarios para a colexiación, o seu exercicio e a súa baixa no Colexio, a través dun único punto, por vía electrónica e a distancia. Concretamente, os colexios farán o necesario para que, a través do portelo único, os profesionais poidan de forma gratuíta:

a) Obter toda a información e formularios necesarios para o acceso á actividade profesional e o seu exercicio.

b) Presentar toda a documentación e solicitudes necesarias, incluíndo a da colexiación.

c) Coñecer o estado de tramitación dos procedementos nos que teña consideración de interesado e recibir a correspondente notificación dos actos de trámite preceptivos e a resolución dos mesmos polo Colexio, incluída a notificación dos expedientes disciplinarios cando non fose posible por outros medios.

d) Convocar aos colexiados ás xuntas xerais ordinarias e extraordinarias e poñer no seu coñecemento a actividade pública e privada do Colexio.

2. A través do referido portelo único, para a mellor defensa dos dereitos dos dereitos dos consumidores e usuarios os colexios ofrecerán a seguinte información, que deberá ser clara, inequívoca e gratuíta:

a) O acceso ao rexistro de colexiados, que estará permanentemente actualizado e no que constasen polo menos os seguintes datos: nomes e apelidos dos profesionais colexiados, nº de colexiación, títulos oficiais dos que estean en posesión, domicilio profesional e situación de habilitación profesional.

b) As vías de reclamación e os recursos que poderán interpoñerse en caso de conflito entre o consumidor ou usuario e un colexiado ou o Colexio profesional.

c) Os datos das asociacións ou organizacións de consumidores e usuarios ás que os destinatarios dos servizos profesionais poidan dirixirse para obter asistencia.

d) O contido dos códigos deontolóxicos.

3. O Colexio deberá adoptar as medidas necesarias para o cumprimento do previsto neste artigo e incorporar para iso as tecnoloxías precisas ou crear e manter as plataformas tecnolóxicas que garantan a interoperatibilidade entre os distintos sistemas e a accesibilidade entre das persoas con discapacidade. Para iso, o Colexio poderá poñer en marcha os mecanismos de coordinación e colaboración necesarios, inclusive coas corporacións doutras profesións.

Artigo 37. Memoria anual

1. O Colexio estará suxeito ao principio de transparencia na súa xestión. Para iso, deberá elaborar unha memoria anual que conteña a menos a seguinte información:

a) Informe anual de xestión económica, incluíndo os gastos de persoal suficientemente desagregados e especificando as retribucións dos membros da xunta de goberno en razón do seu cargo.

b) Importe das cotas aplicables aos conceptos e servizos de todo tipo, así como as normas para o seu cálculo de aplicación.

c) Información agregada e estatística relativa aos procedementos sancionadores concluídos, con indicación da infracción a que se refiren, da súa tramitación e da sanción imposta, se é o caso, de acordo, en todo caso, coa lexislación en materia de protección de datos de carácter persoal.

d) Información agregada e estatística relativa ás queixas e reclamacións presentadas polos consumidores ou usuarios, da súa tramitación e, se é o caso, dos motivos de estimación ou desestimación da queixa ou reclamación, de acordo, en todo caso, coa lexislación en materia de protección de datos de carácter persoal.

e) Os cambios no contido do seu código deontolóxico, no caso de dispoñer del.

f) As normas sobre incompatibilidades e as situacións de conflito de intereses en que se atopan os membros das xuntas de goberno.

g) Información estatística sobre a actividade do visado.

2. A memoria anual deberá facerse pública a través da páxina web no primeiro semestre de cada ano.

3. O Colexio facilitará ao consello xeral a información colexial necesaria para que este poida elaborar a súa memoria anual.

Artigo 38. Servizo de atención aos colexiados e aos consumidores ou usuarios

O Colexio deberá atender as queixas ou reclamacións presentadas polos colexiados.

Así mesmo, o Colexio dispoñerá dun servizo de atención aos consumidores ou usuarios, que necesariamente tramitará e resolverá cantas queixas e reclamacións referidas á actividade colexial e profesional dos colexiados presente calquera consumidor ou usuario que contrate os servizos profesionais, así como por asociacións e organizacións de consumidores e usuarios na súa representación ou en defensa dos seus intereses.

O Colexio, a través deste servizo de atención aos consumidores ou usuarios, resolverá sobre a queixa ou reclamación segundo proceda: ben informando sobre o sistema extra-xudicial de resolución de conflitos, ben remitindo o informe aos órganos colexiais competentes para instruír os oportunos expedientes informativos ou disciplinarios, ben arquivando ou ben adoptando calquera outra decisión conforme dereito.

A regulación deste servizo deberá prever a presentación de queixas e reclamacións por vía electrónica e a distancia.

