O Consello da Xunta de Galicia, na súa reunión do 6 de xullo de 2017, adoptou o Acordo polo que se fixan criterios complementarios en relación co proceso de integración das distintas modalidades de transporte público de competencia da Xunta de Galicia que faciliten a optimización deste servizo público, no marco do procedemento para a implantación da primeira fase da planificación do transporte público de Galicia.

Para o seu coñecemento xeral, a Dirección Xeral de Mobilidade resolve dispor a súa publicación no Diario Oficial de Galicia como anexo á presente resolución.

Ignacio Maestro Saavedra
Director xeral de Mobilidade

ANEXO
Acordo polo que se fixan criterios complementarios en relación co proceso
de integración das distintas modalidades de transporte público de competencia
da Xunta de Galicia que faciliten a optimización deste servizo público, no marco
do procedemento para a implantación da primeira fase da planificación
do transporte público de Galicia

1. Con data do 24 de maio de 2017, o Consello da Xunta de Galicia adoptou o acordo polo que se autorizaron e fixaron determinadas regras en relación coa integración das distintas modalidades de transporte público de competencia da Xunta de Galicia que faciliten a optimización deste servizo público, no marco do procedemento para a implantación da primeira fase da planificación do transporte público de Galicia.

O dito acordo produciuse no marco da planificación para a elaboración do Plan de transporte público de Galicia, regulado pola Lei 10/2016, do 19 de xullo, de medidas urxentes para a actualización do sistema de transporte público de Galicia, así como da Lei 2/2017, do 8 de febreiro, de medidas fiscais, administrativas e de ordenación, e estableceu un primeiro ámbito de integración de servizos de transporte.

Esta iniciativa é posible e, ao tempo, vén determinada pola manifestación expresa por unha parte significativa das empresas que viñan prestando os servizos de transporte público regular de viaxeiros por estrada de uso xeral da súa decisión de renunciar á facultade de continuar coa súa explotación durante o prazo de elaboración e implantación do indicado Plan de transportes de Galicia.

Xa que logo, a Administración viuse na obriga de avanzar nunha primeira fase de definición do dito mapa de servizos, facilitando, ao tempo, que se poida dispoñer dunha maior racionalización da rede de transporte, dunha maior adaptación ao territorio e, tamén dunha maior cobertura territorial dos servizos.

2. Consonte a normativa indicada, e no ámbito do acordo previo do Consello da Xunta de Galicia do 24 de maio de 2017, corresponde á consellería competente en materia de transportes a posición de órgano de contratación destes novos servizos que deben ser obxecto de contratación.

Para tal fin, pártese da planificación elaborada, na cal se integrou, no ámbito dos servizos de transporte público regular de uso xeral, a prestación parcial de servizos baixo demanda das persoas usuarias e a reserva de prazas a favor do colectivo de escolares aos cales a consellería competente en materia de educación recoñeza o dereito a transporte escolar público. E xa se definiu unha estrutura de servizos que facilitará a participación pública grazas ao seu dimensionamento con criterios de racionalidade.

Continuando con esta mesma liña de traballo, cómpre establecer criterios complementarios que, dentro do procedemento de adxudicación legalmente establecido, garantan tanto a máxima participación posible, sobre todo da pequena e mediana empresa, contribuíndo ao mantemento do tecido empresarial existente, o que contribuirá a garantir a máxima concorrencia non só neste procedemento, senón tamén no procedemento aberto dirixido á implantación dos servizos que establecerá o Plan de transporte público de Galicia, e, por outra parte, contribuíndo tamén á conservación das condicións laborais existentes neste ámbito, na liña non só de garantirlles aos traballadores que prestan os seus servizos nos actuais contratos de transporte o pleno recoñecemento dos dereitos laborais, senón tamén de facilitar o cumprimento das obrigas derivadas dos convenios colectivos e outras normas e acordos relativos ás condicións de traballo, recollendo así os postulados do propio Regulamento CE 1370/2007 do Parlamento Europeo e do Consello, do 23 de outubro de 2007, sobre os servizos públicos de transporte de viaxeiros por ferrocarril e estrada e polo que se derrogan os regulamentos (CEE) nº 1191/69 e (CEE) nº 1107/70 do Consello.

