De conformidade co artigo 9 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia, dáse publicidade á encomenda da Axencia Turismo de Galicia á Axencia Galega de Infraestruturas da xestión de carácter técnico relativa á recepción por funcionarios técnicos da Axencia Galega de Infraestruturas das obras de acondicionamento do Camiño de Santiago, coas seguintes características:

– Actividade: xestión das actuacións precisas para a recepción por funcionarios técnicos da Axencia Galega de Infraestruturas das seguintes obras de acondicionamento do Camiño de Santiago licitadas pola Axencia Turismo de Galicia:

– Proxecto de construción da recuperación, sinalización e mellora do Camiño de Santiago do Norte. Ruta do Interior. Camiño Primitivo ou de Oviedo, adaptándoas á nova delimitación oficial (en 3 lotes).

– Proxecto de construción da recuperación, sinalización e melloras do Camiño de Santiago do Norte. Ruta da Costa, adaptándoa á delimitación oficial 2013-2014 (en 4 lotes).

– Proxecto básico e execución de pavimentación de travesía no núcleo rural da Canda (concello da Mezquita-Ourense).

– Natureza e alcance da xestión encomendada: esta encomenda ten natureza intersubxectiva ao realizarse entre entidades públicas pertencentes ao sector público autonómico dotadas de personalidade xurídica propia e ser a Axencia Galega de Infraestruturas o medio propio e servizo técnico da Administración da Comunidade Autónoma de Galicia, segundo o disposto nos artigos 47 e 48 da Lei 16/2010, do 17 de decembro, de organización e funcionamento da Administración xeral e do sector público autonómico de Galicia.

– Prazo de vixencia da encomenda: ata o 31.12.2017.

– Causas de resolución: incumprimento total ou parcial dalgunha das condicións esenciais que regulan a presente encomenda de xestión, o transcurso do tempo estipulado sen que se teñan realizadas as actividades acordadas, o mutuo acordo das partes asinantes e a denuncia por causas de interese público, por instancia de calquera das partes.

Santiago de Compostela, 16 de marzo de 2017

Mª Nava Castro Domínguez
Directora da Axencia Turismo de Galicia