CAPÍTULO IV
Do réxime económico e administrativo

Artigo 39. Capacidade xurídica no ámbito económico e patrimonial

O Colexio ten plena capacidade xurídica no ámbito económico e patrimonial.

O Colexio deberá contar cos recursos necesarios para atender os fins e funcións encomendados e as solicitudes de servizos dos seus membros, quedando estes obrigados a contribuír ao sostemento dos gastos correspondentes na forma regulamentaria.

O patrimonio do Colexio é único.

Artigo 40. Recursos económicos do Colexio

Os recursos económicos dos colexios poderán ser: ordinarios e extraordinarios.

1. Recursos ordinarios.

Constitúen os recursos ordinarios do Colexio:

a) As cotas de incorporación e reincorporación, así como as de inscrición dos documentos e actos inscribibles das sociedades profesionais.

b) A cota anual ordinaria, igual para todos os colexiados, sen prexuízo das bonificacións ou exencións que fixe a xunta xeral.

c) Os dereitos económicos que corresponda devindicar ao Colexio en concepto de cota de intervención profesional polo visado dos traballos que realicen os colexiados no exercicio da súa profesión, de acordo coa lexislación vixente.

d) As recargas por demora no pagamento de calquera concepto de acordo co que se estableza regulamentariamente.

e) Os procedentes das rendas ou intereses de toda clase que produzan os bens ou dereitos que integren o patrimonio do Colexio.

f) Os ingresos que obtivesen polas publicacións que se realicen, como os provenientes de matrículas de cursos e seminarios celebrados e demais conceptos análogos.

g) As cantidades que se puidesen acordar para realizar a inscrición da constitución das sociedades profesionais e dos demais actos inscribibles destas.

2. Recursos extraordinarios:

a) As cotas extraordinarias aprobadas pola xunta xeral.

b) As subvencións, donativos, herdanzas ou legados que se concedan ao Colexio, polas administracións públicas, entidades públicas ou privadas, colexiados e outras persoas xurídicas ou físicas.

c) Os bens mobles ou inmobles que, por herdanza ou doazón ou calquera outro título, entren a formar parte do capital do Colexio e as rendas e froitos dos bens e dereitos de todas clases que posúa este.

d) A obtención de créditos públicos ou privados, hipotecas dos seus bens ou calquera outro recurso conseguido por necesidade ou utilidade, logo de acordo expreso da xunta de goberno, nos límites establecidos na normativa do Colexio.

e) Os dereitos por estudos, informes e ditames que emita a xunta de goberno ou as comisións nas que aquela delegase a súa realización.

f) Os dereitos por utilización dos servizos que a xunta de goberno establecese.

g) As cantidades que por calquera outro concepto non especificado poidan percibir os colexios.

3. As recadacións dos recursos económicos son competencia da xunta de goberno, sen prexuízo das facultades que por expreso acordo poida delegar.

Artigo 41. Orzamento anual

O orzamento anual do Colexio será elaborado pola xunta de goberno, de principios de eficacia, equidade e economía, e incluirá a totalidade de ingresos e de gastos, coincidindo co ano natural. Logo de informe anticipado aos colexiados, será sometido á aprobación pola xunta xeral, de acordo co disposto nos presentes estatutos. En tanto non se aprobe o orzamento, quedará prorrogado o aprobado para o ano anterior, a razón de 1/12 por mes.

Artigo 42. Exercicio económico

O exercicio económico coincidirá co ano natural.

Anualmente a xunta xeral reunirase no primeiro semestre para a aprobación do balance da totalidade de ingresos e gastos, así como a conta de resultados habidos no Colexio durante o exercicio anterior.

O balance e conta de resultados incluiranse na memoria anual de actividades que se presentará á xunta xeral para a súa aprobación.

Artigo 43. Censores de contas

1. Anualmente, na xunta xeral anterior e como punto expreso da orde do día, serán elixidos por insaculación, de entre todos os colexiados, tres censores de contas, tamén serán elixidos tres suplentes, sendo incompatibles coa devandita elección os membros da xunta de goberno.

2. A xunta de goberno, unha vez aprobado o balance orzamentario do exercicio anterior, convocará os censores de contas para unha data determinada e poñerá á súa disposición o balance orzamentario, os libros de contabilidade, os xustificantes de ingresos e gastos e cuantos documentos considérense necesarios, co fin de que informen sobre os puntos da súa actuación.

3. A convocatoria para o día da censura de contas será tramitada cun prazo non inferior a quince días, a censura de contas realizarase no día e o informe da devandita censura será único e por escrito, sen prexuízo de que cada censor poida redactar un voto particular sobre un ou varios dos asuntos vertidos no informe.

4. A xunta de goberno prestará todo o apoio material e humano necesario para que a xunta de censores poida exercer adecuadamente as súas funcións. Así mesmo, o tesoureiro estará á súa disposición para todas as aclaracións, explicacións ou comentarios que aqueles poidan requirir.