En virtude do anterior,

ACORDO:

Primeiro. Obxecto

O presente acordo ten por obxecto establecer criterios complementarios en relación co proceso de integración das distintas modalidades de transporte público da Xunta de Galicia que faciliten a optimización do servizo público, así como determinar criterios a seguir no proceso de adxudicación coa finalidade de promover a participación da pequena e mediana empresa e a garantía das condicións sociais no ámbito destes servizos.

Segundo. Ámbito e alcance

2.1. Os servizos de transporte público a que se refire o presente acordo son os incluídos no ámbito do Acordo do Consello da Xunta de Galicia do 24 de maio de 2017.

2.2. Como anexo do presente acordo insírese a relación de contratos de transporte escolar que, consonte o disposto nos artigos 88 da Lei 12/2014, do 22 de decembro, de medidas fiscais e administrativas, e 73.2 da Lei 2/2017, do 8 de febreiro, se ven afectados pola reordenación prevista e, consecuentemente, respecto dos que se iniciará o procedemento de resolución contractual, por seren atendidas as súas mesmas relacións de tráficos por servizos de transporte público regular de viaxeiros por estrada de uso xeral que serán obxecto de adxudicación, garantindo así a plena satisfacción do dereito ao correspondente servizo de transporte público dos escolares.

Terceiro. Medidas para a promoción dunha contratación responsable socialmente e para a promoción da concorrencia no procedemento

3.1. Impulso da participación da pequena e mediana empresa.

A Administración competente para a adxudicación directa dos servizos que se prevexan nos proxectos de xestión de servizos públicos de transporte a que se refire este acordo instrumentará medidas que redunden na mellora das oportunidades de participación das pequenas e medianas empresas no referido proceso, coa finalidade adicional de non destruír o tecido empresarial existente e garantir deste xeito que no prazo de dous anos, cando deban repetirse estas licitacións, a concorrencia existirá e será efectiva.

A Administración tramitará un procedemento único de adxudicación que comprenderá a totalidade dos proxectos como distintos lotes, de tal xeito que a adxudicación de cada un destes lotes dará lugar a un contrato separado.

Consonte o artigo 77.2 da Lei 2/2017, do 8 de febreiro, a Administración remitirá invitación para presentar oferta a un mínimo de tres empresas de entre as que comunicasen o seu interese en seren invitadas, sempre que resulte posible. O órgano de contratación, cumprindo o indicado, poderá limitar o número máximo de empresas a invitar para cada lote e establecer os criterios que se terán en conta para realizar a dita invitación, xustificándoo no expediente, de acordo co indicado no artigo citado. En particular, poderá utilizar criterios de protección das pequenas e medianas empresas, en especial favorecendo as de reducida dimensión e microempresas, concedéndolles a prioridade para a invitación ás citadas empresas consonte os criterios que se establezan. Así mesmo, fomentarase a participación en unión temporal de empresarios das indicadas empresas.

Igualmente, poderá limitarse o número máximo de invitacións que se realicen a unha mesma empresa ou empresas vinculadas. Esta vinculación apreciarase nos termos establecidos na lexislación de contratos do sector público, así como respecto das que actúen baixo unidade de decisión ou nunha dirección única, en particular, cando a maioría dos membros do órgano de administración da sociedade dominante sexan membros do órgano de administración ou altos directivos da sociedade dominante ou doutra dominada por esta.

Ás empresas invitadas a presentar oferta exixiráselles sempre unha declaración das empresas con que teñan vinculación, nos termos establecidos no punto anterior.

En relación con aqueles lotes en que non se acadase o número mínimo de manifestacións de interese indicado anteriormente, a Administración, ademais das empresas que comunicasen o seu interese, poderá invitar a outras empresas motivando os criterios de elección no expediente.

O órgano de contratación limitará o número máximo de lotes que poidan adxudicarse a unha soa empresa ou empresas vinculadas nos termos antes expostos, indicándoo nas invitacións que se cursen, que non superará a porcentaxe do 25 % respecto do número total de lotes. Para estes efectos, solicitarase das empresas participantes unha relación de preferencia dos lotes cuxa adxudicación pretendan. No caso de que non fosen indicados pola empresa, adxudicaránselles en primeiro lugar aqueles lotes en que a oferta sexa a única admitida; o resto dos lotes adxudicaranse por orde de importancia económica dos proxectos.

