En cumprimento do artigo 62.3 do Decreto 123/2014, do 2 de setembro, polo que se aproba o Regulamento da Lei 14/2011, do 23 de decembro, de sociedades cooperativas andaluzas, e do artigo 78.1.c) da Lei 5/1998, do 18 de decembro, de cooperativas de Galicia, anúnciase que as asembleas xerais de socios e socias da Cooperativa Farmacéutica Gallega, Cofaga, S. Coop. Gallega (sociedade absorbida), e de Bida Farma, S. Coop. And. (sociedade absorbente) celebradas o 13 de maio de 2017 e o 17 de xuño de 2017, respectivamente, acordaron aprobar a fusión por absorción da Cooperativa Farmacéutica Gallega, Cofaga, S. Coop. Gallega por parte de Bida Farma, S. Coop. And., con extinción, vía disolución sen liquidación, da primeira e transmisión en bloque de todo o seu patrimonio á absorbente, polo que esta última adquire, por sucesión universal, a totalidade dos dereitos e obrigas da absorbida.
Todo isto de acordo cos termos e condicións establecidos no proxecto de fusión subscrito conxuntamente e aprobado, como convenio previo, polos consellos reitores da sociedade absorbente e a sociedade absorbida no mes de marzo de 2017, cuxas sinaturas foron debidamente lexitimadas perante o notario de Madrid Francisco Miras Ortiz o 4 de abril de 2017 e que, adicionalmente, foi posto á disposición de todos os socios e socias desde o momento da convocatoria das respectivas asembleas xerais.
Conforme o recollido na lexislación vixente e en concreto nos termos establecidos na Lei 14/2011, do 23 de decembro, de sociedades cooperativas andaluzas, e o Decreto 123/2014, do 2 de setembro, polo que se aproba o seu regulamento de desenvovlemento, e a Lei 5/1998, do 18 de decembro, de cooperativas de Galicia, e o Decreto 430/2001, do 18 de decembro, polo que se aproba o seu regulamento de desenvolvemento, déixase expresa constancia do dereito que asiste aos acreedores da sociedade absorbida e da sociedade absorbente a se opoñeren á fusión, así como o dereito de separación dos socios e socias.
A Coruña, 19 de xuño de 2017
Miguel Reviejo Ares
Presidente do Consello Reitor de Cooperativa Farmacéutica Gallega,
Cofaga, Sociedad Cooperativa Gallega