5. O informe redactado pola xunta de censores entregarase á xunta de goberno, que o remitirá a todos os colexiados xunto á convocatoria da xunta xeral onde vaia a ser aprobado o balance orzamentario do exercicio anterior.

Artigo 44. Liquidación de bens

1. A disolución do Colexio poderá efectuarse por cesamento dos seus fins, por fusión con outro colexio ou por vontade dos colexiados. En calquera de ambos, o acordo debe adoptarse logo de acordo das tres cuartas partes da xunta xeral extraordinaria convocada especialmente para este obxecto.

2. En caso de disolución do Colexio, a xunta de goberno actuará como comisión liquidadora, sometendo a xunta xeral propostas de destino dos bens sobrantes, unha vez liquidadas as obrigacións pendentes.

TÍTULO IV
Do réxime electoral

Artigo 45. Disposición xeral

Todos os cargos da xunta de goberno do Colexio serán elixidos por sufraxio universal, libre, directo e secreto. O voto é indelegable e poderá exercerse persoalmente ou por correo.

Artigo 46. Elector e elixible

1. Para os cargos da xunta de goberno, serán electores todos os colexiados de número que figuren como tales no censo electoral do Colexio, no que se incluirán quen estea dados de alta o día da convocatoria das eleccións.

Todos os colexiados residentes fóra do ámbito territorial do colexio, estarán adscritos a unha das provincias do territorio colexial.

2. Non poderán ser electores e excluiranse do censo:

a) Os que en virtude de expediente sancionador estivesen suspendidos no exercicio profesional, ou fosen privados ou inhabilitados para o desempeño de cargos directivos, mentres dure a suspensión, privación ou inhabilitación.

b) Os que, ao ser aprobado o censo electoral definitivo, non se atopen ao corrente das cotas e/ou doutras obrigacións económicas devindicadas polo Colexio.

3. Os candidatos para ser elegibles deberán reunir as seguintes condicións:

a) Residir e/ou traballar no ámbito territorial do Colexio.

b) Para o cargo de decano-presidente, será necesario levar cinco anos consecutivos como membro deste colexio.

c) Para os cargos de vicepresidente, tesoureiro e secretario precisásense dous anos consecutivos como colexiados.

d) Para os cargos de vogais, os candidatos deben de levar un ano como colexiados.

e) Todos os candidatos á xunta de goberno deberán atoparse no exercicio da profesión, en calquera das formas que se indican no punto 2 do artigo 2 dos presentes estatutos. Nos supostos de que o colexiado se atope en situación de baixa laboral ou profesional, só se considerará exercente no caso de que a dita situación teña carácter temporal e non permanente.

f) Non poderán ser elixibles os colexiados que sexan membro dos órganos reitores doutro colexio profesional.

Artigo 47. Convocatoria

A convocatoria a eleccións deberá ser acordada expresamente pola xunta de goberno e ser anunciada por calquera medio dispoñible no Colexio (correo postal, correo electrónico ou páxina web, esta última sempre con acceso restrinxido).

A convocatoria conterá necesariamente:

a) Os cargos a que a elección se refira.

b) A convocatoria desta, determinando lugar, día e hora para as eleccións.

c) O calendario electoral.

A convocatoria deberá ser remitida con cinco días de antelación como mínimo ao día sinalado no calendario para a publicación do censo electoral.

Artigo 48. Xunta electoral

1. A xunta electoral será elixida por insaculación, de entre todos os colexiados, pola xunta xeral cada dous anos; será punto expreso da orde do día, e serán incompatibles coa devandita elección os membros da xunta de goberno. Estará composta de tres membros titulares e seis suplentes.

2. Os membros da xunta electoral serán convocados polo decano-presidente por carta certificada, fax ou outro medio do que quede constancia, para a celebración do acto de constitución. Reunida a xunta electoral no lugar, día e hora fixados, levantarase acta de constitución, así como da aceptación e toma de posesión dos cargos, que será inmediata. Os tres colexiados que formen a xunta electoral, elixirán de entre eles e por eles mesmos, os cargos de presidente, secretario e vogal da xunta.

3. Coa acta de constitución e o censo abrirase o expediente electoral, ao que se irán agregando as actas de cada reunión da xunta electoral. O expediente electoral estará baixo a custodia do secretario da xunta electoral, quen o conservará ata tres meses despois de celebradas eleccións se non se producise recurso ningún e, se é o caso, ata a resolución firme dos recursos que se producisen.

4. Non poderán formar parte da xunta electoral os que presenten a súa candidatura a calquera dos cargos sometidos a elección, procedéndose nese caso á súa substitución polo primeiro suplente, no momento que presentar aquela.