No suposto de contratos que quedasen desertos, a Administración procederá á súa adxudicación consonte o indicado no artigo 77.3 da Lei 2/2017, do 8 de febreiro, ou á adopción das medidas que prevé o artigo 76.2 da mesma lei, coa finalidade de garantir a prioritaria prestación do servizo público.

3.2. Criterios de admisión das empresas: capacidade, solvencia económica e financeira e técnica.

A administración e, por tanto, os pregos de condicións deberán velar pola máxima participación sectorial e social. Para tal fin, no indicado procedemento de adxudicación, e nos termos do artigo 77.2 e 3 da Lei 2/2017, do 8 de febreiro, invitaranse para formular oferta as empresas capacitadas para a súa prestación que se ofrecesen. Igualmente, preverase que as ditas empresas poderán formular oferta individualmente, en unión temporal de empresas, ou en agrupación, con calquera outra empresa capacitada para a prestación do servizo público.

Coa finalidade de facilitar a máxima participación das pequenas e medianas empresas, tendo en conta os requisitos de solvencia económica, técnica e profesional, e de honorabilidade, que require a normativa sectorial ás empresas para acceder á autorización ou título habilitante para o exercicio da actividade de transporte en vehículos de máis de 9 prazas, incluído o condutor (VD Nacional), a súa tenza considerarase suficiente para os efectos de xustificar a solvencia económica e financeira e técnica no procedemento de adxudicación destes contratos.

3.3. Subcontratación: porcentaxe máxima.

Nos procedementos de adxudicación dos presentes contratos, a Administración velará, en todo caso, por que a subcontratación non supoña unha diminución dos estándares de calidade do servizo e por que non se produzan situacións de demora nos pagamentos aos subcontratistas dos servizos, con expresa mención das obrigas previstas no artigo 52 da Lei 1/2015, do 1 de abril, de garantía da calidade dos servizos públicos e da boa administración.

Para este fin, o prego único de condicións que rexerá as distintas adxudicacións directas poderá establecer que, por petición do subcontratista, e sempre que o contratista principal non se opoña xustificadamente, a Xunta de Galicia aboe directamente ao subcontratista os importes correspondentes a compensacións por obrigas do servizo ou por bonificacións de tarifas, as cantidades que o contratista principal lle deba polos servizos prestados. Nese caso, o prego deberá establecer un procedemento que garanta que o contratista principal poida opoñerse aos pagamentos indebidos, así como que impida que a Administración pague indebidamente por servizos xa aboados ou non realizados.

En todo caso, a porcentaxe máxima que poderá ser obxecto de subcontratación fixarase no prego de condicións, sen que poida superar o 30 % das prestacións obxecto do correspondente contrato, medidas en relación co volume de quilómetros-bus-ano previstos en cada proxecto de explotación, nin se poida adscribir en concepto de vehículos en réxime de colaboración un número superior ao resultante de aplicar a dita porcentaxe aos vehículos previstos como necesarios para a prestación do servizo.

As obrigas referentes ao réxime de subcontratación terán a consideración de condicións esenciais de execución do contrato, cuxo incumprimento, ademais das consecuencias previstas no ordenamento xurídico, permitirá a imposición das penalidades que para tal efecto se conteñan nos pregos, e constituirá causa de resolución do contrato.

3.4. Adxudicación en supostos de falta de formulación de ofertas.

Naqueles casos de lotes respecto dos cales non se formulen ofertas que cumpran os requirimentos exixidos pola Administración, de acordo co disposto no artigo 77.3 da Lei 2/2017, do 8 de febreiro, a Administración poderá dispor a adxudicación directa do servizo á empresa que para tal fin seleccione. Para estes efectos, poderá, na fase de negociación prevista no artigo 77.2 da indicada lei, ofrecer a adxudicación do contrato a aquelas empresas que poidan ser adxudicatarias de proxectos que garden relación funcional co proxecto en cuestión, podendo recoñecer prioridade na valoración para a adxudicación, de conformidade cos criterios establecidos nos pregos, as empresas que acepten a adxudicación do indicado proxecto, sen que se tome en consideración o dito lote para o efecto do cálculo do número máximo de lotes dos que a correspondente empresa poida resultar adxudicataria.