5. A xunta electoral reunirase cantas veces se estime conveniente a xuízo do seu presidente ou de dous dos seus membros. En todo caso as sesións serán convocadas polo seu presidente por calquera medio que permita ter constancia da súa recepción, substituíndo o secretario ao presidente, no exercicio desta e outras competencias, cando este non poida actuar por causa xustificada. A asistencia ás reunións é obrigatoria polos membros da xunta debidamente convocados quen incorre en responsabilidade se deixan de asistir sen escusarse e xustificado oportunamente. O lugar da reunión será salvo xustificación fundada a sede do Colexio en Santiago.

6. A xunta electoral quedará validamente constituída coa asistencia polo menos de dous dos seus compoñentes. A asistencia non poderá delegarse. Os acordos tomaranse por maioría dos presentes, sen voto de calidade do presidente. De toda reunión, o secretario da xunta electoral estenderá a correspondente acta, que se aprobará ao final da reunión, asinando todos os asistentes.

7. A xunta de goberno asesorará a xunta electoral en todo o que por esta sexa requirido e facilitará a esta todos os medios materiais, de oficina, secretaría, etc., que precisen.

8. A xunta de goberno poderá facilitar ás sesións da xunta electoral, en calidade de asesor ou colaborador, sen voto, a persoa ou persoas cuxa asistencia se considere conveniente.

9. Os membros da xunta electoral desempeñarán o seu labor gratuitamente, pero serán resarcidos polo Colexio de todos os gastos que o seu nomeamento e exercicio do cargo lles produza.

Artigo 49. Fins e funcións da xunta electoral

Ademais das competencias mencionadas, corresponde á xunta electoral:

a) Garantir a transparencia e obxectividade do proceso electoral e do principio de igualdade, observando e facendo observar a presente normativa.

b) Resolver as queixas, reclamacións e recursos que se presenten de acordo coa presente norma.

c) Denunciar ante a xunta de goberno as actuacións que ao seu xuízo merezan corrección disciplinaria.

d) Constituírse en mesa electoral e velar pola pureza das eleccións.

Artigo 50. Censo electoral

1. As listas electorais, ou censo, deberán ser supervisadas pola xunta de goberno, e serán expostas no taboleiro de anuncios da oficina do Colexio e na páxina web do Colexio con acceso restrinxido, desde o mesmo día da súa publicación.

2. A xunta electoral recibirá o censo electoral o mesmo día da constitución desta, estando ao seu cargo a partir de entón.

3. Contra a inclusión ou exclusión no censo electoral, os colexiados, sexan ou non electores, poderán presentar as reclamacións que consideren oportunas nos prazos que se fixen no calendario electoral. Estas reclamacións serán resoltas pola xunta electoral dentro do terceiro día hábil ao da súa presentación.

4. A xunta de goberno deberá facilitar inmediatamente e constantemente cuantos datos sobre o censo precise a xunta electoral.

5. Resoltas as reclamacións ao censo, a xunta electoral confeccionará o censo electoral definitivo sobre a base do entregado pola xunta de goberno.

Artigo 51. Candidaturas

1. Os que reunindo a calidade de elixibles aspiren a ser proclamados candidatos, presentarán a súa candidatura no rexistro do Colexio: persoalmente na sede do Colexio, por carta certificada, ou por vía telemática, dirixida á xunta electoral, dentro do prazo sinalado no calendario electoral, debendo indicar o domicilio do interesado para efectos de notificacións.

2. As candidaturas presentaranse de forma individual e levará polo menos o nome do candidato e o cargo a que se presenta. Cada aspirante só poderá ser candidato a un só cargo.

3. Os colexiados que se presenten a elección poderán realizar, ao seu cargo, entre os demais colexiados, a propaganda que estimen oportuna. A xunta electoral facilitará aos candidatos, se eles o pedisen por escrito, copia por escrito do censo electoral ou copia en dixital da base de datos do censo electoral.

4. Será fraudulento o uso indebido dos datos do censo electoral para outros fins que non sexan para a campaña electoral.

5. Serán nulas as candidaturas que non reúnan os requisitos desta normativa.

6. A xunta electoral solicitará aos candidatos cantas aclaracións crea mester e proclamará as candidaturas aceptadas no prazo fixado no calendario electoral.

7. Contra a aceptación ou rexeitamento de candidaturas, poderase interpoñer recurso ante a xunta electoral dentro do prazo sinalado no calendario, que deberá ser resolto dentro do terceiro día hábil á presentación do recurso.

Artigo 52. Mesa electoral

1. A mesa electoral constituirase cos mesmos compoñentes e cargos da xunta electoral o día da celebración de eleccións e antes de comezar a votación, levantándose a acta correspondente. Dispoñerá das urnas suficientes para a elección e de tantas listas electorais como membros e interventores se atopen na mesa.

2. Os candidatos poderán nomear un interventor, que sexa pola súa vez elector non candidato, para os sos efectos de asistir á votación e reconto de votos. O nomeamento deberá ser feito por escrito, asinado polo candidato e coa aceptación do interventor antes do comezo das votacións e entregado á mesa electoral.

3. Se non se presentaron máis candidatos que os postos convocados, non se celebrará a votación, sendo innecesaria a constitución da mesa electoral, e a xunta electoral procederá a proclamar como elixidos os candidatos, respectando os prazos establecidos para efectos de posibles impugnacións.

Artigo 53. Votación

1. O dereito para votar acreditarase pola constancia do votante no censo electoral e a demostración da súa identidade.

2. Nas dependencias do lugar onde se celebre a votación, estarán expostas as candidaturas proclamadas, así como papeletas e sobres en cantidade suficiente.

3. As papeletas e sobres que deben contelas haberán de ser iguais. Haberá tantas clases de papeletas como cargos saian a elección, salvo os cargos comúns a todas as provincias que se agruparán nunha soa papeleta.

4. Nas papeletas faranse constar o ou os cargos que se votan e debaixo o nome e apelido de todos os candidatos que opten ao devandito cargo, precedido cada un dun cadrado baleiro, onde se poida marcar o candidato elixido.

5. As papeletas introduciranse en sobres onde figure impreso o ou os cargos para elixir, para o seu depósito na urna correspondente no momento da votación.

6. O voto poderá emitirse por correo certificado e de forma individual. Para a súa validez, haberá de ser recibido, no sitio, día e hora determinado no calendario electoral.

7. A xunta electoral enviará con tempo suficiente a cada un dos electores, as normas para o voto por correo, as candidaturas proclamadas e as papeletas e sobres suficientes para que, o que non poida votar presencialmente, poida facelo por correo.

8. O voto por correo deberá cumprir o seguinte:

a) Os sobres que conteñan as candidaturas correspondentes, introduciranse no sobre que se envíe por correo, que poderá ser de calquera formato.

b) O sobre do correo conterá, ademais dos sobres das candidaturas, a fotocopia do DNI do elector asinada en orixinal polo titular.

9. Nin no lugar en que se celebren as eleccións, nin nas súas dependencias, escaleiras de acceso ou portal do edificio, se é o caso, poderá realizarse propaganda electoral ningunha.

Artigo 54. Escrutinio

1. Á hora sinalada para a finalización das eleccións, o presidente da mesa anunciará que vai concluír a votación e non se permitirá a entrada ao local a ningunha persoa máis, procedendo a votar os presentes que non o fixeron aínda, posteriormente desaloxarase a toda persoa allea á xunta electoral e interventores. A seguir, procederá a introducir nas urnas os sobres que conteñan as papeletas de voto emitidas por correo, cada un na súa urna correspondente, comprobando os datos do DNI no censo. Por último, votarán os membros da mesa e os interventores.

2. Procederá o presidente á lectura dos votos extraendo un a un os sobres das urnas, abríndoos e lendo en voz alta o nome dos candidatos votados, poñéndoo de manifesto ao resto da mesa e aos interventores.

3. Serán nulas as papeletas:

a) Que conteñan emendas, riscaduras, notas ou comentarios.

b) Toda papeleta que non se corresponda coa facilitada polo Colexio.

c) Que apareza nunha urna diferente ao correspondente cargo.

d) As papeletas que conteñan voto a máis dunha persoa.

e) Se nun mesmo sobre houbese máis dunha papeleta, todas elas serán nulas, salvo que sexan iguais, que se contabilizará como unha soa.

f) O voto por correo que non reúna os requisitos establecidos ou que, ao comprobar o censo, resulte que o remitente xa votara persoalmente.

g) O voto por correo recibido por conduto diferente ao establecido.

4. Feito o reconto de votos, preguntará o presidente se hai algunha reclamación que facer sobre o escrutinio, resolvendo a mesa electoral por maioría.

5. Por último, o presidente anunciará publicamente o resultado, especificando o número de votantes, o de papeletas lidas, o de papeletas válidas e o de papeletas en branco, o de papeletas nulas e o número de votos obtidos por cada candidato. Será proclamado o candidato que máis votos obtivese, en caso de empate haberá de celebrarse unha segunda volta electoral entre os candidatos empatados no prazo de quince días. Dos resultados estenderase certificación aos interventores e candidatos que os soliciten.

6. As papeletas, en presenza dos asistentes, serán destruídas con excepción das declaradas nulas ou que fosen obxecto dalgunha reclamación, as cales se unirán á acta correspondente asinada por todos os compoñentes da mesa e os interventores, uníndose a continuación ao expediente electoral. Tamén se unirán á acta, as fotocopias do DNI asinadas que acompañaban o voto por correo.