Cuarto. Condicións de utilización dos servizos de transporte público. Servizos integrados

4.1. O prego de condicións polo que rexerá a adxudicación dos servizos a que se refire este acordo garantirá a plena aplicabilidade dos dereitos das persoas usuarias dos servizos de transporte público e, de xeito específico, os que prevé o artigo 38 da Lei 1/2015, do 1 de abril.

4.2. Deste xeito, existindo prazas dispoñibles no vehículo garantirase o dereito a ser admitida ao servizo de toda persoa que acceda a el nas paradas habilitadas para tal fin. No cómputo das prazas dispoñibles deduciranse, en todo caso, as reservadas pola Administración para usuarios con dereito a reserva de praza, entre os que se priorizarán os escolares a que a consellería competente en materia de Educación recoñeza o dereito á súa utilización, en relación cos que a prestación do servizo será sempre obrigatoria para o contratista; igualmente, o número de prazas dispoñibles deberase minorar co de reservas de praza efectuadas previamente en servizos ou relacións de tráfico que se presten na modalidade de baixo demanda das persoas usuarias.

4.3. Como excepción ao previsto no punto anterior, o contratista do servizo non estará obrigado a admitir á prestación do servizo as persoas usuarias que incorran en incumprimentos das obrigas que prevé o artigo 38.3 da referida Lei 1/2015, do 1 de abril. De xeito específico, nas expedicións integradas, a exclusión de usuarios de uso xeral que incorran nas causas de exclusión previstas nas letras c) ou d) do referido precepto será obrigatoria para o contratista, estando habilitados para tal fin, en ausencia de axentes da autoridade, tanto o persoal de condución como o persoal acompañante que se encontre a bordo do vehículo. Neste caso, o indicado persoal de condución e acompañante deberá velar pola absoluta e preferente garantía da utilización do servizo polos escolares, resultando de aplicación co maior rigor as obrigas de trato con deferencia e respecto cara a eles.

A posibilidade de non admitir á prestación do servizo as persoas usuarias que incorran en supostos de incumprimento das obrigas previstas no referido artigo 38.3 abranguerá a posibilidade de excluílos do servizo en calquera momento da súa prestación.

Non obstante o indicado nos puntos anteriores, salvo en supostos de forza maior debidamente xustificados en que non sexa posible unha valoración administrativa previa, a exclusión da utilización do correspondente servizo integrado de usuarios con recoñecemento do dereito a reserva de praza (escolares) deberá ser comunicada e autorizada previamente pola dirección xeral competente en materia de transportes. Nos supostos de forza maior, o contratista deberá informar a dirección xeral competente en materia de transportes nas dúas horas seguintes á adopción daquela decisión, achegando a oportuna xustificación. Destas exclusións darase conta á Comisión interdepartamental de coordinación do proceso de implantación do sistema de transporte público integrado de Galicia.

4.4. A dirección xeral competente en materia de transportes adoptará as medidas oportunas para a máxima difusión do réxime de dereitos e obrigas das persoas usuarias do sistema de transporte público.

Igualmente, poderá establecer criterios interpretativos en relación co alcance dos supostos en que se considere que se producen situacións que xustifiquen a exclusión do servizo, tales como as referentes á falta de trato deferente e de respecto ao resto de persoas usuarias do servizo e ao persoal que o preste, ou o uso abusivo del. Especificamente, en relación cos supostos de uso abusivo do sistema de transporte público baixo demanda, estableceranse os criterios para considerar como uso abusivo a reserva ou petición de servizos respecto dos que finalmente non se faga uso sen a súa anulación previa en prazo.

Quinta. Imaxe corporativa «Transporte Público de Galicia»

Nos servizos de transporte público regular de viaxeiros por estrada de uso xeral que se adxudiquen con posterioridade ao presente acordo será obrigatoria a utilización da imaxe corporativa «Transporte Público de Galicia».