Artigo 55. Recursos

Contra a denegación dos recursos, escritos ou reclamacións presentadas á mesa electoral, poderá interpoñerse recurso de alzada ante o consello xeral e unha vez esgotada a vía colexial, quedará expedita a vía contencioso-administrativa.

TÍTULO V
Do réxime disciplinario

Artigo 56. Réxime disciplinario

1. O Colexio sancionará todos aqueles actos dos colexiados que constitúan infraccións culpables dos presentes estatutos, normativa, código deontolóxico dos acordos tomadas pola xuntas xerais e de goberno, con independencia da responsabilidade civil ou penal en que poidan incorrer. De igual forma, serán sancionadas as sociedades profesionais inscritas no Rexistro de Sociedades Profesionais do Colexio cando contraveñan as obrigas que han de cumprir.

2. Cando se trate de membros da xunta de goberno, a competencia corresponderá ao consello xeral.

Artigo 57. Infraccións

As infraccións polas que disciplinariamente poderán sancionarse aos colexiados clasifícanse en leves, graves e moi graves.

1. Serán infraccións leves:

a) A neglixencia no cumprimento de preceptos estatutarios, regulamentarios ou de acordos dos órganos reitores do Colexio ou do consello xeral.

b) As incorreccións de escasa transcendencia na realización dos traballos profesionais.

c) As faltas reiteradas de asistencia ou delegación desta ás reunións da xunta de goberno, das comisións ou do consello xeral.

d) As inconveniencias e desconsideracións de escasa importancia entre compañeiros.

e) Os actos leves de indisciplina colexial, así como aqueles que publicamente danen o decoro ou o prestixio da profesión e, en xeral, os demais casos de incumprimento dos deberes profesionais ou colexiais ocasionados por un descoido excusable e circunstancial.

2. Serán infraccións graves:

a) O incumprimento doloso do disposto nos preceptos estatutarios, regulamentarios ou de acordos dos órganos reitores do Colexio ou do consello xeral.

b) A falsidade en calquera dos documentos que deban tramitarse a través do Colexio.

c) A non realización dos traballos contratados e a percepción inxustificada de honorarios profesionais.

d) O encubrimento do intrusismo profesional polos colexiados.

e) A realización de traballos ou contratación de servizos que atenten o prestixio profesional ou que pola xurisdición competente fosen declaradas actuacións constitutivas de competencia desleal, nos termos establecidos na lexislación vixente.

f) Calquera forma de manifestación pública, verbal ou escrita, de asuntos inherentes á profesión que orixinen un desprestixio ou menoscabo desta ou dos compañeiros.

g) Os reiterados actos de indisciplina colexial, incluídos os de desconsideración cara aos compoñentes da xunta de goberno e demais órganos colexiais ou do consello xeral.

h) O incumprimento reiterado das obrigacións económicas co Colexio.

i) As faltas de respecto e os atentados contra a dignidade e a honra dos compañeiros con ocasión do exercicio da profesión.

j) A comisión de polo menos dúas infraccións leves no transcurso dun ano, desde a data de comisión da primeira infracción.

k) O incumprimento dos deberes, obrigacións e responsabilidades propias do seu cargo no caso dos cargos electos.

3. Serán infraccións moi graves:

a) Serán consideradas infraccións moi graves todas as acabadas de cualificar como graves, sempre que concorran nelas circunstancias de especial malicia e dolo, polas cales os seus efectos presenten notable relevancia danosa para quen resulte prexudicados por estas.

b) A realización de feitos constitutivos de delito que afecten a deontoloxía ou a ética profesional.

c) Realizar accións que ataquen de modo transcendente a dignidade ou a ética profesional, ao Colexio ou ao consello xeral.

d) O exercicio da profesión estando en situación de inhabilitación profesional ou incurso en causa de incompatibilidade ou prohibición.

e) A comisión de dúas infraccións graves cometidas no prazo de dous anos, contado desde a data de comisión da primeira.

Artigo 58. Sancións

As sancións que poidan impoñerse serán:

1. Para as infraccións leves:

a) Apercibimento verbal.

b) Apercibimento por escrito.

c) Reprensión privada.

2. Para as infraccións graves:

a) Reprensión pública.

b) Inhabilitación para o exercicio de cargos corporativos, por un tempo non inferior a tres meses e non superior a dous anos, para os que teñen algún cargo. Para o resto, a inhabilitación será por un mínimo de dous anos e un máximo de catro.

c) Suspensión temporal de exercicio profesional por un período superior a tres meses e inferior a un ano.

3. Para as infraccións moi graves:

a) Suspensión temporal da colexiación por un prazo superior a un ano e inferior a dous anos.

b) Expulsión definitiva do Colexio.

Cando o infractor obtivese beneficio económico da infracción, impoñeráselle unha multa cun mínimo do equivalente da devandita avaliación e un máximo do dobre desta.