Sen prexuízo da observancia do vixente código de identificación corporativa da Xunta de Galicia, aprobado polo Decreto 409/2009, do 5 de novembro, e da marca turística de Galicia, aprobada polo Decreto 121/2011, do 16 de xuño, os órganos da Xunta de Galicia competentes en materia de transporte, cando desenvolvan calquera acción relacionada co ámbito do transporte público, utilizarán como elemento adicional en todas as súas accións de comunicación, e na documentación administrativa, a imaxe corporativa «Transporte Público de Galicia», cuxo manual de identidade corporativa se publicará na páxina web da consellería competente en materia de transporte.

A utilización da dita imaxe preverase nos proxectos de explotación e no prego de condicións polos que rexerá a adxudicación dos servizos de transporte público previstos no ámbito deste acordo, que deberán prever a súa adaptación consonte as instrucións que para o efecto estableza a dirección xeral competente en materia de transportes.

Sexta. Garantía das condicións laborais e sociais. Condicións en relación co persoal que se adscriba ao servizo

6.1. Persoal que se adscriba o servizo.

Os proxectos de explotación dos contratos que serán obxecto de adxudicación recollerán a dotación mínima de persoal que o contratista deberá adscribir á prestación do servizo. A indicada dotación requirida non será obstáculo para que o contratista adscriba á prestación do servizo todo o persoal que considere necesario ou pertinente por enriba da indicada dotación mínima nin impide a aplicación das obrigacións de subrogación a que alude este punto.

6.2. Obrigacións de subrogación de persoal.

De acordo coa lexislación laboral que resulte de aplicación, así como de acordo cos convenios colectivos, é responsabilidade dos empresarios afectados e dos participantes na licitación o cumprimento de todas as obrigas legais aplicables para a subrogación dos traballadores e o cumprimento de todas as restantes obrigas referidas a esta. En particular, os licitadores deben ter en conta o disposto no Acordo Marco Estatal sobre materias do transporte de viaxeiros por estrada, mediante vehículos de tracción mecánica de máis de nove prazas incluído o condutor (publicado por Resolución do 13 de febreiro de 2015, da Dirección Xeral de Emprego, BOE núm. 49, do 26 de febreiro), así como os convenios colectivos que recollen obrigas convencionais de subrogación aplicables na Comunidade Autónoma de Galicia, así como os pactos ou acordos empresariais que resulten de aplicación, que regulen condicións laborais máis beneficiosas que as previstas nos convenios de aplicación.

En particular, sen prexuízo do indicado no parágrafo anterior, e de acordo co previsto no Regulamento comunitario (CE) 1370/2007, do 23 de outubro, que regula os servizos públicos de transporte de viaxeiros por ferrocarril e estrada, e derroga regulamentos (CEE) núm. 1191/69, do 26 de xuño de 1969 e 1107/70, do 4 de xuño de 1970, o prego de condicións imporá ao contratista entrante a obriga de ofrecer ao persoal que efectivamente estivese adscrito á prestación dos concretos servizos afectados, e de acordo coa dedicación efectiva que se viñese prestando, a subrogación nos dereitos laborais e a prestación de servizos adscrito ao novo contrato celebrado, nas mesmas condicións que se se producise un traspaso consonte coa Directiva 2001/23/CE sobre a aproximación das lexislacións dos Estados membros relativas ao mantemento dos dereitos dos traballadores en caso de traspasos de empresas, de centros de actividade ou de partes de empresas ou de centros de actividade.

Coa información ofrecida pola Administración e pola empresa saínte, a empresa entrante será coñecedora do alcance dos medios humanos e obrigas laborais que asumirá como consecuencia da licitación.

6.3. Relación do novo servizo cos servizos preexistentes.

Os servizos de transporte a que se refire este acordo configúranse como servizos de novo establecemento, tendo en conta o seu ámbito territorial, as necesidades de transporte cubertas, as repercusións da súa inclusión na rede de transporte e os tráficos incluídos, presentando por iso unhas características que determinan que non se corresponda cun único servizo preexistente. Deste xeito, o novo servizo afecta total ou parcialmente outros servizos previamente existentes, que desaparecen ou se engloban no novo proxecto de explotación ou en varios dos que se licitan conxuntamente. Polas razóns indicadas, non se pode identificar no prego de condicións o concreto persoal que, por aplicación das obrigas legais ou convencionais de subrogación, debe quedar expresamente adscrito á prestación dos indicados novos servizos de entre o persoal que vén prestando os servizos anteriores que resultan afectados.