Artigo 59. Prescricións

1. As infraccións leves prescriben aos seis meses, as graves aos dous anos e as moi graves aos tres anos, contado desde o día en que a infracción se cometese.

A prescrición interromperase desde que se inicie o procedemento sancionador, con coñecemento do interesado, e volverá correr o prazo se devandito procedemento permanecese paralizado por máis de catro meses por causa non imputable ao interesado.

2. As sancións prescribirán, de non facerse efectivas polo Colexio, nos mesmos prazos que as faltas segundo a súa clase, salvo a expulsión do Colexio que prescribirá aos cinco anos. O prazo empezará a contarse desde o momento en que adquirise firmeza a resolución sancionadora e interromperase a prescrición pola iniciación, con coñecemento do interesado, da súa execución, renovándose se esta se paraliza máis dun mes por causa non imputable ao infractor.

Os sancionados poderán solicitar a cancelación das sancións nos seus respectivos expedientes persoais, unha vez transcorridos os seguintes prazos, contado desde o cumprimento da sanción:

a) Un ano, no caso das sancións por faltas leves.

b) Dous anos, no caso das sancións por faltas graves.

c) Tres anos, no caso das sancións por faltas moi graves.

Artigo 60. Procedemento sancionador

1. O réxime sancionador exercitarase de acordo cos seguintes principios:

a) Legalidade.

b) Irretroactividade.

c) Tipicidade.

d) Proporcionalidade.

2. Non poderá acordarse ningunha sanción sen a incoación do oportuno expediente. No expediente administrativo deberán garantirse, como mínimo, os seguintes principios:

a) Presunción de inocencia.

b) Audiencia ao afectado.

c) Motivación da resolución final.

d) Separación do órgano instrutor e decisorio.

3. No caso de que sexa un dos membros da xunta de goberno, quen vaia a ser expedientado, a competencia corresponderá ao consello xeral.

4. O expediente disciplinario poderá incoarse por iniciativa propia da xunta de goberno ou en consideración a unha denuncia realizada por terceiros. Neste caso, a xunta de goberno, poderá acordar a instrución de información reservada antes de decidir a incoación do expediente ou, se procede, que se arquiven as actuacións sen ningún recurso ulterior.

5. A instrución levará a cabo con audiencia do interesado, debendo designarse un instrutor e un secretario pola xunta de goberno de entre os seus compoñentes (salvo que o Colexio teña constituída unha comisión disciplinaria). O cesamento dun Instrutor non poderá efectuarse en tanto non ultime os seus expedientes en trámite nin aínda por cesamento estatutario como membro da xunta de goberno, salvo que existise causa xustificada para iso a xuízo da xunta de goberno.

6. Non poderán actuar nos expedientes disciplinarios aqueles membros da xunta de goberno que teñan coa expedientado relación de consanguinidade ata o cuarto grao ou de afinidade ata o segundo, ou teñan con el amizade íntima, inimizade manifesta ou interese profesional notorio en relación cos feitos que deron lugar á incoación do expediente, considerándose como falta moi grave a inobservancia desta prescrición. O expedientado, unha vez se lle notifique a incoación do expediente e a designación de instrutor e secretario, poderá, no termo do prazo para formular alegacións, recusar aquel membro da xunta de goberno en quen concorrese as circunstancias antes sinaladas, correspondendo resolver á propia xunta de goberno sobre a procedencia ou non da abstención ou recusación. Se prosperase a recusación de todos os membros da xunta de goberno, remitirase o expediente para a súa tramitación ao consello autonómico, ou ao consello xeral se aquel non estivese constituído.

7. Unha vez notificado o acordo de incoación do expediente sancionador, abrirase un prazo de dez días para formular alegacións e propoñer as probas que se estimen oportunas.

8. O instrutor practicará as probas e actuacións que conduzan ao esclarecemento dos feitos e á determinación das responsabilidades susceptibles de sanción, en prazo máximo de tres meses, que poderá ser ampliado ata outros tres meses máis.

O instrutor comunicará ao interesado, con antelación suficiente, o inicio das operacións necesarias para a realización das probas que fosen admitidas. Na notificación consignarase o lugar, data e hora en que se practicará a proba, podendo nomear o interesado, a asesores para que lle representen e asistan.

9. Á vista das actuacións practicadas, formulará un prego de cargos, onde se expoñerán con claridade os feitos imputados susceptibles de integrar unha infracción sancionable, as posibles sancións que se puideren impoñer, indicando o órgano competente para impoñer a sanción. Igualmente, poderá propoñerse o sobresemento e arquivo do expediente.