Dado que, como se expresou, os contratos a adxudicar derivan de diferentes contratos preexistentes que se ven afectados total ou parcialmente polo novo servizo ou por varios dos novos servizos que se licitan conxuntamente, e para cumprir os deberes de información regulados no artigo 120, TRLCSP, nos proxectos de explotación establecerase a correlación en termos porcentuais, entre os novos contratos e os anteriores. Para estes efectos, debe entenderse que naqueles supostos en que un servizo preexistente se vexa afectado nun 100 % (caso, en particular, dos transportes escolares afectados e determinados casos de liñas de uso xeral), o anterior servizo englobarase integramente na indicada licitación, con todas as consecuencias legais e convencionais establecidas para iso. Pola contra, cando a porcentaxe de afectación sexa inferior ao 100 %, entenderase que o servizo preexistente queda englobado no novo contrato na porcentaxe indicada para os efectos antes aludidos. A Administración prestará esta información aos meros efectos de facilitar o cumprimento das obrigas de subrogación establecidas pola normativa aplicable.

En particular, para os efectos desta cláusula, consideraranse vinculados aos servizos preexistentes aqueles traballadores que desenvolvan unha prestación efectiva de traballo nestes, na porcentaxe de dedicación real que se viñese prestando, sempre de acordo cos criterios establecidos no acordo marco antes indicado.

Calquera modificación contractual que afecte as condicións laborais dos traballadores afectados pola subrogación deberá ser comunicada á Administración, que dará traslado dela ao Consello Galego de Relacións Laborais para os efectos da emisión do correspondente informe.

6.4. Información aos licitadores.

A Administración porá á disposición dos licitadores a información solicitada e facilitada polas diferentes empresas contratistas de servizos de transporte, para os efectos de facilitar a aplicación daqueles acordos e convenios sectoriais alcanzados entre as representacións de traballadores e empregadores e o cumprimento das obrigas reguladas na presente cláusula.

A información que se porá á disposición dos interesados para facilitarlles o cumprimento das súas obrigas legais, convencionais e contractuais será a facilitada polos actuais prestadores dos servizos, sen que a Administración asuma responsabilidade ningunha sobre a súa exactitude ou corrección, nin sobre as consecuencias derivadas de eventuais inexactitudes ou discrepancias coa situación real do persoal afectado, que deberá prevalecer en todo caso de acordo coa normativa laboral. En particular, a dita información que se ofrecerá non substituirá e ofrecerase sen prexuízo da obriga da empresa saínte de facilitar á representación legal de traballadores da empresa, ás asociacións sindicais de maior representatividade, e á empresa entrante a información prevista no artigo 22 do Acordo Marco, na lexislación laboral, convenios colectivos aplicables e calquera pacto ou acordo empresarial que resulte de aplicación, así como sen prexuízo da responsabilidade do empresario entrante de solicitar dos empresarios que prestaban os servizos afectados toda aquela información adicional que deba solicitar en cumprimento da lexislación laboral, convenios colectivos e, en especial, do Acordo Marco antes sinalado.

Coa información facilitada pola Administración e pola empresa saínte, a empresa entrante será coñecedora do alcance dos medios humanos e obrigacións laborais que asumirá como consecuencia da licitación.

6.5. Obrigación de información sobre os traballadores adscritos ao servizo.

Con carácter previo ao comezo da prestación efectiva do servizo obxecto dos contratos, preverase que o contratista adxudicatario deberá presentar á Administración, representantes legais dos traballadores e asociacións sindicais máis representativas o cadro de persoal que vai adscribir efectivamente á prestación do servizo e as súas dedicacións, que deberá cumprir o establecido nesta cláusula en canto ao persoal requirido e ás obrigas de subrogación, dando traslado, igualmente, de copia da alta na Seguridade Social de todos os traballadores adscritos ao novo contrato de conformidade co previsto no artigo 23 do Acordo Marco.

6.6. Mantemento do equilibrio financeiro do contrato respecto das condicións inicialmente previstas.

Os pregos de condicións preverán, para os efectos do establecido na presente cláusula, que os licitadores deban ter en conta e valorar as consecuencias laborais de toda orde, e, en particular, as consecuencias derivadas da necesidade de subrogación nas relacións laborais preexistentes, e os consecuentes custos laborais que implicará tal medida, de acordo coa lexislación laboral, convenios colectivos, acordos e pactos empresariais que resulten de aplicación, para os efectos da presentación das súas ofertas.

Sen prexuízo do indicado, e coa finalidade de garantir o obrigado equilibrio económico do correspondente contrato de xestión do servizo público de transporte, os pregos de condicións preverán que, coa finalidade de naqueles supostos en que, a pesar da dilixencia do contratista na avaliación dos custos laborais, por causas imprevistas, como consecuencia da aplicación dos dereitos legal ou convencionalmente establecidos á subrogación de persoal, o contratista do servizo se vise obrigado a asumir persoal ou obrigas laborais por riba das previsións da súa oferta, ou cunhas condicións máis gravosas que as recollidas nela, este poderá solicitar da Administración o reequilibrio económico do contrato, na medida en que sexa indispensable para manter a ecuación financeira tida en conta na oferta do adxudicatario, e sen que este reequilibrio poida cubrir as consecuencias dunha conduta pouco dilixente do prestador ou eliminar o risco inherente á concesión.

O dito reequilibrio poderá consistir nunha modificación de calquera das condicións de prestación do contrato partindo das inicialmente previstas.

Para o efecto da eventual aplicación desta previsión de reequilibrio, o contratista deberá informar a Administración do conxunto de actuacións levadas a cabo para a axeitada aplicación das obrigas de subrogación de persoal. Así mesmo, deberá informar en todo momento a Administración da aceptación voluntaria de eventuais obrigas que puidesen xerar a aplicación do indicado reequilibrio e xustificar a súa adecuación e suxeición ao establecido na lexislación laboral e criterios do acordo marco, convenios colectivos, acordos e pactos empresariais aplicables.

6.7. Causas específicas de resolución do contrato.

Os pregos de condicións fixarán como causa de resolución do contrato o incumprimento das obrigas anteriormente indicadas en canto ao persoal requirido e/ou obrigas de subrogación, sen prexuízo das consecuencias laborais que sexan de aplicación.

Sétimo. Réxime económico-financeiro do proceso de integración de servizos de transporte

7.1. Logo da adopción do presente acordo, a dirección xeral competente en materia de transporte procederá á remisión de invitacións para formular ofertas aos diferentes proxectos de explotación de servizos consonte co indicado nos puntos anteriores.

Con antelación á remisión da dita invitación, a Consellería de Facenda habilitará o crédito previsto para o pagamento dos referidos servizos na aplicación correspondente.

7.2. Coa finalidade de facilitar a participación da pequena e mediana empresa na prestación destes servizos, a Administración garantirá a materialización dos pagamentos que lle corresponden no prazo de 30 días desde a data de facturación correspondente.

Para tal fin, as compensacións por obriga de servizo e por viaxeiros con bonificacións (escolares) serán obxecto de pagamento con prezo mensual estimado, que será regularizado á alta ou á baixa coa liquidación correspondente ao mes seguinte.

Oitava. Transparencia

8.1. Dado o contido do presente acordo, e coa finalidade de garantir a máxima difusión, información e publicidade aos cidadáns, publicarase no Diario Oficial de Galicia.

8.2. Así mesmo, para velar pola máxima transparencia do proceso, tendo en conta o contido do presente acordo e as modificacións que en consecuencia serán introducidas nos proxectos que se aproben, xunto coas derivadas do proceso de participación pública, habilítase o órgano de contratación para acordar a apertura dun novo prazo de ata tres días naturais desde a publicación na súa páxina web dun extracto da principal información de contido económico dos proxectos, coa finalidade de permitir ás empresas interesadas na formulación de ofertas a manifestación do seu interese. No dito anuncio indicarase o medio ou medios que resulten admitidos para os efectos de facer achega á Administración das indicadas mostras de interese. En calquera caso, aquelas empresas que xa manifestasen o dito interese non necesitarán confirmalo novamente.