10. O prego de cargos notificarase ao interesado concedéndolle un prazo de 15 días hábiles para que poidan contestalo, podendo o interesado achegar e propoñer todas as probas de que tente valerse. Contestado o prego de cargos ou transcorrido o prazo para facelo, o instrutor formulará proposta de resolución que se notificará ao interesado para que no prazo de 15 días hábiles poidan alegar canto consideren conveniente á súa defensa.

11. A proposta de resolución remitirase á xunta de goberno para que adopte a resolución que proceda, que deberá ser tomada por maioría absoluta. A resolución definitiva que se adopte deberá ser, en todo caso, motivada e indicarase os medios de impugnación de que pode dispoñer o interesado.

Artigo 61. Recursos contra sancións

Contra as sancións disciplinarias, de calquera tipo, imposta pola xunta de goberno poderase interpoñer no prazo dun mes, recurso de alzada ante o consello xeral, que deberá resolver no prazo de tres meses. Esta resolución esgotará a vía administrativa e contra esta poderá recorrerse ante a xurisdición contencioso-administrativa, logo de interposición, se é o caso, do recurso potestativo de reposición.

Unha vez que a sanción sexa firme en vía administrativa e sen prexuízo da súa posible suspensión polos tribunais da xurisdición contencioso-administrativa, poderá ser executada polo Colexio.

TÍTULO VI
Réxime xurídico dos actos colexiais

Artigo 62. Réxime xurídico dos actos colexiais

1. Os acordos e normas colexiais serán publicados, mediante a súa inserción no boletín do Colexio (se o houber), carta circular, medios informáticos ou calquera outro, de forma que poidan ser coñecido por todos os colexiados.

2. Así mesmo, a xunta de goberno deberá notificar aqueles actos que afecten dereitos e intereses dos destinatarios dos devanditos acordos.

3. Os actos emanados dos órganos do Colexio, en canto estean suxeitos ao dereito administrativo, unha vez esgotados os recursos corporativos, serán inmediatamente recorribles ante a xurisdición contencioso-administrativa, de acordo co que dispoña a lexislación estatal que regule o procedemento administrativo común das administracións públicas. Consideraranse, en todo caso, como funcións públicas do Colexio o control das condicións de ingreso na profesión, a tramitación de informes preceptivos, o visado de traballos profesionais, e a potestade disciplinaria.

4. A Lei 39/2015, sobre procedemento administrativo común, aplicarase, así mesmo, de forma supletoria, en todo o non previsto polos presentes estatutos.

5. As cuestións de índole civil, penal e laboral quedarán sometidas á normativa que en cada caso lles sexa de aplicación.

Artigo 63. Tipos de recursos

Contra os actos e acordos dos órganos de goberno do Colexio poderá interpoñerse recurso de alzada ante o consello xeral en forma e prazos regulados pola Lei 39/2015, do 1 de outubro, do procedemento administrativo común das administracións públicas.

Artigo 64. Nulidade dos actos dos órganos colexiais

Os actos desta corporación colexial serán nulos de pleno dereito ou anulables nos casos establecidos na Lei 39/2015, do 1 de outubro, do procedemento administrativo común das administracións públicas.

Artigo 65. Suspensión dos actos dos órganos colexiais

Sen prexuízo das atribucións que a lexislación outorga aos órganos xudiciais en materia de suspensión de actos das corporacións profesionais, sexa ou non por petición de calquera colexiado, están obrigados a suspender os actos propios ou de órgano inferior, que consideren nulas de pleno dereito.

1. A xunta xeral.

2. A xunta de goberno.

3. O decano-presidente.

Os acordos de suspensión deberán adoptarse pola xunta xeral, a xunta de goberno e o decano-presidente no prazo de cinco días contado desde a data en que tivese coñecemento dos actos considerados nulos, sempre que previamente se iniciou un procedemento de revisión de oficio ou se interpuxo recurso e concorran as circunstancias previstas pola lexislación de réxime xurídico das administracións públicas e do procedemento administrativo común para a nulidade dos devanditos actos.

Disposición transitoria primeira

Mantense a vixencia do Regulamento de honras e distincións do Colexio, aprobado en xunta xeral.

Disposición transitoria segunda

Os colexiados que forman parte da xunta de goberno e demais órganos colexiais e fosen elixidos ou designados con anterioridade á entrada en vigor do presentes estatutos, continuasen no exercicio dos seus cargos ata que proceda á súa renovación dentro dos prazos previstos estatutariamente.

Disposición adicional terceira. Facultade de control documental das administracións públicas

O previsto nestes estatutos non afecta á capacidade que teñen as administracións públicas, en exercicio da súa autonomía organizativa e no ámbito das súas competencias, para decidir caso por caso para un mellor cumprimento das súas funcións, establecer cos colexios os convenios ou contratar os servizos de comprobación documental, técnica ou sobre o cumprimento da normativa aplicable que consideren necesarios relativos aos traballos profesionais.