ANEXO
Relación de contratos de transporte escolar cuxa prestación será suspendida

09OU0044	16LU4058	16LU4067	16LU4096	16OU0445	21PO0056	21PO0057
21PO0058	21PO0070	21PO0117	21PO0147	21PO0154	21PO0155	21PO0158
21PO0161	21PO0162	21PO0168	21PO0777	99CO0019	99CO0020	99CO0129
99CO0130	99CO0208	99CO0283	99CO0291	99CO0292	99CO0293	99CO0326
99CO0327	99CO0328	99CO0351	99CO0352	99CO0365	99CO0366	99CO0387
99CO0390	99CO0397	99CO0399	99CO0624	99CO1014	99CO1060	99CO3009
99CO3016	99LU0033	99LU0085	99LU0089	99LU0094	99LU0099	99LU0143
99LU0146	99LU0147	99LU0149	99LU0160	99LU0163	99LU0165	99LU0166
99LU0190	99LU0196	99LU0206	99LU0238	99LU0246	99LU0300	99LU0303
99LU0369	99LU0372	99LU0373	99LU0374	99LU0381	99LU0397	99LU0438
99LU0444	99LU0447	99LU0457	99LU0473	99LU0478	99LU0495	99LU0496
99LU0508	99LU0509	99LU0603	99LU1031	99LU3006	99LU3010	99LU3030
99LU4052	99OU0002	99OU0003	99OU0004	99OU0006	99OU0011	99OU0013
99OU0019	99OU0024	99OU0025	99OU0028	99OU0031	99OU0033	99OU0035
99OU0052	99OU0054	99OU0056	99OU0059	99OU0066	99OU0067	99OU0073
99OU0076	99OU0084	99OU0087	99OU0091	99OU0094	99OU0095	99OU0099
99OU0102	99OU0103	99OU0105	99OU0106	99OU0110	99OU0112	99OU0115
99OU0116	99OU0119	99OU0121	99OU0122	99OU0123	99OU0124	99OU0125
99OU0143	99OU0145	99OU0149	99OU0150	99OU0152	99OU0157	99OU0158
99OU0159	99OU0161	99OU0162	99OU0164	99OU0165	99OU0166	99OU0174
99OU0176	99OU0178	99OU0180	99OU0185	99OU0186	99OU0187	99OU0188
99OU0191	99OU0200	99OU0201	99OU0202	99OU0212	99OU0213	99OU0225
99OU0229	99OU0230	99OU0234	99OU0235	99OU0248	99OU0252	99OU0257
99OU0258	99OU0262	99OU0277	99OU0278	99OU0283	99OU0284	99OU0287
99OU0289	99OU0291	99OU0292	99OU0293	99OU0294	99OU0303	99OU0306
99OU0308	99OU0309	99OU0310	99OU0318	99OU0319	99OU0322	99OU0325
99OU0326	99OU0329	99OU0330	99OU0331	99OU0332	99OU0333	99OU0335
99OU0336	99OU0342	99OU0343	99OU0344	99OU0348	99OU0351	99OU0352
99OU0354	99OU0355	99OU0356	99OU0358	99OU0360	99OU0372	99OU0374
99OU0377	99OU0382	99OU0389	99OU0395	99OU0397	99OU0402	99OU0403
99OU0407	99OUB186	99PO0054	99PO0111	99PO0117	99PO0138	99PO0145
99PO0173	99PO0184	99PO0186	99PO0205	99PO0213	99PO0219	99PO0250
99PO0251	99PO0255	99PO0263	99PO0270	99PO0298	99PO0302	99PO0335
99PO0338	99PO0358	99PO0408	99PO0409	99PO0414	99PO0417	99PO0421
99PO0422	99PO0423	99PO0429	99PO0434	99PO0448	99PO0449	99PO0450
99PO0497	99PO0560	99PO0587	99PO0624	99PO0644	99PO0657	99PO0701
99PO0702	99PO0703	99PO0704	99PO0706	99PO0710